ФИРИБГАР ЖАЗОСИНИ ОЛДИ

Амударё туманидаги фермер хўжаликларидан бирини юритаётган К.Г.(исмлар ўзгартирилган) анчадан бери янги трактор сотиб олишни мўлжаллаб юрган эди. Аммо етарли маблағ бўлмагани учун бу ишни кейинроққа суриб юрган кунларидан бирида сотиладиган тракторнинг дараги чиқиб қолди. Дарҳол ёнига ўғлини ва танишини олиб тракторни кўришга борди.

Ўзини ушбу техниканинг эгаси деб таништирган С.Б. нархни 150 млн.га баҳолайди. Бу нархга рози бўлган К.Г. 5 минг АҚШ долларини бериб, қолганини бўлиб тўлашга келишади ва тракторни уйига олиб кетади. Шу тариқа С.Б.га бўлиб-бўлиб 150 млн. сўм пулни бир неча ой мобайнида тўлаб беради.

Аслида трактор С.Б.нинг укасига қарашли фермер хўжалигига лизинг ҳисобига олинган бўлиб, берилган пуллар лизинг ҳисобига тўланиши ва лизинг ҳисобидан чиқарилиб, кейин сотиб олган шахс номига расмийлаштирилиши керак эди. Аммо у К.Г.дан пулларини бўлиб-бўлиб олиб, берган ваъдасини амалда бажармасдан ва тракторнинг лизинг олди-сотди шарномасини бажармасдан, олган пулларнинг ҳаммасини ўзининг эҳтиёжлари учун ишлатиб юборган. Бунинг натижасида, тегишли суднинг ажрими бўйича трактор сотган ташкилотга қайтариб олиниб, фуқаро К.Г.га жуда кўп миқдорда моддий зарар етказилган.

Моддий зарар кўрган К.Г. тумандаги ҳуқуқни муҳофаза қилиш органларидан ёрдам сўраб мурожаат қилишга мажбур бўлади. Иш ўрганиб чиқилганидан сўнг, С.Б. ўзининг ушбу жиноий ҳаракатлари билан Ўзбекистон Республикаси Жиноят Кодексининг тегишли моддасида кўрсатилган жиноятни қасддан содир қилганликда айбланди ва қонунга мувофиқ жазосини олди.

С.Давлетмурадов, Қорақалпоғистон Республикаси Жиноят ишлари бўйича суди судьяси.