Миллий бойлигимизга бепарво қарамайлик

Айни дамларда туманимизда пахта йиғим-теримига тайёргарлик ишлари қизғин олиб борилмоқда. Йиғим-терим даврида ёнғин хавфининг олдини олиш алоҳида аҳамият касб этади. Зеро, пахта бизнинг миллий бойлигимиз, ифтихоримиз ҳисобланади. Шунинг учун уни асрашга барча шарт-шароитларни ишга солишимиз, ёнғин чиқишининг олдини олишимиз зарур.

Барча фермер хўжаликларида пахта хирмонлари, пахта қуритиш ўринлари сув ҳавзалари бор бўлган ёки сув ҳовузлари мавжуд бўлган жойларга яқин бўлиши керак. Пахта ҳосилини пахта қабул қилиш пунктларига элтишга алоҳида эътибор ва масъулият зарур. Трактор тиркамаларига ортилган пахта устига албатта шолча ёки брезент ёпилиши керак, акс ҳолда ёнғин келиб чиқиши мумкин. Пахта қабул қилиш пунктларида ва пахта далаларида чекиш, очиқ оловдан фойдаланиш ҳамда пахта ҳосилини йўл четларида қуритиш қатъиян маън қилинади. Хирмонлар, пахта қуритиш ўринлари, йўл бўйлари ҳамда пахта қабул қилиш шохобчаларида «Пахтани оловдан асрайлик!», «Чекилмасин!», «Оловдан фойдаланиш маън қилинади!» каби кўрсатмалар, паннолар билан таъминланиши лозим ва бирламчи ёнғин ўчириш воситалари билан тўлиқ таъминланиши зарур.

Бизнинг туманимиздаги «Юлдуз» очиқ акциядорлик жамияти ҳамда унга қарашли пахта қабул қилиш шохобчаларида пахта ҳосилини қабул қилишга тайёргарлик ишлари ниҳоясига етиб, пахта ҳосилини қабул қилиш ишлари бошланди ва давом қилдирилмоқда. Жамият ва унга қарашли шохобчалар ёнғинга қарши бирламчи ёнғин ўчириш воситалари билан таъминланган. «Пахта-2014» йиғим-терим мавсумига ёрдамга келган ҳашарчиларнинг яшаш жойларида ёнғин хавфсизлиги чораларини кўриш учун бир қанча ишлар олиб борилди. Ҳозирги кунда юқоридаги тартиб қоидалар тўғрисида суҳбатлар ўтказилиб, йўриқномалар ва кўрсатмалар берилмоқда.

Муҳтарам юртдошлар! Бу йилги «Пахта - 2014» йиғим-терим мавсумида фаол қатнашиб, ёнғин хавфсизлиги бўлинмаси ходимларининг кўрсатмаларини ўз вақтида бажарсак, миллий бойлигимиз бўлган пахтани ёнғиндан асраймиз.

Ҳ.МАТЁҚУБОВ,

туман ИИБ ЁХБ бошлиғи, майор.

(Фото - uza.uz)