БЕШОВУЛДА НАВРЎЗ ТАНТАНАСИ

Баҳорий тенгкунлик – Наврўз айёми ҳар бир юртдошимизни шодликка белайди. Боиси Наврўз тантаналарида асрлар оша бизгача етиб келган халқимизнинг урф-одатлари, анъаналари ва қадриятлари яққол намоён бўлади. Байрам арафасида барча яқинларидан хабар олади, беморлардан ҳол сўрайди, эҳтиёжмандларга совға-саломлар  улашилади. Қўни-қўшнилар жам бўлиб, улкан дошқозонларда сумалак қайнатиб, ўйин-кулгу қилишларнинг, баҳорий таомлар тайёрлаб улашишларнинг ҳам завқи бўлакча. Наврўз байрамига бағишланган тадбирларни ўтказишдан кўзланган мақсад ҳам келгуси авлодларга буларни етказиш, она табиатимизни, унинг неъматларини қадрлашга, шукроналик билан яшашга ундашдир.

Президентимизнинг “2022 йилги Наврўз умумхалқ байрамига тайёргарлик кўриш ва уни ўтказиш тўғрисида”ги шу йил 17 февралда қабул қилган Қарорида жорий йилги Наврўз байрамини мамлакатимизда “Ассалом Наврўз – янгиланиш, меҳр-оқибат ва қадр-қиммат айёми” деган бош ғоя асосида умумхалқ сайиллари шаклида кўтаринки руҳда нишонлаш кўзда тутилган. Инсон ва табиат ўртасидаги уйғунлик, она заминга меҳр ва эътибор яққол ўз ифодасини топишини акс эттирадиган, бугунги тинч ҳаётни қадрлаб, шукроналик туйғуси билан  яшашга, инсон қадрини улуғлашга даъват этадиган маънавий-маърифий тадбирларни ўтказишга алоҳида эътибор қаратилган.

Бу – Наврўз байрамининг нуфузи, қадр-қиммати юксак, маъно-мазмуни, фазилати беқиёс эканлигидан далолат беради.

Амударё туманининг барча ҳудудларида бўлгани каби Бешовул маҳалласида ҳам “Ассалом, Наврўз!” деб номланган  байрам тадбири бўлиб ўтди. Дастлаб маҳалла фуқаролар йиғини биноси олдида кекса отахон, онахонлар, маҳалла фаоллари учун дастурхон ёзилиб, Наврўз таомлари тортилди. Йиғилганларни маҳалла фуқаролар йиғини раиси Жасорат Абдуллаев, маҳалладаги ҳоким ёрдамчиси Шерзод Тўраев, ёшлар етакчиси Муроджон Кенжаевлар асил миллий байрамимиз билан қутладилар.

Шунингдек кам таъминланган, ишсиз ёшларга маҳалладаги ҳоким ёрдамчиси кўмаги билан кредитга олинган деҳқончиликда фойдаланишга мўлжалланган мини тракторлар, мотоцикллар топширилди. Табаррук нуронийлар уларга ишлари ўнгидан келишини  тилаб, дуо қилишди.

Шу куни маҳалла фуқаролар йиғини биносининг бир хонасида “Тамара текстиль” масъулияти чекланган жамиятида тикувчилик касбини чуқур ўрганган  маҳалла қизларининг тикувчилик цехи иш бошлади. Маҳалладошлар учун қаровсиз бино замонавий услубда таъмирланиб, у ерда сартарошхона очилгани байрамга ўзига хос совға бўлди. Энди бешовулликлар ўз ҳудудларида сартарош хизматидан фойдаланишлари мумкин бўлди. Маиший хизмат кўрсатиш шоҳобчалари фаолияти йўлга  қўйилиши аҳоли турмуш сифати ошишига хизмат қилади, албатта.

Наврўз байрами сайли ҳудуддаги 37-сонли мактаб ҳовлисида давом этди. Мазкур мактаб ўқувчилари ва 42-сонли Мактабгача таълим ташкилоти тарбияланувчилари иштирокида тайёрланган театрлаштирилган байрам томошасида  миллий халқ қўшиқлари, рақслари ва урф-одатларининг намойиши барчага юқори кайфият бағишлади. Наврўз байрамига оид анъаналар, қадриятларимиз намойишида ёшлар ушбу миллий байрамимизга, шу азиз она Ватанимизга меҳр-муҳаббатини ёрқин намойиш этишди, бахтиёр, дориломон ҳаётимизни қувонч билан мадҳ этишди.

Ойгул РАЖАБОВА.