БИОЛОГИЯ ФАНЛАРИ ФАЛСАФА ДОКТОРИ ЎЗИ ЎҚИГАН МАКТАБДА “МАҲОРАТ ДАРСИ” ЎТДИ
Туманимизда фаолият юритаётган умумий ўрта таълим муассасаларида таълим – тарбия олиб, ўз орзулари йўлида олға интилиб, изланиб, илм-фан ривожига ҳисса қўшаётганлар талайгина. Манғит шаҳрида туғилиб вояга етган Анвар Шеримбетов шуларнинг бири. У 40-сонли мактабни тамомлаб Тошкент Давлат Аграр университети Нукус филиалига ўқишга кирди. 2004 йилда ушбу олийгоҳнинг бакалавриат босқичини тамомлаб, Манғит шаҳридаги 38-сонли мактабда ўқитувчилик фаолиятини бошлади. Ўз соҳасини чуқур эгаллаш мақсадида магистратура босқичида ўқишини давом эттирди.
Тошкент Давлат Аграр университетининг магистратура босқичида ўқиши жараёнида Анварда ўз ихтисослиги бўйича чуқур билим олиш, илмий изланишлар олиб бориб, янгиликлар яратиш иштиёқи уйғонди. Шу ниятда у магистратурани тамомлаб, Ўзбекистон Республикаси Фанлар академияси Генетика ва ўсимликлар экспериментал биологияси институти аспирантурасини ҳам тугатиб, 2012-2016 йилларда институтда кичик илмий ходим бўлиб фаолият юритди ва дессертациясини муваффақиятли ҳимоя қилди. 2016 йилдан ҳозирга қадар эса Ўзбекистон Республикаси Фанлар академияси Генетика ва ўсимликлар экспериментал биологияси институтида илмий объект коллекцияси раҳбари лавозимида ишлаб келмоқда. Ўтган йиллар давомида олиб борган илмий изланишлари натижасида доцент илмий унвонини олди, биология фанлари фалсафа доктори бўлди.
Манғитнинг ана шундай иқтидорли ўғлони яқинда туманимизга ташриф буюрди. Ташрифи чоғида ўзининг доимий одатига кўра таълим олган 40-сонли мактабига ҳам борди. Бу ердаги таълим – тарбия жараёни, хусусан биология фанининг ўқитилиши аҳволи билан қизиқди.
Маълумки, биология фанини яхши ўрганиш ўқувчига борлиқни англашга, ўзини англашга, атрофини қуршаган ўсимликлар дунёсини англашга ёрдам беради ва табиатга оқилона муносабатда бўлиш ҳиссини тарбиялайди. Ёш олим шунинг учун ўзи ўқиган мактаб ўқувчиларига биология фанидан “Маҳорат дарси” ўтди ва ёшларни қизиқтирган барча саволларга батафсил жавоблар берди. Албатта, нуфузли олим билан бўлган дарс ўқувчиларга улкан мотивациялар берди.
Иккинчи дарс – Манғит шаҳрида фаолият юритаётган умумий ўрта таълим мактабларининг биология фани ўқитувчилари учун “Маҳорат дарси” бўлди. Ўтказилган дарс, биология фани соҳасидаги янгиликлар, фанни ўқувчиларга ўқитишда қўшимча тариқасида фойдаланиш мумкин бўлган маълумотлар ўқитувчилар учун ҳам жуда қизиқарли бўлди.Улар ёш олимнинг касалланган қишлоқ хўжалиги экинларига ташҳис қўйиш, ўсимликларда касаллик келтириб чиқарувчи микроорганизмлар турлари таркибини аниқлаш, уларнинг тузилишини, хусусиятларини ўрганиш, коллекцияда сақлаш ва уларни оптимизация қилиш йўналишида олиб бораётган ишлари ҳақида ҳам қўшимча маълумотларга эга бўлдилар. Ҳиндистон, Исроил, Россия каби давлатларда малака ошириб, олимлари билан мустаҳкам ижодий ҳамкорлик ўрнатган манғитлик олим билан суҳбат ўқувчиларда ҳам, ўқитувчиларда ҳам улкан таассуротлар қолдирди.
Ойгул РАЖАБОВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
