Оқ олтин заминида Наврўз шукуҳи

Баҳор фасли ўзининг илиқ нафаси, табиатнинг уйғониши ва яшариш таровати билан юртимизнинг ҳар бир гўшасига ўзгача файз, қут-барака олиб киради. Минг йиллардан буён аждодларимиз томонидан эъзозланиб келинаётган, миллий қадриятларимиз ва урф-одатларимизнинг ёрқин кўзгуси бўлган Наврўзи олам диёримиз бўйлаб кенг нишонланмоқда. Хусусан, табиати гўзал, тупроғи унумдор, одамлари эса меҳнаткаш ва меҳмондўст бўлган Амударё туманининг чекка ҳудудларида ҳам Наврўз шодиёналари кўтаринки руҳда, ўзгача бир шукуҳ билан нишонланмоқда. Қишнинг изғиринли кунлари ортда қолиб, Амударё соҳиллари бўйлаб табиат яшил либосга бурканган шу кунларда, чекка қишлоқ ва овулларда ҳам байрам тадбирлари қизғин паллага кирган.

Ана шундай унутилмас, мазмунли ва файзли байрам тадбирларидан бири Амударё туманидаги Оқ олтин овулининг Жийдали Қулон аҳоли пунктида истиқомат қилувчи аҳоли, ёшлар ва кенг жамоатчилик иштирокида юксак савияда ташкил этилди.

Байрамнинг асосий тантаналари ҳудуддаги зиё маскани ҳисобланган 71-сонли умумтаълим мактаби ҳовлисида бўлиб ўтди. Таълим муассасаси шу куни чинакам баҳорий қиёфа касб этиб, миллий қадриятлар намойиш этиладиган катта саҳнага айланди. Мактаб маъмурияти ва маҳалла фаолларининг ўзаро ҳамкорлигида катта тайёргарлик билан ўтказилган ушбу тадбирда ўқувчи ёшлар, ўз касбининг фидойилари бўлган ўқитувчилар, нуроний отахону онахонлар жам бўлишди.

Мактаб ҳудуди байрамона безатилиб, миллий матоларимиз бўлмиш атласу адраслар жилоси баҳор қуёши остида кўзни қамаштирди, ўқувчилар томонидан тайёрланган турли амалий санъат кўргазмалари ва баҳорий таомлар тортиқ қилинган бежирим дастурхонлар барчанинг диққатини ўзига тортди. Айниқса, момоларимиз томонидан дошқозонларда туни билан қайнатилган, баҳорнинг шоҳ таоми ҳисобланмиш сумалакнинг хушбўй иси бутун овул бўйлаб таралиб, дилларга чексиз ҳузур бағишлади.

Наврўзнинг моҳиятида мужассам бўлган гина-кудуратларни унутиш, беморлар ҳолидан хабар олиш каби эзгу амаллар тадбирнинг асосий ғоясига айланди. Сумалак атрофида айтилган ўланлар, аскиялар одамлар орасидаги меҳр-оқибат ришталарини, авлодлар ўртасидаги алоқаларни янада мустаҳкамлашга хизмат қилди.

Тадбирнинг бадиий қисми ўзининг ранг-баранглиги ва юксак миллий руҳи билан иштирокчиларда ўчмас таассурот қолдирди. Мактаб ўқувчилари томонидан маҳорат билан тайёрланган концерт дастурида она Ватанни мадҳ этувчи шеърлар, баҳор соғинчи ва табиат гўзаллигини тараннум қилувчи шўх куй-қўшиқлар жонли ижро этилди. Истеъдодли йигит-қизларнинг майин ва жозибадор рақслари йиғилганларга хуш кайфият ҳадя этди.

Наврўз байрамининг ажралмас қисми бўлган миллий халқ ўйинлари ёшларнинг кучи ва чаққонлигини синовдан ўтказди. Бундай ўйинлар нафақат жисмоний чиниқиш, балки ёш авлод қалбида мардлик, ҳалоллик ва чинакам ватанпарварлик туйғуларини шакллантиришда муҳим аҳамиятга эга.

Тадбир сўнгида сўзга чиққан маҳалла фаоллари ва таълим муассасаси раҳбарияти йиғилганларни Наврўз айёми билан самимий муборакбод этиб, юртимизда ҳукм сураётган тинчлик ва осойишталикнинг қадрига етиш, келажак эгаларини комил инсонлар қилиб тарбиялаш ҳар биримизнинг бурчимиз эканлигини таъкидладилар.

Нуроний оқсоқоллар эса қўлларини дуога очиб, бошланаётган янги деҳқончилик мавсумида йилимиз қут-баракали келсин, элимиз тинч, осмонимиз ҳамиша мусаффо бўлсин, дея эзгу тилаклар билдиришди.

Оқ олтин овулининг Жийдали Қулон аҳоли пунктида бўлиб ўтган бу галги Наврўз тантанаси иштирокчиларга бир олам қувонч бағишлабгина қолмай, жамиятда ҳамжиҳатлик, аҳиллик ва ўзликни англаш туйғуларини янада юксалтиришга ҳисса қўшгани билан аҳамиятли бўлди.