“Аёллар дафтари”дан чиқарилган хотин-қизлар жамиятда ўз ўрнини топмоқдалар

Сўнгги йилларда мамлакатимизда аҳоли, шу жумладан, хотин-қизлар ва ёшларнинг ижтимоий ҳимояга муҳтож, турмуш шароити оғир, ишсиз ва касб-ҳунарга эга бўлмаган, ҳуқуқий ва маънавий-психологик қўллаб-қувватлашга зарурати бўлган фуқароларга давлат томонидан манзилли кўмаклашиш бўйича мутлақо янгича тизим жорий қилинди.

Бу йўналишда манзилли, ҳар бир шахс билан индивидуал ва тизимли равишда мунтазам иш олиб боришни ташкил қилиш мақсадида моддий ёрдам ва кўмакка муҳтож оилалар бўйича мутлақо янги – “Темир дафтар”, ижтимоий, иқтисодий, ҳуқуқий, психологик қўллаб-қувватлашга, билим ва касб-ҳунар ўрганишга эҳтиёжи ва иштиёқи бўлган хотин-қизлар ва ёшлар бўйича тегишлича “Аёллар дафтари” ва “Ёшлар дафтари” тизимлари ҳаётга татбиқ этилди.

Амударё туманида ёрдамга муҳтож хотин-қизларни ҳар томонлама қўллаб-қувватлаш мақсадида тузилган “Аёллар дафтари”га киритилган хотин-қизлар бандлигини таъминлаш, уларга ижтимоий ва моддий ёрдам кўрсатиш борасида самарали ишлар қилиб келинмоқда.

Айтиш керакки, туманимизда бандлиги таъминланиб, “Аёллар дафтари”дан чиқарилган, айни пайтда оиласи учун етарли даромад манбайига эга бўлаётган хотин-қизларимиз талайгина. Хусусан, Чойкўл овулида яшовчи Лайло Аҳмедовага тадбиркорлик фаолияти билан шуғулланиши ва ўз-ўзини банд қилиши учун амалий ёрдам берилиб, ижтимоий қўллаб-қувватланган. Лайло Аҳмедова 33 млн сўм кредит маблағи олиб, тадбиркорлик фаолиятини бошлаган ҳамда “Аёллар дафтари”дан чиқарилган. Айни пайтда у тикувчилик фаолияти билан шуғулланиб, зарурий моддий маблағга эга бўлмоқда. Турли мавсумга мўлжаллаб аёллар ҳамда болалар кийимларини тикмоқда ва оила иқтисодига қўшимча даромад киритмоқда.

Шунингдек, Чойкўл овулида яшовчи Саломат Ортиқова ҳамда Гулзор маҳалласида яшовчи Барно Камоловалар ҳам ижтимоий ёрдам берилиб, бандлиги таъминланган хотин-қизлардан ҳисобланади. Уларнинг ҳар иккаласига Аёллар жамғармаси ҳисобидан субсидия асосида тикув машинаси берилиб, тадбиркорлик фаолиятларини бошлашларига амалий ёрдам кўрсатилган ҳамда “Аёллар дафтари”дан чиқарилганлар. Ҳозирги кунда улар тикувчилик билан шуғулланиш орқали даромад манбайига эга бўлмоқдалар.

Олмазор маҳалласида яшовчи моддий ва ижтимоий кўмакка муҳтожлиги сабабли “Аёллар дафтари”га киритилиб, ҳар томонлама қўллаб-қувватланган Дилфуза Авезова бугун оиласига иқтисодий даромад келтираётганидан мамнун. Дилфуза Авезовага мутасаддилар томонидан 15 млн сўм кредит маблағи олишида ҳамда ўз тадбиркорлик фаолиятини бошлашида амалий ёрдам берилган ва бандлиги таъминланган. Айни пайтда у тикувчилик билан шуғулланиб, аҳоли эҳтиёжларидан келиб чиққан ҳолда кўрпа, кўрпача, тўшак ва ёстиқлар тикмоқда ҳамда ўз оиласига етарли даражада моддий маблағга эга бўлмоқда.

Ҳамюртларимиздан бири, 3-сектор ҳудудидаги Жумуртов шаҳарчасида яшовчи Райҳон Дўсчанова айни пайтда таъмирланиб, янги ҳолатга келтирилган уй-жойда яшаётганидан давлатимизда хотин-қизлар ва аёлларни ижтимоий қўллаб-қувватлашга қатарилаётган бу каби эътибордан ғоят хурсанд. 3-сектор раҳбари ҳамда масъуллари томонидан Райҳон Дўсчанованинг уй-жойи таъмирлаб берилиб, янгича кўринишга келтирилди ҳамда унга ўз-ўзини банд қилиши учун амалий ёрдам берилди.

Айтиш керакки, туманимизда саломатлик билан боғлиқ муаммолари бўлган аёлларимизга ҳар томонлама кўмак бериш борасида ҳам самарали ишлар қилинмоқда. Жумладан, “Аёллар дафтари”га киритилган Бўз ёп овулида яшовчи Замира Хайтбоеванинг невараси Севинчой Ойбекованинг юрак хасталигига чалингани сабабли, унинг Тошкент шаҳрида операция қилинишига амалий ёрдам берилди. Ҳозирда Севинчойнинг саломатлиги жойида бўлиб, бувиси Замира Хайтбоева бундан ғоят мамнун.

Овулда яшовчи Майсара Машарипова ҳам айни пайтда самарали тадбиркорлик фаолиятини йўлга қўйган хотин-қизлардан бири ҳисобланади. Унга тикувчилик билан шуғулланиши учун 12 млн сўм кредит маблағи олишида амалий ёрдам кўрсатилиб, бандлиги таъминланган ҳамда шу орқали Майсара Машарипова “Аёллар дафтари”дан чиқарилган. Айни пайтда у ҳамюртларимиз эҳтиёжларига кўра аёллар ва болалар кийимларини тикиб, оила иқтисодига қўшимча даромад киритмоқда.

Таъкидлаш керакки, туманимизда ҳар томонлама қўллаб-қувватланаётганликлари сабабли ҳаётда ва жамиятда ўз ўрнини топаётган хотин-қизларимиз сони ортиб бормоқда. Улар билан суҳбатлашар эканмиз, ўз сўзларида ўз ҳаётидан ва давлатдан рози эканликларини билдиришиб, мамлакатимизда инсон манфаатлари йўлидаги ислоҳотлар бардавом бўлишини тиладилар.

Туман ҳокимлигининг Ахборот хизмати.