Амударёда “Янги Ўзбекистон бунёдкорлари” касбий маҳорат миллий танловининг туман босқичи юқори савияда ўтказилди

Бугун, пайшанба куни, Ёшлар куни муносабати билан Амударё туманида “Янги Ўзбекистон бунёдкорлари” касбий маҳорат миллий танловининг туман босқичи кўтаринки руҳда ва юқори савияда ташкил этилди. Ёшларнинг касбий билим ва кўникмаларини намоён этиш, уларнинг меҳнат бозорида рақобатбардош мутахассис бўлиб шаклланишини қўллаб-қувватлашга қаратилган мазкур танлов туман ёшлари ҳаётидаги муҳим тадбирлардан бирига айланди.

Тадбирда туман ҳокими Собир Хўжаметов бошчилигидаги раҳбарлар, мутасадди ташкилотлар вакиллари, маҳаллалар ёшлар етакчилари ҳамда фаол ёшлар иштирок этди. Сўзга чиққанлар мамлакатимизда ёшлар сиёсатини изчил амалга ошириш, уларга замонавий касб-ҳунарларни эгаллаш учун кенг имкониятлар яратиш ҳамда ташаббускор ва интилувчан ёшларни ҳар томонлама қўллаб-қувватлаш борасида олиб борилаётган ишлар ҳақида алоҳида тўхталиб ўтдилар.

Таъкидланганидек, бугунги кунда Янги Ўзбекистон тараққиётининг муҳим омилларидан бири – бу малакали, билимли ва замон талабларига мос кадрларни тайёрлашдир. Шу маънода, “Янги Ўзбекистон бунёдкорлари” касбий маҳорат миллий танлови ёшларнинг касбга бўлган қизиқишини ошириш, уларнинг амалий кўникмаларини синовдан ўтказиш ва энг иқтидорли ёшларни аниқлашда муҳим аҳамият касб этмоқда.

Мазкур танлов Ўзбекистон Республикаси Вазирлар Маҳкамасининг 2026- йил 8 апрелдаги 152-сонли қарори ижросини таъминлаш мақсадида ташкил этилиб, бир неча йўналишларда ўтказилди. Ҳар бир йўналишда иштирокчилар ўз билим ва маҳоратини амалий топшириқлар орқали намойиш этиб, ҳакамлар ҳайъати томонидан баҳолаб борилди.

График дизайн йўналиши бўйича беллашув туманидаги IT марказда ташкил этилди. Ушбу йўналишда қатнашган ёшлар замонавий график дастурлар ёрдамида креатив лойиҳалар яратиб, ўзларининг ижодий фикрлаши, дизайнерлик ёндашуви ва рақамли технологиялар бўйича билимларини намоён этдилар. Тайёрланган ишлар инновацион ғоялар ва миллий қадриятларни замонавий услубда акс эттиргани билан аҳамият касб этди.

Тиббий ва ижтимоий парвариш йўналиши бўйича танлов туман тиббиёт бўлимида ўтказилди. Бу ерда иштирокчилар беморларга хизмат кўрсатиш маданияти, биринчи тиббий ёрдам кўрсатиш, парвариш жараёнларини тўғри ташкил этиш ҳамда касбий этикага оид билим ва кўникмаларини амалда намойиш этдилар.

Сартарошлик касби бўйича мусобақа эса Беруний маҳалласида жойлашган “Дилхушой” оилавий корхонасига қарашли сартарошхонада ташкил этилди. Иштирокчилар замонавий ва миллий услубдаги соч турмакларини яратиш, мижозлар билан ишлаш маданияти ҳамда хизмат кўрсатиш сифати борасидаги маҳоратларини намойиш этдилар. Ҳакамлар ҳайъати томонидан ишларнинг сифати, эстетик кўриниши ва ижодкорлик даражасига алоҳида эътибор қаратилди.

Танлов давомида ёшлар ўртасида соғлом рақобат муҳити шаклланиб, улар ўзаро тажриба алмашиш, янги билим ва кўникмаларни эгаллаш имкониятига эга бўлдилар. Айниқса, касбий маҳоратнинг амалий жиҳатларига катта эътибор қаратилгани иштирокчиларнинг келгусидаги фаолиятида муҳим тажриба вазифасини ўташи билан аҳамиятлидир.

Шубҳасиз, “Янги Ўзбекистон бунёдкорлари” касбий маҳорат миллий танлови нафақат ёшларнинг касбий салоҳиятини юзага чиқариш, балки мамлакатимиз тараққиётига муносиб ҳисса қўшадиган малакали мутахассисларни тарбиялаш йўлидаги муҳим қадамлардан бири бўлиб хизмат қилмоқда.

Чарос Арслонова, туман ҳокимлигининг Ахборот хизмати раҳбари.