Амударёнинг мўътабар аёли

Инсон борки, бахт сари интилади, орзу-умидларининг рўёби учун курашиб яшайди. Туманимиздаги Жумур овул маҳалласида истиқомат қилувчи фахрий ўқитувчи Жумагул опа Кошанова ҳам ана шундай эзгу ниятлар оғушида яшаб, ўзининг фидойилиги, эл-юртга қайишувчанлиги, оилапарварлиги билан маҳалладошларининг ҳурмат ва эҳтиромига сазовор бўлган онахонлардан.

Жумагул опа Кошанова гарчи, оддий деҳқон оиласида туғилиб-ўсган бўлса-да, Иккинчи жаҳон уруши иштирокчиси бўлган отаси Рейм бобо ва онаси Ару оналарнинг меҳр-муҳаббати тафтида, ўта интизомли оила муҳитида  тарбиялангани учунми, илмга меҳр қўйди. Оиладаги етти нафар фарзанднинг учинчиси бўлган Жумагул ҳам, Рейм бобонинг бошқа барча фарзандлари ҳам олий маълумотли бўлишларида бу хонадондаги миллий-маънавий қадриятларнинг ўрни муҳим аҳамият касб этган бўлса ажаб эмас.

Жумагул Кошанова умумтаълим мактабини тугатгач, 1976-1981 йилларда Низомий номидаги ТДПИнинг она тили ва адабиёт факультетида таҳсил олди. Қозоқ миллатига мансуб Жумагул Кошанова талабалик йилларида институт фахрига айланган бўлса, ўқишни тугатиб, Амударё туманидаги 48-сонли умумтаълим мактабида илк меҳнат фаолиятини бошлаган кунларданоқ “тилга тушди”. Меҳнатсевар, тиришқоқ, ўз мутахассислик йўналиши бўйича чуқур билимга эга бўлган Жумагул Кошановани 1982 йилда туман ХТБ раҳбарияти 50-сонли мактабга она тили ва адабиёт фани ўқитувчиси сифатида ишга юборишди. Орадан уч йил ўтгач, у ўз педагогик фаолиятини 45-сонли мактабда давом эттирди ва то пенсияга чиққунига қадар, 1985 йилдан 2017 йилгача ўқувчи-ёшларга она тили ва адабиёт фанидан сабоқ берди.

Меҳнатсеварлиги, ташаббускорлиги билан касбдошлари орасида катта обрў-эътибор қозонган Ж.Кошанова таълим-тарбия соҳасида ўзи меҳнат қилаётган жамоада қизиқувчан ўқувчилар билан якка тартибда ишлаш тажрибасини йўлга қўйди. Натижада унинг ўқувчилари орасида олий таълим даргоҳларига ўқишга кирувчилар сафи йил сайин ошиб борди. Шогирдларининг аксарияти айни пайтда малакали ўқитувчи, шифокор, муҳандис сифатида ўз соҳаларининг билимдонларидир.

Жумагул Кошанованинг таълим-тарбия соҳасидаги фидойи хизматлари  ҳукуматимиз ва соҳа вазирлиги, туман ҳокимлиги томонидан муносиб тақдирланди. 2015 йилда у “Қорақалпоғистон Республикаси Халқ таълими аълочиси” кўкрак нишони соҳибаси бўлди. Бири-биридан ақлли, ўқимишли бўлган 4 нафар ўғил-қизнинг меҳрибон онаси. Аллоҳ раҳмат қилсин, катта қизи Динора ҳам она тили ва адабиёт фани ўқитувчиси эди. Иккинчи қизи Гулмира 55-сонли мактабда олий маълумотли бошланғич таълим ўқитувчиси, олий маълумотли қурувчи-архитектор ўғли Жамшид “Davr loyiha FA” МЧЖда бош муҳандис, кенжа ўғли Нурлан эса Тошкент Давлат ирригация институти электротехнология ва электр жиҳозларидан фойдаланиш кафедраси докторанти.

Бугунги кунда умр йўлдоши Алий оға Утегенов билан аҳил-иноқликда, фарзандлар ва эл-юрт ардоғида яшаётган, 10 нафар неваранинг  севимли бувижониси бўлган Жумагул опа Кошанова Жумур овул маҳалласи фаоли сифатида эзгу ишларга бош-қош. Айниқса, маҳаллада  жиноятчиликнинг олдини олиш, хотин-қизлар бандлигини таъминлаш, уйда ўтирган аёл-қизларнинг ўзини-ўзи банд қилишларини таъминлаш мақсадида зарур маслаҳат ва йўл-йўриқлар беради. Айниқса, маҳалла ҳудудида томорқа хўжалигини ривожлантириш, ёш оилаларни мустаҳкамлаш, оилавий низоларнинг олдини олиш, миллатлараро тотувликни мустаҳкамлаш, тўй-маросимларни ихчам ва тартибли ўтказиш борасида маҳалладошларига  энг яқин маслаҳатгўй. Натижада опанинг аралашуви билан кўплаб оилаларнинг ажрашишига чек қўйилиб, яраштирилди. Миллий урф-одат ва анъаналарни қадрлаш, маҳалла ҳудудини тоза ва обод гўшага айлантириш, ҳар бир кўча ва хонадонни яшил боғ-роғга буркаш мақсадида амалга оширилаётган “Яшил йиллик” умуммиллий лойиҳасини тарғиб қилишда опа нафақат ташвиқотчи, балки энг фаол ташаббускор ҳам.

Ўзининг ёшлик даврини, билим ва тажрибасини ёш авлод таълим-тарбиясига, эл-юрт фаровонлиги йўлидаги эзгу ишларга бағишлаб, ҳар бир қилган эзгу амалидан маҳалладошларига, халқига манфаат етказиб яшаётган онахонга мустаҳкам соғлик, узоқ умр, янада тароватли ҳаёт тилаймиз.

Байрам арафасида Жумагул Кошанова "Мўътабар аёл" кўкрак нишони билан тақдирланди. Унинг хонадони байрам билан, мукофот билан табриклаб келувчи меҳмонларга тўлди.

Баҳор ва яшнаш-яшариш, нафосат айёми – Халқаро хотин-қизлар байрами муборак бўлсин, Жумур овулнинг фидойи онахони!

Робия ЙЎЛДОШЕВА.