“Қадриятлар бебаҳо бойлигимиз” шиори остида семинарлар ўтказилди

Қадриятлар – ҳар бир миллатнинг ўтмиши, бугуни ва келажагини ойнадек кўрсатиб турувчи энг муҳим омиллардан бири.

Миллий қадриятлар ҳар бир миллатнинг тили, урф-одатлари, тарихи, маданияти, анъаналарини, барча моддий ва маънавий бойликларини, иқтисодий, ижтимоий-сиёсий ҳаётининг барча томонларини ўз ичига қамраб олади. Ҳар бир миллатнинг маданияти ва урф-одатларини ҳурмат қилиш миллати тили ва диний эътиқодидан қатъий назар қонун олдида тенглигини таъминлаш лозимлиги бош қомусимизда ҳам белгилаб қўйилган.

Шу маънода, ёшлар қалбида қардош миллат ва элатларнинг урф-одатларини ҳамиша ҳурмат қилиш ва уларга дўстона муносабатда бўлишдек эзгу ишларни янада чуқур сингдириш борасида кўплаб сай-ҳаракатлар қилинмоқда. Ёшларни қардош миллат вакилларининг бой тарихий қадриятлари билан яқиндан таништириш мақсадида ташкил қилинаётган кўргазмали семинарлар ҳам шулар жумласидандир.

22 апрель куни Амударё туманининг Амир Темур номли овул фуқаролар йиғини ҳудудидаги Меҳнаткаш аҳоли пунктида жойлашган гиламдўзлик цехида ҳам шу мақсадда кўргазмали семинар ташкил қилинди.

Унда туман ҳокимининг ўринбосари Оила ва хотин-қизлар бўлими бошлиғи Гўзал Собурова, Аёлларни реабилитация қилиш ва маслаштириш намунали туманлараро маркази директори Гавҳар Чимбайчиева, маҳалла фаоллари ҳамда овул ҳудудида жойлашган умумтаълим мактабларнинг ўқувчи қизлари иштирок этишди.

Семинар давомида бежирим гиламлар тўқиш орқали ўз миллийлигини аҳоли орасида кенг тарғиб қилаётган аёл-қизларнинг меҳнатлари алоҳида эътирофга лойиқ эканлиги таъкидланди.

Маълумот ўрнида айтиш керакки, ҳудудда истиқомат қилаётган аёл-қизларнинг бандлигини таъминлашга кўмаклашиш мақсадида туман прокуратураси томонидан 5 та хонадонга тўқиш станогини ўрнатиб берилиб, гилам тўқиш учун зарур бўлган маҳсулотлар ва бошқа тўқиш ускуналари билан таъминланди. Ўтган йилнинг баҳор ойларида фаолият бошлаган гиламдўзлик цехларида айни пайтда бири-биридан чиройли гилам ва палослар тўқилиб, харидорларга етказиб берилмоқда.

Қадимдан маълумки, қардошларимизнинг анъанавий гиламдўзлиги қўл меҳнатига асосланади. Гиламларда ранг-баранг нақшлар, манзаралар, ушбу халқ миллий қадриятлари, анъаналари, маҳаллий ҳайвонот ва наботот олами тасвирланади. Ушбу касб асрлардан асрларга, авлодлардан авлодларга ўтиб келаётгани учун ҳам жуда қадрланади. Кўргазмали cеминар давомида ўқувчи қизлар ҳам дарсдан бўш вақтларида гилам тўқиш сирларини ўрганишни ният қилдилар.

Амударё тумани Оила ва хотин-қизлар бўлими ташаббуси билан ташкил қилинган тадбир доирасида овул ҳудудида истиқомат қилувчи “Аёллар дафтари”га киритилган 20 дан ортиқ хотин-қизлар учун психологик тренинг машғулотлари ҳам ташкил этилди.

Унда аёллар психологияси ҳамда соғлом ва мустаҳкам оиланинг асослари, хотин-қизлар ўртасида учраётган турли нохуш ҳолатларнинг олдини олиш борасидаги ишларга алоҳида эътибор қаратилди. Руҳий тушкунликка тушиб қолган аёллар билан индивидуал суҳбатлар олиб борилиб, уларнинг ўзига бўлган ишончни орттиришга қаратилган тавсиялар бериб ўтилди.

Туман ҳокимлигининг Ахборот хизмати