Фан ойлиги доирасида “Қадринг баланд бўлсин она тилим!” тадбири бўлиб ўтди

Бутун мамлакатимиздаги умумтаълим мактабларида октябрь – филология фанлари ойлиги доирасида жаҳон ва мумтоз адабиётининг забардаст ёзувчилари, шоирлари ҳамда замонавий адабиёт намоёндаларининг ҳаёти ва ижодига бағишланган адабий-мусиқий кечалар, очиқ дарслар, филология фанлари ўқитувчиларининг мактаблараро тажриба алмашувлари, ўқувчилар ўртасида заковат баҳслари ўтказилмоқда.

Ана шундай тадбирлар 65-сонли мактабда ҳам юксак савияда ташкил этилиб, унда 5-синфдан 11-синфгача барча ўқувчи-ёшлар қамраб олиниб, очиқ дарслар, заковат баҳслари орқали уларнинг билимлари синовдан ўтказилмоқда.

Жорий  йилнинг 9 октябрь куни мактабнинг она тили ва адабиёт фани ўқитувчилари Анора Казакова, Адолат Эрбоевалар фан ойлиги доирасида ҳамкорликда ташкиллаштирган “Қадринг баланд бўлсин она тилим!” мавзусидаги маънавий-маърифий тадбирда мактаб саҳнаси мумтоз ва замонавий адабиётимизнинг нодир намуналари билан безатилди.

Сўз мулкининг султони Алишер Навоий, шоҳ ва шоир Заҳириддин Муҳаммад Бобур, Фурқат, Муқимий, Машраб, Нодирабегим, Чўлпон, Фитрат, Абдулла Қодирий, Абдулла Қаҳҳор, Усмон Носир, Саид Аҳмад. Ўткир Ҳошимов, Эркин Воҳидов, Абдулла Орипов каби ўзбек халқининг севимли шоир ва адиблари ҳаёти ва ижоди ҳақида ҳикоя қилувчи кўргазмали воситалар билан  безатилди. Ўқувчилар ўзбек мумтоз ва ҳозирги замон адабиёти дурдоналаридан ўқиб бердилар.

Шунингдек, фан ойлиги доирасида бири-биридан мазмунли очиқ дарслар ташкил этилди. Тажрибали ўзбек тили ва адабиёти фани ўқитувчиси Анора Казакова томонидан 8-синфларда Мир Алишер Навоий ҳаёти ва ижодига бағишланган очиқ дарс ташкил этилди. Очиқ дарсда ҳудуддаги 11-, 18-, 24-, 47-сонли умумтаълим мактабларининг ёш ижодкор-ўқитувчилари ҳам иштирок қилдилар ва дарснинг боришини кузатишиб, ўзаро тажриба алмашдилар.

Дарс жараёнида ўқитувчи буюк мутафаккир ёзувчи, шоир, давлат ва жамоат арбоби Алишер Навоийнинг асрлар оша дунё халқлари қалбида ҳайрат ва ҳавас уйғотиб, ҳамон севиб ўқилаётган ўлмас асарлари мазмун-моҳиятини ўқувчиларга қизиқарли тарзда етказди. Дарс мазмунидан келиб чиқиб, ўқувчилар ўз таассуротларини жонли тарзда ифода этишди. Яъни, шоҳ Ҳусайн Бойқаро ва Навоий монологини таъсирли ижро қилиб бериб, синфнинг ўзида  Ҳусайн Бойқаро ва Алишер Навоий дўстлигини тараннум этувчи саҳна кўринишни намойиш қилдилар.

Ўзбек тилига давлат тили мақоми берилганига 32 йил тўлиши муносабати билан “Қадринг баланд бўлсин она тилим!” мавзусидаги маънавий-маърифий тадбир ва А.Навоий ижодий фаолиятини ўзида мужассам этган намунали очиқ дарс иштирокчилари бўлган 11-, 18-, 24-, 47-сонли умумтаълим мактабларининг ижодкор-ўқитувчиларида катта таассурот қолдирди. Ёш ижодкор-ўқитувчилар ўтказилган очиқ дарснинг тарбиявий, маънавий-маърифий аҳамияти ҳақида ўз фикрларини билдиришиб, ўзаро тажриба алмашдилар.

Фиология фанлари ойлиги доирасида ўтказилган маънавий-маърифий тадбир ва намунали очиқ дарс ўқувчи-ёшлар қалбида маънавий қадриятларга ҳурмат ва эҳтиром, она тилимизга ва адабиётга меҳр-муҳаббат туйғуларини янада мустаҳкамлади.

Робия ЙЎЛДОШЕВА.