“ОНАЛАР – ЯШИЛ МАКОН УЧУН!” АКЦИЯСИ ДОИРАСИДА “ОНАЛАР БОҒИ” ТАШКИЛ ЭТИЛМОҚДА

Жорий йилнинг 2 февраль куни давлатимиз раҳбари раислигида бўлиб ўтган видеоселектор йиғилишида «Яшил макон» умуммиллий лойиҳасини давом эттириш бўйича долзарб вазифалар муҳокама этилиб, 1 мартдан эътиборан юртимиз бўйлаб «Яшил йиллик» умуммиллий тадбири бошланиши эълон қилинган эди.

Айни кунларда мамлакатимизда “Яшил йиллик” умуммиллий лойиҳаси доирасидаги вазифалар ижросини таъминлаш мақсадида хотин-қизларни жалб қилган ҳолда акциялар ташкил қилинмоқда. “Оналар – яшил макон учун!” акцияси мазкур хайрли лойиҳа доирасида ўтказилмоқда.

Акцияни амалга оширишдан кўзланган мақсад хотин-қизларнинг манзарали ва мевали дарахт, бута кўчатлари ҳамда уруғ етиштириш, экиш ва парвариш қилиш бўйича кўникмаларини ошириш, улар қалбига экологияни асраш тушунчасини сингдиришдан иборатдир.

Амударё туманида ҳам айни шу мақсадга йўналтирилган ишлар қизғин бошлаб юборилди. Жумладан Амударё туманининг Дурунки маҳалласида ташкил қилинаётган “Оналар боғи”да 300 тадан ортиқ мевали ва манзарали дарахт кўчатлари, 3000 донадан ортиқ гул ва райҳонлар экиш режалаштирилган. Қутлуғ Рамазон ойининг илк кунларида “Оналар боғи”га амударёлик аёл-қизлар кўчат экишни уюшқоқлик билан бошладилар.

Янги боғда кўчат экиш ишларида туман ҳокими ўринбосари, оила ва хотин-қизлар бўлими бошлиғи Гўзал Собурова, Аёлларни реабилитация қилиш ва мослаштириш туманлараро маркази директори Гавхар Чимбайчиева, Халқ депутатлари туман Кенгаши депутатлари, маҳалла раислари ва уларнинг ўринбосарлари ҳамда фаол хотин-қизлар қатнашдилар.

Ўтказилган акцияда иштирок этувчи аёллар ўз саъй-ҳаракатлари билан туманимизни яшил маконга айлантиришга муносиб ҳисса қўшмоқдалар.

Мўътабар ва мунис онахонлар, муҳтарама опа-сингилларимиз қўли билан бунёд этилаётган “Оналар боғи” ҳудудида келгусида оналар ва болалар учун саломатлик йўлаклари, турли саналар муносабати билан ўтказиладиган байрамона тадбирлар учун мўлжалланган замонавий тадбирлар зали ва бошқа инфратузилма иншоотлари тадбиркорлар томонидан барпо этилиши кўзда тутилган. Вақти келиб “Оналар боғи” туманимиз халқи учун хушкайфият бахш этувчи сайилгоҳ масканга айланишга шак-шубҳа йўқ.

Зеро, ям-яшил дов-дарахтлар нафақат она шаҳримизга, балки ҳар бир хонадонга кўркамлик, файз ва тароват бағишлашини азиз аёлларимиз жуда яхши биладилар ва ҳар йилги кўчат экиш мавсумида мўътабар ва мунис онахонларимиз, гўзал опа-сингилларимиз энг аввало ўз хонадонлари остонасини обод қилиш, анвойи гуллар экишни анъанага айлантиришган. Чунки халқимизнинг энг эзгу орзулари рўёби обод ва сўлим манзиллардан бошланади. Гуллар ифори таратиб турган хонадонлар файзи она Ватанга зийнат бағишлайди. Амударёлик аёллар барпо этаётган “Оналар боғи” эса энг обод, энг кўркам ва файзиёб гўшалардан бирига айланади.

 “Оналар яшил макон учун!” акцияси туманда давом этмоқда. Зеро ушбу акция фаровонлик ва ободлик сари қўйилган эзгу ва хайрли қадамдир.

Робия ЙЎЛДОШЕВА.