“Аёллар маслаҳат кенгашлари” фаолиятига бағишланган кўргазмали семинарлар ташкил этилди

Мамлакатимизда иқтисодий, сиёсий ва ижтимоий ҳаётининг барча жабҳаларида хотин-қизларнинг фаоллигини ошириш, уларнинг таълим ва касбий кўникмалар олиши ҳамда бандлигини таъминлашга ҳар томонлама кўмаклашиш, тадбиркорлик ташаббусларини янада қўллаб-қувватлаш, хотин-қизлар муаммолари, эҳтиёжлари ва қизиқишларини тизимли ўрганиш, таҳлил қилиш ва ҳал этиш борасида кенг кўламли ислоҳотлар амалга оширилмоқда. Давлатимиз раҳбарининг “Хотин-қизларни қўллаб-қувватлаш, уларнинг жамият ҳаётидаги фаол иштирокини таъминлаш тизимини янада такомиллаштириш чора-тадбирлари тўғрисида”ги қарори бу борадаги ишлар самарадорлигини оширишда муҳим ҳужжат бўлмоқда.

Мазкур қарор асосида Амударё туманидаги 49 та маҳалла ва овул фуқаролар йиғинларида Аёллар маслаҳат кенгашларини ташкил этиш бўйича барча зарурий чора-тадбирлар амалга оширилиб, ҳар бир маҳаллада 9-15 нафар аъзодан иборат таркибда кенгашлар тузилди. Тумандаги умумтаълим мактаблари бинолари ҳамда фуқаролар йиғинларида Аёллар маслаҳат кенгашлари учун зарур хоналар ажратилди. Ажратилган хоналар белгиланган талаблар асосида жиҳозланиб, кенгашларнинг самарали фаолияти йўлга қўйилди.

Туман Маҳалла ва оилани қўллаб-қувватлаш бўлими томонидан тасдиқланган режа асосида Аёллар маслаҳат кенгашлари фаолияти самарадорлигини янада ошириш мақсадида Қиличбой, Хитой овуллари ва Гулзор маҳалла фуқаролар йиғинларида кўргазмали семинарлар ўтказилди. Ушбу семинарларга ҳудудлардаги кенгашлар азолари, маҳалла фуқаролар йиғинлари раисларининг оила, хотин-қизлар ва ижтимоий-маънавий масалалар бўйича ўринбосарлари иштирок этдилар.

Семинарларда туман Маҳалла ва оилани қўллаб-қувватлаш бўлими бошлиғининг биринчи ўринбосари Муқаддас Бекназарова бутун мамлакатимизда 24 октябрь куни ўтказиладиган муҳим сиёсий жараён - Ўзбекистон Республикаси Президенти сайловида барча хотин-қизларни фаол иштирок этишга чорлади. У ўз сўзида аёллар уй бекаси, она, опа-сингил, турмуш ўртоғи бўлиш билан биргаликда жамиятда ўз ўрни ва мавқейига эга шахс ҳисобланиши, шу боисда, юрт тараққиётининг янги босқичида ҳал қилувчи аҳамият касб этадиган Президент сайловида муносиб иштирок этиб, Ватан равнақи, фарзандларимизнинг бахт-у камоли ҳамда халқ фаравон ҳаёти учун муносиб номзодга овоз беришлари, шунингдек, барча оила аъзолари, маҳалладошларини ушбу сиёсий жараёнда ўз конституциявий ҳуқуқларидан фойдаланишга чақиришлари лозимлигини таъкидлади.

Семинарларда Аёлларни реабилитация қилиш ва мослаштириш Қорақалпоғистон Республикаси туманлараро маркази директори Гавҳар Чимбойчиева Аёллар маслаҳат кенгашларининг асосий мақсад ва вазифалари, ҳуқуқ ва мажбуриятлари, кенгашнинг фаолиятини янада жонлантириш ҳақида сўз юритди.

У ўз сўзида кенгаш таркибига фуқаролар йиғини раисининг оила, хотин-қизлар ва ижтимоий-маънавий масалалар бўйича ўринбосари, маҳаллада истиқомат қиладиган ҳамда катта ҳаётий ва амалий тажрибага, аҳоли орасида обрў-эътиборга эга бўлган аёллар, зиёли онахонлар, тадбиркор аёллар, ҳудуддаги таълим ва тиббиёт муассасаларининг аёл ходимлари жалб қилинганлигини алоҳида таъкидлаб ўтди.  Ушбу кенгаш фаолияти намунали йўлга қўйилса, оилавий ажримлар, оиладаги нотинчликлар ҳамда хотин-қизлар ўртасидаги турли салбий ҳолатларнинг олди олиниши қайд этилди.

Шунингдек, туман ички ишлар бўлими ҳуқуқбузарликлар профилактикаси хотин-қизлар масалалари бўйича катта инспектори, подполковник Гаухар Утемуратова хотин-қизлар ўртасида жиноятчилик ва ҳуқуқбузарликларнинг олдини олиш юзасидан ўз фикр-мулоҳазаларини билдириб ўтди.

Семинарларда Аёллар маслаҳат кенгашлари аъзолари иштирокида соғлом оилавий муносабатлар тизимини мустаҳкамлаш, қайнона ва келин ўртасида самимий, ўзаро ҳурматга асосланган муносабатларни қарор топтириш мақсадида “Қайнона-келин маъсулияти” номли давра суҳбатлари ўтказиш лорзимлиги қайд этилиб, шу орқали жамиятда соғлом, ахлоқий, психологик муносабатларга асосланган қайнона-келин муносабатлари тизими қарор топган намунали оилалар сонини ошириш режаси белгилаб олинди. Семинарлар савол-жавоблар асосида жуда қизиқарли якунига етди.

Гавхар Чимбойчиева, Аёлларни реабилитация қилиш ва мослаштириш Қорақалпоғистон Республикаси туманлараро маркази директори.