Наврўз — дўстлик ва ҳамжиҳатлик байрами!
Азал-азалдан шарқ халқлари учун янги йил боши, деҳқон учун барака рамзи ва инсоният учун меҳр-оқибат тимсоли бўлиб келган Наврўзи олам шу кунларда ҳам юртимизнинг турли гўшаларида катта шод-у ҳуррамлик билан нишонланмоқда. Бугун том маънода янгиланаётган Янги Ўзбекистонда кечаётган улкан ўзгаришлар, бунёдкорлик ишлари, халқимизнинг эртанги кунга бўлган мустаҳкам ишончи ва жамиятимиздаги миллатлараро тотувлик мана шу қутлуғ айём шодиёналарида янада ёрқинроқ намоён бўлмоқда.
Нукус шаҳридаги “Нодавлат нотижорат ташкилотлари уйи”да ҳам баҳорнинг илк ойининг сўнгги кунида Наврўз байрами кенг турда нишонланди. Ўзбекистон нодавлат нотижорат ташкилотлари миллий ассоциацияси Қорақалпоғистон Республикаси ҳудудий бўлинмаси ташаббуси билан, бир қатор ҳамкор ташкилотлар иштирокида ташкил этилган “Наврўз – янгиланиш, дўстлик ва барака байрами!” шиори остидаги байрам тадбири юртимиздаги миллатлараро тотувлик, бағрикенглик ва меҳр-оқибат тамойилларининг амалий ифодаси бўлди.
Тантанали тадбирда сўзга чиққан Қорақалпоғистон Республикаси Вазирлар Кенгаши Раисининг ўринбосари Алишер Алланиязов, Қорақалпоғистон Қозоқ миллий-маданий маркази бошлиғи Асқар Умбетаев, Ўзбекистон нодавлат нотижорат ташкилотлари миллий ассоциацияси Қорақалпоғистон Республикаси ҳудудий бўлинмаси бошлиғи Қуўатбай Каримходжаев ва бошқалар таъкидлаганларидек, бугунги кунда муҳтарам Президентимиз раҳбарлигида мамлакатимизда миллатлараро тотувликни мустаҳкамлаш, турли халқлар ўртасида ўзаро ҳамжиҳатлик ва бағрикенглик муҳитини янада кучайтириш давлат сиёсатининг устувор йўналишларидан бирига айланган.
Амалга оширилаётган кенг кўламли ислоҳотлар ва ҳаётий чора-тадбирлар жамиятимизда ўзаро ҳурмат ва бирдамлик туйғуларини юксалтиришга хизмат қилмоқда. Дарҳақиқат, бугун Ўзбекистон заминида турли миллат ва элат вакиллари аҳил-иноқ, бир оила фарзандларидек яшаб, Ватанимиз тараққиёти ва халқимиз фаровонлиги йўлида бир ёқадан бош чиқариб меҳнат қилмоқдалар. Наврўз байрами эса ана шу дўстлик ва бағрикенглик муҳитини янада жипслаштирувчи, барчани бир ғоя ва мақсад йўлида бирлаштирувчи воситадир.
Табиатдаги покланиш жараёни инсонлар руҳиятида ҳам акс этиши Наврўзнинг энг гўзал хусусиятларидан биридир. Кўпни кўрган, ҳаёт мактабини ўтаган нуроний оқсоқолларимиз таъбири билан айтганда, “ҳар бир йил баҳоридан маълум”. Улар бу йилги баҳорнинг файзли келаётганини, кўкламдаги ёғингарчиликлар мўл-кўлчилик ва фаровонликнинг мустаҳкам замини бўлишини таъкидладилар. Дастурхон устида қилинган дуолар ва яхши ниятлар байрам тадбирига алоҳида шукуҳ бағишлади.
Тадбир давомида ташкил этилган кўргазмалар ва миллий либослардаги чиқишлар иштирокчиларнинг ёдида узоқ вақт сақланиб қоладиган бўлди. Турли миллат вакилларининг ўзларига хос миллий кийимларининг намойиши, моҳир ҳунармандлар томонидан тайёрланган халқ амалий санъати дурдоналари кўргазмаси халқимизнинг бой маданий меросини ўзида акс эттирди. Маданият ва санъат соҳаси вакиллари ижросидаги куй-қўшиқлар, жўшқин миллий рақслар ва концерт дастури байрам қатнашчиларига юқори кайфият улашди. Ҳар бир куйланган таронада ва ижро этилган рақсда ватанга муҳаббат, тинчликка шукроналик, баҳор ва Наврўз соғинчи мужассам бўлди.
Тадбир давомида Наврўзнинг нафақат миллий байрам, балки халқлар ўртасидаги дўстлик кўприги сифатидаги ўрни ҳам алоҳида эътироф этилди. Миллий қадриятларимизни асраб-авайлаш ва уларни асл ҳолича келажак авлодларга етказиш ҳар биримизнинг бурчимиз экани яна бир бор таъкидланди.
Наврўз шундай қутлуғ айёмки, у инсон қалбидаги энг олийжаноб фазилатларни — кечиримлилик, саховат ва меҳр-шафқатни уйғотади. Бу байрам бизни янада жипслаштириб, юртимиз тинчлиги ва фаровонлиги йўлида янада ҳамжиҳатлик билан меҳнат қилишга ундайди.
Янгиланиш ва эзгулик фасли бўлган Наврўзи олам муносабати билан ташкил қилинган байрам тадбири сўнгида нуронийлар ҳар бир хонадонга қут-барака, юртимизга омонлик ва дастурхонларимизга тўкин-сочинлик, халқимизга бахт-саодат ёр бўлишини тилаб, дуога қўл очдилар.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
