“ONALAR – YaShIL MAKON UChUN!” AKTsIYaSI DOIRASIDA “ONALAR BOGʻI” TAShKIL ETILMOQDA

Joriy yilning 2-fevral kuni davlatimiz rahbari raisligida boʻlib oʻtgan videoselektor yigʻilishida «Yashil makon» umummilliy loyihasini davom ettirish boʻyicha dolzarb vazifalar muhokama etilib, 1-martdan eʼtiboran yurtimiz boʻylab «Yashil yillik» umummilliy tadbiri boshlanishi eʼlon qilingan edi.

Ayni kunlarda mamlakatimizda “Yashil yillik” umummilliy loyihasi doirasidagi vazifalar ijrosini taʼminlash maqsadida xotin-qizlarni jalb qilgan holda aktsiyalar tashkil qilinmoqda. “Onalar – yashil makon uchun!” aktsiyasi mazkur xayrli loyiha doirasida oʻtkazilmoqda.

Aktsiyani amalga oshirishdan koʻzlangan maqsad xotin-qizlarning manzarali va mevali daraxt, buta koʻchatlari hamda urugʻ yetishtirish, ekish va parvarish qilish boʻyicha koʻnikmalarini oshirish, ular qalbiga ekologiyani asrash tushunchasini singdirishdan iboratdir.

Amudaryo tumanida ham ayni shu maqsadga yoʻnaltirilgan ishlar qizgʻin boshlab yuborildi. Jumladan Amudaryo tumanining Durunki mahallasida tashkil qilinayotgan “Onalar bogʻi”da 300 tadan ortiq mevali va manzarali daraxt koʻchatlari, 3000 donadan ortiq gul va rayhonlar ekish rejalashtirilgan. Qutlugʻ Ramazon oyining ilk kunlarida “Onalar bogʻi”ga amudaryolik ayol-qizlar koʻchat ekishni uyushqoqlik bilan boshladilar.

Yangi bogʻda koʻchat ekish ishlarida tuman hokimi oʻrinbosari, oila va xotin-qizlar boʻlimi boshligʻi Goʻzal Soburova, Ayollarni reabilitatsiya qilish va moslashtirish tumanlararo markazi direktori Gavxar Chimbaychiyeva, Xalq deputatlari tuman Kengashi deputatlari, mahalla raislari va ularning oʻrinbosarlari hamda faol xotin-qizlar qatnashdilar.

Oʻtkazilgan aktsiyada ishtirok etuvchi ayollar oʻz saʼy-harakatlari bilan tumanimizni yashil makonga aylantirishga munosib hissa qoʻshmoqdalar.

Moʻʼtabar va munis onaxonlar, muhtarama opa-singillarimiz qoʻli bilan bunyod etilayotgan “Onalar bogʻi” hududida kelgusida onalar va bolalar uchun salomatlik yoʻlaklari, turli sanalar munosabati bilan oʻtkaziladigan bayramona tadbirlar uchun moʻljallangan zamonaviy tadbirlar zali va boshqa infratuzilma inshootlari tadbirkorlar tomonidan barpo etilishi koʻzda tutilgan. Vaqti kelib “Onalar bogʻi” tumanimiz xalqi uchun xushkayfiyat baxsh etuvchi sayilgoh maskanga aylanishga shak-shubha yoʻq.

Zero, yam-yashil dov-daraxtlar nafaqat ona shahrimizga, balki har bir xonadonga koʻrkamlik, fayz va tarovat bagʻishlashini aziz ayollarimiz juda yaxshi biladilar va har yilgi koʻchat ekish mavsumida moʻʼtabar va munis onaxonlarimiz, goʻzal opa-singillarimiz eng avvalo oʻz xonadonlari ostonasini obod qilish, anvoyi gullar ekishni anʼanaga aylantirishgan. Chunki xalqimizning eng ezgu orzulari roʻyobi obod va soʻlim manzillardan boshlanadi. Gullar ifori taratib turgan xonadonlar fayzi ona Vatanga ziynat bagʻishlaydi. Amudaryolik ayollar barpo etayotgan “Onalar bogʻi” esa eng obod, eng koʻrkam va fayziyob goʻshalardan biriga aylanadi.

 “Onalar yashil makon uchun!” aktsiyasi tumanda davom etmoqda. Zero ushbu aktsiya farovonlik va obodlik sari qoʻyilgan ezgu va xayrli qadamdir.

Robiya YOʻLDOShEVA.