“Яшил макон” лойиҳаси доирасида кўкаламзорлаштириш ишлари қизғин давом этмоқда

Маълумки, муҳтарам Президентимизнинг ташаббуслари билан бутун мамлакатимиз бўйлаб “Яшил макон” умуммиллий лойиҳаси доирасида кенг кўламли ободонлаштириш ва кўчат экиш ишлари амалга оширилмоқда. Лойиҳани самарали амалга ошириш учун шу йилнинг 25 мартидан 5 май санасига қадар кўчат экиш бўйича “Долзарб 40 кунлик” эълон қилинди.

Ушбу тадбирдан кўзланган асосий мақсад − жорий баҳорги мавсумда Республикамиз бўйлаб 125 млн. дона манзарали, мевали дарахт ва бута кўчатларини экиш, яшил майдонларни кенгайтириш бўйича белгиланган режаларни ўз вақтида ва сифатли амалга оширишдир.

Шу мақсадда Амударё туманининг барча ҳудудларида “Яшил макон” лойиҳаси доирасида ободонлаштириш ва кўкаламзорлаштириш ишлари уюшқоқлик билан амалга оширилмоқда.

29 март куни туман ҳокими Султонбой Йўлдашев, ҳоким ўринбосарлари ҳамда мутасадди ташкилот раҳбарлари ушбу ҳайрли ишга ўз ҳиссаларини қўшиш мақсадида Дўстлик маҳалласи ҳудудидаги яшил майдонга мевали ва манзарали дарахт кўчатларини ўтқазишди.

Маълумот учун айтиб ўтиш керакки, мазкур лойиҳа доирасида ариқ-зовурларни тозалаш, дарахтларга шакл бериш ва ободонлаштириш ишлари билан бирга, туманимиз бўйлаб баҳор мавсумида 724 минг тупдан зиёд виргин арчаси, шарқ туяси, япон софораси, катальпа, шумтол, қайрағоч, жийда, тут, заранг, акация, терак, сурия атиргули, узум қаламчалари, ёнғоқ ва шу каби манзарали ва мевали дарахт кўчатларини экиш режалаштирилган.

Дарахтлар ҳудуднинг иқлим шароитидан келиб чиқиб, боғлар ҳосил қилиш ва кўкаламзорлаштиришни назарда тутган ҳолда танлаб олинди. Экиш ишлари якунланганидан кейин кўчатлар агротехник талаблар асосида парвариш қилинади, минерал ва органик ўғитлар билан озиқлантирилиб, зараркунандалардан ҳимоя қилиш чоралари кўрилади.

Турли хилдаги дарахт кўчатлари экилиши туманимиз табиатининг софлиги ва тозалигига қолаверса, иқлим барқарорлигига катта қўшади.

Муҳтарам Президентимиз таъкидлаганидек, “Яшил макон” лойиҳаси− бу бир йиллик тадбир эмас. Яшаб турган жойимизни озода сақлаб, табиатга қанчалик кўп меҳр ва эътибор берсак, келажак авлод ҳам муносиб экологик шароитда яшайди. Бунинг учун биздан талаб қилинадиган биргина нарса –табиатни тоза сақлаган ҳолда ер ва сув ресурсларини, экологик тизимни асраш ҳамда дарахт кўчатларини экиб, боғ яратишдир.

Дарҳақиқат, ўтган 2021 йил давомида экилган ниҳоллар бугун бўй кўрсатиб, кўзни қувонтирмоқда. Галдаги вазифа ушбу кўкаламзорлаштириш ишларини самарали тарзда давом қилдиришдир.

Амалга оширилаётган бу каби эзгу ишлар она табиатни асрашга, шу билан бирга халқимизнинг асрлар оша сақланиб келаётган миллий қадриятларини ёшларимиз қалбига янада чуқур сингдиришга хизмат қилиши билан аҳамиятлидир.

Шундай экан, “Яшил макон” лойиҳаси доирасидаги кўкаламзорлаштириш ва ободонлаштириш ишларида барчамиз фаол қатнашиб, яшил майдонлар кўпайишига ўз ҳиссамизни қўшайлик!

Туман ҳокимлигининг Ахборот хизмати