Yangi oʻquv yili oldidan huquqbuzarliklar profilaktikasi boʻyicha dolzarb vazifalar belgilab olindi

Taʼlim muassasalarida yoshlar oʻrtasida huquqbuzarliklarning oldini olish, ularning boʻsh vaqtini mazmunli tashkil etish hamda sogʻlom ijtimoiy muhitni yaratish bugungi kunning eng dolzarb masalalaridan biri sanaladi. Shu maqsadda yangi oʻquv yili boshlanishi oldidan Amudaryo tumani Mangʻit shahridagi 38-sonli umumiy oʻrta taʼlim maktabida aynan shu mavzuda, yaʼni oʻquvchi-yoshlar oʻrtasida huquqiy madaniyatni yuksaltirish va profilaktik ishlarni kuchaytirishga bagʻishlangan kengaytirilgan yigʻilish boʻlib oʻtdi. Mazkur tadbirda taʼlim sohasi masʼullari, huquq-tartibot idoralari vakillari, maktab rahbariyati hamda ota-onalar ishtirok etdi.

Yigʻilishni maktab direktori Bahrom Boltaboyev ochib berib, voyaga yetmaganlar oʻrtasida jinoyatchilikning oldini olish, oʻquvchilarning huquqiy bilimlarini oshirish hamda oila va taʼlim muassasasi oʻrtasidagi hamkorlikni yanada kuchaytirish muhim vazifa ekanligini alohida taʼkidladi. U oʻz soʻzida har bir oʻquvchining xulq-atvori, taʼlimga munosabati, oilaviy sharoiti va ijtimoiy muhitini chuqur oʻrganish zarurligini qayd etdi. Xususan, darslarga muntazam qatnashmaydigan, sababsiz dars qoldiradigan, maktab ichki tartib-qoidalariga rioya etishda qiyinchilikka duch kelayotgan hamda nazorat va tarbiyaviy eʼtibor talab qiladigan oʻquvchilar bilan individual ishlash tizimini kuchaytirish lozimligi aytib oʻtildi.

Tadbirda soʻzga chiqqan Qoraqalpogʻiston Respublikasi Maktabgacha va maktab taʼlimi vazirligi masʼullari taʼlim muassasalarida jinoyatchilikning oldini olish faqatgina huquqni muhofaza qiluvchi organlarning vazifasi emasligini, balki bu jarayon maktab, ota-ona, mahalla va keng jamoatchilikning uzviy hamkorligini talab qiladigan muhim yoʻnalish ekanligini eʼtirof etdi. Mutasaddilar oʻquvchilarga qonunlarga hurmat ruhini singdirish, ularning huquq va majburiyatlarini tushuntirish, turli salbiy taʼsirlardan himoya qilish boʻyicha muntazam targʻibot-tushuntirish ishlarini olib borish zarurligini taʼkidladilar.

Shuningdek, tuman Ichki ishlar boʻlimi inspektor-psixologi Ulugʻbek Qoʻchqarov voyaga yetmaganlar oʻrtasida huquqbuzarliklarning kelib chiqishiga sabab boʻluvchi asosiy omillar — oʻquvchilarning psixologik holati, oiladagi muhit, tengdoshlar taʼsiri, nazoratsizlik va boʻsh vaqtning mazmunsiz oʻtkazilishi kabi masalalarga atroflicha toʻxtalib oʻtdi. U muammoli vaziyatlarga tushib qolgan oʻquvchilarni vaqtida aniqlash, ular bilan yakka tartibda ishlash va zarur hollarda ota-onalar hamda tegishli mutaxassislarni jalb etish lozimligini bildirdi. Oʻquvchilarga maktab ichki tartib-qoidalariga rioya qilish va oʻz xatti-harakatlari uchun javobgarlikni his etish masalalari tushuntirilishi shartligi qayd etildi.

Yigʻilish davomida aniq chora-tadbirlar dasturi ishlab chiqildi va qarorlar qabul qilindi. Jumladan, maktabda jinoyatchilikning oldini olishga qaratilgan profilaktik tadbirlarni muntazam tashkil etish, "Huquqiy savodxonlik", "Qonun va men", "Yoshlar va qonun", shuningdek, "Qonun barchamiz uchun" kabi mavzularda davra suhbatlari oʻtkazish jadvallari tasdiqlandi. Oʻquvchilarning darslarga qatnashishini har kuni nazoratga olish, sababsiz dars qoldirayotganlarning ota-onalari bilan profilaktik suhbatlar oʻtkazish vazifasi sinf rahbarlari va direktor oʻrinbosarlari zimmasiga yuklatildi.

Bundan tashqari, oʻquvchilarning ijtimoiy-psixologik holatini oʻrganish, tajovuzkor xulq-atvor va nizoli vaziyatlarga moyillik kuzatilganda maktab psixologi tomonidan tegishli ishlarni amalga oshirish tartibi koʻrsatib oʻtildi. Yoshlarning boʻsh vaqtlarini mazmunli tashkil etish maqsadida ularni sport, fan, sanʼat va madaniyat yoʻnalishlaridagi toʻgaraklarga keng jalb etish hamda yangi toʻgaraklar tashkil qilish yuzasidan takliflar ishlab chiqishga kelishib olindi. Hozirgi globallashuv davrida oʻquvchilarga internet va ijtimoiy tarmoqlardan xavfsiz va madaniyatli foydalanish, turli zararli guruhlar va nomaqbul kontentlarning oldini olish boʻyicha tushuntirish ishlarini olib borish muhimligi taʼkidlandi.

Mahalla, ota-onalar va huquqni muhofaza qiluvchi organlar oʻrtasidagi hamkorlikni yanada kuchaytirish hamda yangi oʻquv yili davomida qoʻshma tadbirlar rejasini amalga oshirishga kelishib olindi. Ushbu saʼy-harakatlar kelajagimiz egalari boʻlgan yoshlarning sogʻlom, bilimli va qonunga itoatkor fuqarolar boʻlib voyaga yetishini taʼminlashga xizmat qiladi.