Янги ўқув йили олдидан ҳуқуқбузарликлар профилактикаси бўйича долзарб вазифалар белгилаб олинди

Таълим муассасаларида ёшлар ўртасида ҳуқуқбузарликларнинг олдини олиш, уларнинг бўш вақтини мазмунли ташкил этиш ҳамда соғлом ижтимоий муҳитни яратиш бугунги куннинг энг долзарб масалаларидан бири саналади. Шу мақсадда янги ўқув йили бошланиши олдидан Амударё тумани Манғит шаҳридаги 38-сонли умумий ўрта таълим мактабида айнан шу мавзуда, яъни ўқувчи-ёшлар ўртасида ҳуқуқий маданиятни юксалтириш ва профилактик ишларни кучайтиришга бағишланган кенгайтирилган йиғилиш бўлиб ўтди. Мазкур тадбирда таълим соҳаси масъуллари, ҳуқуқ-тартибот идоралари вакиллари, мактаб раҳбарияти ҳамда ота-оналар иштирок этди.

Йиғилишни мактаб директори Баҳром Болтабоев очиб бериб, вояга етмаганлар ўртасида жиноятчиликнинг олдини олиш, ўқувчиларнинг ҳуқуқий билимларини ошириш ҳамда оила ва таълим муассасаси ўртасидаги ҳамкорликни янада кучайтириш муҳим вазифа эканлигини алоҳида таъкидлади. У ўз сўзида ҳар бир ўқувчининг хулқ-атвори, таълимга муносабати, оилавий шароити ва ижтимоий муҳитини чуқур ўрганиш зарурлигини қайд этди. Хусусан, дарсларга мунтазам қатнашмайдиган, сабабсиз дарс қолдирадиган, мактаб ички тартиб-қоидаларига риоя этишда қийинчиликка дуч келаётган ҳамда назорат ва тарбиявий эътибор талаб қиладиган ўқувчилар билан индивидуал ишлаш тизимини кучайтириш лозимлиги айтиб ўтилди.

Тадбирда сўзга чиққан Қорақалпоғистон Республикаси Мактабгача ва мактаб таълими вазирлиги масъуллари таълим муассасаларида жиноятчиликнинг олдини олиш фақатгина ҳуқуқни муҳофаза қилувчи органларнинг вазифаси эмаслигини, балки бу жараён мактаб, ота-она, маҳалла ва кенг жамоатчиликнинг узвий ҳамкорлигини талаб қиладиган муҳим йўналиш эканлигини эътироф этди. Мутасаддилар ўқувчиларга қонунларга ҳурмат руҳини сингдириш, уларнинг ҳуқуқ ва мажбуриятларини тушунтириш, турли салбий таъсирлардан ҳимоя қилиш бўйича мунтазам тарғибот-тушунтириш ишларини олиб бориш зарурлигини таъкидладилар.

Шунингдек, туман Ички ишлар бўлими инспектор-психологи Улуғбек Қўчқаров вояга етмаганлар ўртасида ҳуқуқбузарликларнинг келиб чиқишига сабаб бўлувчи асосий омиллар — ўқувчиларнинг психологик ҳолати, оиладаги муҳит, тенгдошлар таъсири, назоратсизлик ва бўш вақтнинг мазмунсиз ўтказилиши каби масалаларга атрофлича тўхталиб ўтди. У муаммоли вазиятларга тушиб қолган ўқувчиларни вақтида аниқлаш, улар билан якка тартибда ишлаш ва зарур ҳолларда ота-оналар ҳамда тегишли мутахассисларни жалб этиш лозимлигини билдирди. Ўқувчиларга мактаб ички тартиб-қоидаларига риоя қилиш ва ўз хатти-ҳаракатлари учун жавобгарликни ҳис этиш масалалари тушунтирилиши шартлиги қайд этилди.

Йиғилиш давомида аниқ чора-тадбирлар дастури ишлаб чиқилди ва қарорлар қабул қилинди. Жумладан, мактабда жиноятчиликнинг олдини олишга қаратилган профилактик тадбирларни мунтазам ташкил этиш, "Ҳуқуқий саводхонлик", "Қонун ва мен", "Ёшлар ва қонун", шунингдек, "Қонун барчамиз учун" каби мавзуларда давра суҳбатлари ўтказиш жадваллари тасдиқланди. Ўқувчиларнинг дарсларга қатнашишини ҳар куни назоратга олиш, сабабсиз дарс қолдираётганларнинг ота-оналари билан профилактик суҳбатлар ўтказиш вазифаси синф раҳбарлари ва директор ўринбосарлари зиммасига юклатилди.

Бундан ташқари, ўқувчиларнинг ижтимоий-психологик ҳолатини ўрганиш, тажовузкор хулқ-атвор ва низоли вазиятларга мойиллик кузатилганда мактаб психологи томонидан тегишли ишларни амалга ошириш тартиби кўрсатиб ўтилди. Ёшларнинг бўш вақтларини мазмунли ташкил этиш мақсадида уларни спорт, фан, санъат ва маданият йўналишларидаги тўгаракларга кенг жалб этиш ҳамда янги тўгараклар ташкил қилиш юзасидан таклифлар ишлаб чиқишга келишиб олинди. Ҳозирги глобаллашув даврида ўқувчиларга интернет ва ижтимоий тармоқлардан хавфсиз ва маданиятли фойдаланиш, турли зарарли гуруҳлар ва номақбул контентларнинг олдини олиш бўйича тушунтириш ишларини олиб бориш муҳимлиги таъкидланди.

Маҳалла, ота-оналар ва ҳуқуқни муҳофаза қилувчи органлар ўртасидаги ҳамкорликни янада кучайтириш ҳамда янги ўқув йили давомида қўшма тадбирлар режасини амалга оширишга келишиб олинди. Ушбу саъй-ҳаракатлар келажагимиз эгалари бўлган ёшларнинг соғлом, билимли ва қонунга итоаткор фуқаролар бўлиб вояга етишини таъминлашга хизмат қилади.