АЁЛЛАРИ ҚАДР ТОПГАН ЖАМИЯТ МУСТАҲКАМ БЎЛАДИ

Юртимизда хотин-қизларни қадрлашга алоҳида эътибор қаратилмоқда. Боиси, ривожланган жамиятларда маданиятлилик даражаси хотин-қизларга бўлган муносабат ва улар учун яратилган имкониятларга қараб белгиланади. Шу билан бирга аёллари қадр топган, эъзозланган жамият доим мустаҳкам бўлади.

Туман Ички ишлар бўлимининг хотин-қизлар масалалари бўйича катта инспектори Гавҳар Ўтемурадова ҳам Ички ишлар бўлимида профилактик ҳисобда турган хотин-қизларни ижтимоий ҳаётга мослаштириш, уларнинг муаммоларини ўрганиш, аниқланган муаммоларини ижобий ҳал этиш орқали, соғлом турмуш тарзига қайтариш чораларини кўриб келмоқда. 

Инспектор ўз фаолияти давомида туманда ажрашиш ёқасига келиб қолган 122 та оилаларнинг барчаси билан манзилли профилактик ишларни амалга оширди. Олиб борилган ишлар натижасида 44 та оилани яраштиришга эришилди.

Юртимизда хотин-қизларга нисбатан зўравонлик ишлатилишининг олдини олиш мақсадида ҳимоя ордери институти жорий этилиб, ички ишлар тизимида тазйиқ ва зўравонликка дуч келган хотин-қизларнинг ҳуқуқ ва эркинликларини таъминлаш мақсадида ҳимоя ордерлари берила бошланди. Шунга кўра, ўтган йил давомида 164 та, жорий йилнинг 2 ойида 29 та  хотин-қизларга ҳимоя ордерлари берилди.

Жорий йил февраль ойида Г.Ўтемурадова кам таъминланган ва ижтимоий ҳимояга муҳтож, яшашга жойи бўлмаган 70 ёшли аёл Н.Отажонованинг вақтинча уй-жой билан таъминланишига   кўмаклашди.

Инспектор пробация гуруҳида ҳисобда турган 9 нафар, спиртли ичимликка ружу қўйган 3 нафар, тажовузкор, руҳий касал сифатида руйхатда турган 3 нафар аёллар, фарзанд тарбиясига салбий таъсир кўрсатувчи ота-она, ажрашиш ёқасига келиб қолган 46 та, нотинч бўлган  1 та оила, судланган 9 нафар, кам таъминланган 301 нафар, бандлиги таъминланмаган 697 нафар хотин-қизлар билан доимий давра суҳбатлари, психологик тренинглар, тадбирлар ташкиллаштириб келмоқда.

Айниқса, Пробация гуруҳи назоратида ахлоқ тузатиш жазосини ўтаётган  А.Шерманова, А.Камоловалар ўзларининг бандлиги таъминланишига амалий ёрдам берилганидан жуда мамнун.

Г.Ўтемурадова аёл-қизлар бандлиги таъминланишига яқиндан ёрдамлашиб, ҳар бир маҳалладан пишириқлар тайёрлаш, тикув цехлари, сартарошхоналар, иссиқхоналар ташкил этиш, паррандачилик, чорвачилик, қуёнчилик билан шуғулланиш ташаббуси билан чиққан аёлларга банкдан кредитлар ажратилишига ҳам кўмаклашиб келмоқда.                                                                                                                                         Ўз ишини фидойилик билан бажариб келаётган Г.Утемурадова ҳар бир аёл-қизни опаси, синглисидек кўриб, имконият даражасида кўмак беришга ҳаракат қилади. Буни маҳалла ва овулларга аёллар билан учрашишга борган кезларида уларнинг инспектор қаршисига ўз яқинини кўргандек пешвоз чиқишларидан ҳам илғаш мумкин.

Туман аёл-қизлари ҳуқуқ ва эркинликлари, қонуний манфаатларини ҳимоя қилиш билан бирга уларнинг ҳаёти ҳам яхшиланишига маънан кўмак бериб келаётган Г.Ўтемурадова намунали оиланинг бекаси. У умр йўлдоши С.Сейитов билан бирга ички ишлар соҳасида 20 йилдан зиёд вақтдан бери хизмат қилиб келмоқда. Фарзандлар ҳам ота-она изидан бориб, шу касбни танлашган. Ўғли Ерғали, ҳатто оилага келин бўлиб тушган Равшаной ҳам ички ишлар ходими бўлиб хизмат қилишади. Катта қизи Миллий гвардия тизимида хизмат қилаётган бўлса, кичик қиз ҳали талаба, Қорақалпоқ давлат университетида таҳсил олмоқда.

Ўз соҳаси жонкуяри бўлиш билан бирга оиласида ҳам соғлом муҳит яратишга эришган Г.Ўтемурадованинг ишларига муваффақият тилаб, 8 март – аёл-қизлар байрами билан самимий табриклаймиз.

О.Худойберганова.