Navroʻz — doʻstlik va hamjihatlik bayrami!

Azal-azaldan sharq xalqlari uchun yangi yil boshi, dehqon uchun baraka ramzi va insoniyat uchun mehr-oqibat timsoli boʻlib kelgan Navroʻzi olam shu kunlarda ham yurtimizning turli goʻshalarida katta shod-u hurramlik bilan nishonlanmoqda. Bugun tom maʼnoda yangilanayotgan Yangi Oʻzbekistonda kechayotgan ulkan oʻzgarishlar, bunyodkorlik ishlari, xalqimizning ertangi kunga boʻlgan mustahkam ishonchi va jamiyatimizdagi millatlararo totuvlik mana shu qutlugʻ ayyom shodiyonalarida yanada yorqinroq namoyon boʻlmoqda.

Nukus shahridagi “Nodavlat notijorat tashkilotlari uyi”da ham bahorning ilk oyining soʻnggi kunida Navroʻz bayrami keng turda nishonlandi. Oʻzbekiston nodavlat notijorat tashkilotlari milliy assotsiatsiyasi Qoraqalpogʻiston Respublikasi hududiy boʻlinmasi tashabbusi bilan, bir qator hamkor tashkilotlar ishtirokida tashkil etilgan “Navroʻz – yangilanish, doʻstlik va baraka bayrami!” shiori ostidagi bayram tadbiri yurtimizdagi millatlararo totuvlik, bagʻrikenglik va mehr-oqibat tamoyillarining amaliy ifodasi boʻldi.

Tantanali tadbirda soʻzga chiqqan Qoraqalpogʻiston Respublikasi Vazirlar Kengashi Raisining oʻrinbosari Alisher Allaniyazov, Qoraqalpogʻiston Qozoq milliy-madaniy markazi boshligʻi Asqar Umbetayev, Oʻzbekiston nodavlat notijorat tashkilotlari milliy assotsiatsiyasi Qoraqalpogʻiston Respublikasi hududiy boʻlinmasi boshligʻi Quoʻatbay Karimxodjayev va boshqalar taʼkidlaganlaridek, bugungi kunda muhtaram Prezidentimiz rahbarligida mamlakatimizda millatlararo totuvlikni mustahkamlash, turli xalqlar oʻrtasida oʻzaro hamjihatlik va bagʻrikenglik muhitini yanada kuchaytirish davlat siyosatining ustuvor yoʻnalishlaridan biriga aylangan.

Amalga oshirilayotgan keng koʻlamli islohotlar va hayotiy chora-tadbirlar jamiyatimizda oʻzaro hurmat va birdamlik tuygʻularini yuksaltirishga xizmat qilmoqda. Darhaqiqat, bugun Oʻzbekiston zaminida turli millat va elat vakillari ahil-inoq, bir oila farzandlaridek yashab, Vatanimiz taraqqiyoti va xalqimiz farovonligi yoʻlida bir yoqadan bosh chiqarib mehnat qilmoqdalar. Navroʻz bayrami esa ana shu doʻstlik va bagʻrikenglik muhitini yanada jipslashtiruvchi, barchani bir gʻoya va maqsad yoʻlida birlashtiruvchi vositadir.

Tabiatdagi poklanish jarayoni insonlar ruhiyatida ham aks etishi Navroʻzning eng goʻzal xususiyatlaridan biridir. Koʻpni koʻrgan, hayot maktabini oʻtagan nuroniy oqsoqollarimiz taʼbiri bilan aytganda, “har bir yil bahoridan maʼlum”. Ular bu yilgi bahorning fayzli kelayotganini, koʻklamdagi yogʻingarchiliklar moʻl-koʻlchilik va farovonlikning mustahkam zamini boʻlishini taʼkidladilar. Dasturxon ustida qilingan duolar va yaxshi niyatlar bayram tadbiriga alohida shukuh bagʻishladi.

Tadbir davomida tashkil etilgan koʻrgazmalar va milliy liboslardagi chiqishlar ishtirokchilarning yodida uzoq vaqt saqlanib qoladigan boʻldi. Turli millat vakillarining oʻzlariga xos milliy kiyimlarining namoyishi, mohir hunarmandlar tomonidan tayyorlangan xalq amaliy sanʼati durdonalari koʻrgazmasi xalqimizning boy madaniy merosini oʻzida aks ettirdi. Madaniyat va sanʼat sohasi vakillari ijrosidagi kuy-qoʻshiqlar, joʻshqin milliy raqslar va kontsert dasturi bayram qatnashchilariga yuqori kayfiyat ulashdi. Har bir kuylangan taronada va ijro etilgan raqsda vatanga muhabbat, tinchlikka shukronalik, bahor va Navroʻz sogʻinchi mujassam boʻldi.

Tadbir davomida Navroʻzning nafaqat milliy bayram, balki xalqlar oʻrtasidagi doʻstlik koʻprigi sifatidagi oʻrni ham alohida eʼtirof etildi. Milliy qadriyatlarimizni asrab-avaylash va ularni asl holicha kelajak avlodlarga yetkazish har birimizning burchimiz ekani yana bir bor taʼkidlandi.

Navroʻz shunday qutlugʻ ayyomki, u inson qalbidagi eng oliyjanob fazilatlarni — kechirimlilik, saxovat va mehr-shafqatni uygʻotadi. Bu bayram bizni yanada jipslashtirib, yurtimiz tinchligi va farovonligi yoʻlida yanada hamjihatlik bilan mehnat qilishga undaydi.

Yangilanish va ezgulik fasli boʻlgan Navroʻzi olam munosabati bilan tashkil qilingan bayram tadbiri soʻngida nuroniylar har bir xonadonga qut-baraka, yurtimizga omonlik va dasturxonlarimizga toʻkin-sochinlik, xalqimizga baxt-saodat yor boʻlishini tilab, duoga qoʻl ochdilar.