Бахтли қўша-қариганлар
Халқимизда ёши улуғ инсонлар яшайдиган оилаларга ҳурмат ва ҳавас билан қарашдек яхши одат бор. Чунки нуроний отахонлар, онахонлар ёш авлодга меҳр-оқибатдан сабоқ бериб, оилаларда тотувлик, жамиятда барқарорлик муҳитини мустаҳкамлашга муносиб ҳисса қўшаётир. Шу боисдан ҳам мамлакатимизда кексаларнинг ҳаёт даражаси ва сифатини яхшилаш, уларни моддий, маънавий қўллаб-қувватлаш кўламини кенгайтириш, ёши улуғ инсонларни эъзозлаш миллий қадриятларимиздандир.
Туманимизда ҳам кўпчиликка ўрнак бўлгулик ибратли ҳаёт йўлини босиб ўтиб, ҳалол меҳнати билан обрў-эътибор қозонган, маҳалладошлари, қўни-қўшнилари ҳаёти ҳам тинч-осойишталигига ҳисса қўшиб келаётган намунали оилалар кўп. Манғит шаҳрининг Дурунки маҳалласида исиқомат қилувчи Файзулла Абдуллаев ва аёли Тўхтажон Абдуллаевалар ана шундай элда ҳурмат қозонганлардан. Уларнинг болалиги Иккинчи жаҳон уруши, урушдан сўнгги оғир тикланиш йилларига тўғри келди. Юртдошларимиз бошидан кечирган қаҳатчилик, йўқчилик азоби залворини ҳис қилиб улғайишди, оғир кунларда борини бирга баҳам кўрадиган некбин халқимизнинг олийҳимматлигидан, дўст-биродарлигидан намуна олиб улғайишди.
Ҳозир Файзулла Абдуллаев саксон ёшдан ошди. Тўхтажон она эса саксонга яқинлашди. Худди янги оила қураётганида кексаларнинг “бахтли бўлинг, қўша қаринг”, деган тилаклари ижобат бўлгандай, улар пир-у бадавлатларга айланишди. Файзулла ота тадбиркорлик фаолияти билан шуғулланиб, ўз оиласининг иқтисодини юксалтирибгина қолмай, эҳтиёжманд оилаларни ҳам қўллаб-қувватлаб, қўлидан келган ёрдамини аямади. Уларнинг тотув оиласида дунёга келган икки ўғил, тўрт қиз ҳам эсли-ҳушли, одобли, илмли бўлиб, ҳаётда ўз ўринларини топишди.
Файзулла ота, Тўхтажон она невараларининг ҳам замонавий билимларни пухта эгаллашларига, олийгоҳларда ўқиб, эл корига ярайдиган инсонлар бўлишига алоҳида эътибор беришди. Ҳозир барчаси турли соҳаларда меҳнат қилишади.
Яқинда уларнинг оила қурганига 58 йил тўлди. Шу муносабат билан пир-у бадавлат бу инсонларни қутлаш, қувончига шерик бўлиш, дуоларини олиш учун фарзандлари, яқинлари, қўни-қўшнилари, маҳалла фуқаролар йиғини масъуллари ташриф буюришди.
Тўкин дастурхон атрофида юзлари нур таратиб турган нуронийларни Дурунки маҳалла фуқаролар йиғини раиси Шуҳрат Жуманиёзов, ўринбосари Гавҳар Мингбоевалар қизғин қутлаб, совға-саломлар топширдилар, маҳаллада меҳр-оқибат, ўзаро ҳамдўстлик барқарор бўлишига, эҳтиёжманд оилаларни қўллаб-қувватлаб, ёш оилаларга ўз ҳаётий тажрибалари асосида насиҳатлар қилиб, ижтимоий муҳит яхшиланишига ўз муносиб ҳисса қўшаётганликларини эътироф этдилар.
Шу куни Файзулла ота, Тўхтажон онанинг хонадони қутлаб келувчилар билан нурафшон бўлди, эзгу тилаклардан кўнгиллари тоғдай юксалди. Илоҳим, улардай бўлиб аҳил яшаб, қўша қаримоқ бахти барчага насиб қилсин!
Дурунки маҳалласида бундай аҳил ва узоқ йиллар ҳамжиҳатликда умргузаронлик қилиб, бошқаларга ибрат бўлаётган оилалар кўп. Маҳалла фуқаролар йиғини ходимлари уларнинг ҳаётий тажрибаларини тарғиб этишга, умрбоқий урф-одатларимиз, анъаналаримизни ёшлар қалбига сингдиришга доир кўпгина тадбирлар ўтказишмоқда.
Ойгул РАЖАБОВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
