СЕН СУЮКЛИСАН, МУҚАДДАССАН, МЎЪТАБАР АЁЛ!

Мамлакатимизда хотин-қизларнинг ижтимоий-сиёсий фаоллигини ошириш, уларнинг турли соҳа ва тармоқларда ўз қобилият ва имкониятларини рўёбга чиқариши учун шароит яратиш, қонуний ҳуқуқ ва манфаатларини ҳимоя қилиш, қўллаб-қувватлаш, оила институтини мустаҳкамлаш борасида кўламдор  ишлар амалга оширилмоқда.

Жамият ҳаётида фаоллик ва ташаббускорлик кўрсатган, ўзларининг самарали  меҳнатлари билан оилаларнинг шаклланишига, фаровонлиги ошишига муносиб ҳисса қўшаётган аёллар “Мўътабар аёл” кўкрак нишони билан тақдирланмоқда, барча жабҳаларда фидойилик қилаётган аёлларнинг меҳнати муносиб баҳоланмоқда. Шунингдек, уларнинг интеллектуал салоҳиятини юксалтириш, қўллаб-қувватлашга эътибор қаратилаётир.

Ҳар йили мамлакатимизда фасллар сарвинози – кўкламнинг илк кунида  ўзбек халқининг ардоқли қизи, таниқли шоира Зулфияхоним таваллудига бағишланган тадбирлар 8 март – Халқаро хотин-қизлар байрамига уланиб кетади.

Аёл! Унинг таърифига сўз мулки ожиз. У аввало фарзандларини меҳри ардоғида авайлаб, юрт корига  ярайдиган қилиб вояга етказувчи фидойи она, эл-юртимиз тинчлиги-тотувлиги учун, фаровонлиги учун курашувчи матонатли инсон, оилаларни ва демакки, кўнгилларни нурафшон этувчи муқаддас зот! Шу  боисдан улар доимо давлатимиз ғамхўрлигида, эъзозида.

Шу йилнинг 7 март куни туманимиз фаол аёллари учун ташкиллаштирилган байрам тадбири ҳам “Муқаддас аёл” деб номланди.

Манғит шаҳридаги “Хон” ресторанида бўлиб ўтган адабий-мусиқий  тадбирда туманимиздаги турли соҳаларда самарали меҳнат қилаётган аёллар, ўз ҳаётий тажрибаси асосида ёшлар тарбиясига, оилалар мустаҳкамлигига муносиб ҳисса қўшаётган нуроний онахонлар, умидли, иқтидорли қизлар иштирок  этдилар.

Йиғилганларни туман ҳокими С.Йўлдашев 8 март – Халқаро хотин-қизлар куни билан қизғин табриклади ва меҳнатда ўрнак кўрсатаётган, шунингдек, турли соҳаларда ишлаб, айни кунда кексалик нафақасига чиққан 120 нафар фахрийларни қимматбаҳо совғалар билан тақдирлади. Туман ҳокими бугунгидек ижтимоий-иқтисодий ривожланишда аёл-қизларнинг роли улкан бўлаётганини фахр билан эътироф этди ва уларга узоқ умр, бахт-саодат тилади.

Туман Маҳалла ва оилани қўллаб-қувватлаш бўлими бошлиғининг биринчи ўринбосари Г.Собирова ва "Мўътабар аёл" кўкрак нишони соҳибаси Роҳатой Рейимовалар табригидан сўнг, навбат туман Маданият бўлимига қарашли муассасалар санъаткорларига берилди.

Туман ҳокимлиги ва Маданият бўлими ҳамкорлигида ташкиллаштирилган тадбирда фаол аёл-қизлар тўкин дастурхон атрофида дилтортар қўшиқлар тинглаб, рақслар томоша қилиб, ҳордиқ чиқардилар. Аёл муқаддаслигини, фидойилиги, матонати ва меҳри уммонлигини мадҳ этувчи шеърлар, қўшиқлар уларга жуда манзур бўлди. “Учқун” ашула ва рақс халқ ансамбли хонандалари ижросидаги “Баҳор вальси” қўшиғи  уларнинг кўнгилларига уйғониш, жонланиш фасли қувончини, тароватини ҳадя этди. Байрамга ташриф буюрган аёл-қизлар ушбу байрамона мусиқий дастурни томоша қилиб,  ҳар бир инсон кўнглида улуғ зот – Оналарга юксак ҳурмат, эҳтиром жой олганлигини ҳис қилдилар.

“Муқаддас аёл” деб номланган мусиқий дастур томошаси ва ўзларига кўрсатилаётган ҳурмат барча иштирокчиларга олам-олам қувонч ва фахр ҳадя этди.

Ойгул РАЖАБОВА.