“Ayollar maslahat kengashlari” faoliyatiga bagʻishlangan koʻrgazmali seminarlar tashkil etildi

Mamlakatimizda iqtisodiy, siyosiy va ijtimoiy hayotining barcha jabhalarida xotin-qizlarning faolligini oshirish, ularning taʼlim va kasbiy koʻnikmalar olishi hamda bandligini taʼminlashga har tomonlama koʻmaklashish, tadbirkorlik tashabbuslarini yanada qoʻllab-quvvatlash, xotin-qizlar muammolari, ehtiyojlari va qiziqishlarini tizimli oʻrganish, tahlil qilish va hal etish borasida keng koʻlamli islohotlar amalga oshirilmoqda. Davlatimiz rahbarining “Xotin-qizlarni qoʻllab-quvvatlash, ularning jamiyat hayotidagi faol ishtirokini taʼminlash tizimini yanada takomillashtirish chora-tadbirlari toʻgʻrisida”gi qarori bu boradagi ishlar samaradorligini oshirishda muhim hujjat boʻlmoqda.

Mazkur qaror asosida Amudaryo tumanidagi 49 ta mahalla va ovul fuqarolar yigʻinlarida Ayollar maslahat kengashlarini tashkil etish boʻyicha barcha zaruriy chora-tadbirlar amalga oshirilib, har bir mahallada 9-15 nafar aʼzodan iborat tarkibda kengashlar tuzildi. Tumandagi umumtaʼlim maktablari binolari hamda fuqarolar yigʻinlarida Ayollar maslahat kengashlari uchun zarur xonalar ajratildi. Ajratilgan xonalar belgilangan talablar asosida jihozlanib, kengashlarning samarali faoliyati yoʻlga qoʻyildi.

Tuman Mahalla va oilani qoʻllab-quvvatlash boʻlimi tomonidan tasdiqlangan reja asosida Ayollar maslahat kengashlari faoliyati samaradorligini yanada oshirish maqsadida Qilichboy, Xitoy ovullari va Gulzor mahalla fuqarolar yigʻinlarida koʻrgazmali seminarlar oʻtkazildi. Ushbu seminarlarga hududlardagi kengashlar azolari, mahalla fuqarolar yigʻinlari raislarining oila, xotin-qizlar va ijtimoiy-maʼnaviy masalalar boʻyicha oʻrinbosarlari ishtirok etdilar.

Seminarlarda tuman Mahalla va oilani qoʻllab-quvvatlash boʻlimi boshligʻining birinchi oʻrinbosari Muqaddas Beknazarova butun mamlakatimizda 24-oktyabr kuni oʻtkaziladigan muhim siyosiy jarayon - Oʻzbekiston Respublikasi Prezidenti saylovida barcha xotin-qizlarni faol ishtirok etishga chorladi. U oʻz soʻzida ayollar uy bekasi, ona, opa-singil, turmush oʻrtogʻi boʻlish bilan birgalikda jamiyatda oʻz oʻrni va mavqeyiga ega shaxs hisoblanishi, shu boisda, yurt taraqqiyotining yangi bosqichida hal qiluvchi ahamiyat kasb etadigan Prezident saylovida munosib ishtirok etib, Vatan ravnaqi, farzandlarimizning baxt-u kamoli hamda xalq faravon hayoti uchun munosib nomzodga ovoz berishlari, shuningdek, barcha oila aʼzolari, mahalladoshlarini ushbu siyosiy jarayonda oʻz konstitutsiyaviy huquqlaridan foydalanishga chaqirishlari lozimligini taʼkidladi.

Seminarlarda Ayollarni reabilitatsiya qilish va moslashtirish Qoraqalpogʻiston Respublikasi tumanlararo markazi direktori Gavhar Chimboychiyeva Ayollar maslahat kengashlarining asosiy maqsad va vazifalari, huquq va majburiyatlari, kengashning faoliyatini yanada jonlantirish haqida soʻz yuritdi.

U oʻz soʻzida kengash tarkibiga fuqarolar yigʻini raisining oila, xotin-qizlar va ijtimoiy-maʼnaviy masalalar boʻyicha oʻrinbosari, mahallada istiqomat qiladigan hamda katta hayotiy va amaliy tajribaga, aholi orasida obroʻ-eʼtiborga ega boʻlgan ayollar, ziyoli onaxonlar, tadbirkor ayollar, hududdagi taʼlim va tibbiyot muassasalarining ayol xodimlari jalb qilinganligini alohida taʼkidlab oʻtdi.  Ushbu kengash faoliyati namunali yoʻlga qoʻyilsa, oilaviy ajrimlar, oiladagi notinchliklar hamda xotin-qizlar oʻrtasidagi turli salbiy holatlarning oldi olinishi qayd etildi.

Shuningdek, tuman ichki ishlar boʻlimi huquqbuzarliklar profilaktikasi xotin-qizlar masalalari boʻyicha katta inspektori, podpolkovnik Gauxar Utemuratova xotin-qizlar oʻrtasida jinoyatchilik va huquqbuzarliklarning oldini olish yuzasidan oʻz fikr-mulohazalarini bildirib oʻtdi.

Seminarlarda Ayollar maslahat kengashlari aʼzolari ishtirokida sogʻlom oilaviy munosabatlar tizimini mustahkamlash, qaynona va kelin oʻrtasida samimiy, oʻzaro hurmatga asoslangan munosabatlarni qaror toptirish maqsadida “Qaynona-kelin maʼsuliyati” nomli davra suhbatlari oʻtkazish lorzimligi qayd etilib, shu orqali jamiyatda sogʻlom, axloqiy, psixologik munosabatlarga asoslangan qaynona-kelin munosabatlari tizimi qaror topgan namunali oilalar sonini oshirish rejasi belgilab olindi. Seminarlar savol-javoblar asosida juda qiziqarli yakuniga yetdi.

Gavxar Chimboychiyeva, Ayollarni reabilitatsiya qilish va moslashtirish Qoraqalpogʻiston Respublikasi tumanlararo markazi direktori.