“Ayollar daftari”dan chiqarilgan xotin-qizlar jamiyatda oʻz oʻrnini topmoqdalar

Soʻnggi yillarda mamlakatimizda aholi, shu jumladan, xotin-qizlar va yoshlarning ijtimoiy himoyaga muhtoj, turmush sharoiti ogʻir, ishsiz va kasb-hunarga ega boʻlmagan, huquqiy va maʼnaviy-psixologik qoʻllab-quvvatlashga zarurati boʻlgan fuqarolarga davlat tomonidan manzilli koʻmaklashish boʻyicha mutlaqo yangicha tizim joriy qilindi.

Bu yoʻnalishda manzilli, har bir shaxs bilan individual va tizimli ravishda muntazam ish olib borishni tashkil qilish maqsadida moddiy yordam va koʻmakka muhtoj oilalar boʻyicha mutlaqo yangi – “Temir daftar”, ijtimoiy, iqtisodiy, huquqiy, psixologik qoʻllab-quvvatlashga, bilim va kasb-hunar oʻrganishga ehtiyoji va ishtiyoqi boʻlgan xotin-qizlar va yoshlar boʻyicha tegishlicha “Ayollar daftari” va “Yoshlar daftari” tizimlari hayotga tatbiq etildi.

Amudaryo tumanida yordamga muhtoj xotin-qizlarni har tomonlama qoʻllab-quvvatlash maqsadida tuzilgan “Ayollar daftari”ga kiritilgan xotin-qizlar bandligini taʼminlash, ularga ijtimoiy va moddiy yordam koʻrsatish borasida samarali ishlar qilib kelinmoqda.

Aytish kerakki, tumanimizda bandligi taʼminlanib, “Ayollar daftari”dan chiqarilgan, ayni paytda oilasi uchun yetarli daromad manbayiga ega boʻlayotgan xotin-qizlarimiz talaygina. Xususan, Choykoʻl ovulida yashovchi Laylo Ahmedovaga tadbirkorlik faoliyati bilan shugʻullanishi va oʻz-oʻzini band qilishi uchun amaliy yordam berilib, ijtimoiy qoʻllab-quvvatlangan. Laylo Ahmedova 33 mln soʻm kredit mablagʻi olib, tadbirkorlik faoliyatini boshlagan hamda “Ayollar daftari”dan chiqarilgan. Ayni paytda u tikuvchilik faoliyati bilan shugʻullanib, zaruriy moddiy mablagʻga ega boʻlmoqda. Turli mavsumga moʻljallab ayollar hamda bolalar kiyimlarini tikmoqda va oila iqtisodiga qoʻshimcha daromad kiritmoqda.

Shuningdek, Choykoʻl ovulida yashovchi Salomat Ortiqova hamda Gulzor mahallasida yashovchi Barno Kamolovalar ham ijtimoiy yordam berilib, bandligi taʼminlangan xotin-qizlardan hisoblanadi. Ularning har ikkalasiga Ayollar jamgʻarmasi hisobidan subsidiya asosida tikuv mashinasi berilib, tadbirkorlik faoliyatlarini boshlashlariga amaliy yordam koʻrsatilgan hamda “Ayollar daftari”dan chiqarilganlar. Hozirgi kunda ular tikuvchilik bilan shugʻullanish orqali daromad manbayiga ega boʻlmoqdalar.

Olmazor mahallasida yashovchi moddiy va ijtimoiy koʻmakka muhtojligi sababli “Ayollar daftari”ga kiritilib, har tomonlama qoʻllab-quvvatlangan Dilfuza Avezova bugun oilasiga iqtisodiy daromad keltirayotganidan mamnun. Dilfuza Avezovaga mutasaddilar tomonidan 15 mln soʻm kredit mablagʻi olishida hamda oʻz tadbirkorlik faoliyatini boshlashida amaliy yordam berilgan va bandligi taʼminlangan. Ayni paytda u tikuvchilik bilan shugʻullanib, aholi ehtiyojlaridan kelib chiqqan holda koʻrpa, koʻrpacha, toʻshak va yostiqlar tikmoqda hamda oʻz oilasiga yetarli darajada moddiy mablagʻga ega boʻlmoqda.

Hamyurtlarimizdan biri, 3-sektor hududidagi Jumurtov shaharchasida yashovchi Rayhon Doʻschanova ayni paytda taʼmirlanib, yangi holatga keltirilgan uy-joyda yashayotganidan davlatimizda xotin-qizlar va ayollarni ijtimoiy qoʻllab-quvvatlashga qatarilayotgan bu kabi eʼtibordan gʻoyat xursand. 3-sektor rahbari hamda masʼullari tomonidan Rayhon Doʻschanovaning uy-joyi taʼmirlab berilib, yangicha koʻrinishga keltirildi hamda unga oʻz-oʻzini band qilishi uchun amaliy yordam berildi.

Aytish kerakki, tumanimizda salomatlik bilan bogʻliq muammolari boʻlgan ayollarimizga har tomonlama koʻmak berish borasida ham samarali ishlar qilinmoqda. Jumladan, “Ayollar daftari”ga kiritilgan Boʻz yop ovulida yashovchi Zamira Xaytboyevaning nevarasi Sevinchoy Oybekovaning yurak xastaligiga chalingani sababli, uning Toshkent shahrida operatsiya qilinishiga amaliy yordam berildi. Hozirda Sevinchoyning salomatligi joyida boʻlib, buvisi Zamira Xaytboyeva bundan gʻoyat mamnun.

Ovulda yashovchi Maysara Masharipova ham ayni paytda samarali tadbirkorlik faoliyatini yoʻlga qoʻygan xotin-qizlardan biri hisoblanadi. Unga tikuvchilik bilan shugʻullanishi uchun 12 mln soʻm kredit mablagʻi olishida amaliy yordam koʻrsatilib, bandligi taʼminlangan hamda shu orqali Maysara Masharipova “Ayollar daftari”dan chiqarilgan. Ayni paytda u hamyurtlarimiz ehtiyojlariga koʻra ayollar va bolalar kiyimlarini tikib, oila iqtisodiga qoʻshimcha daromad kiritmoqda.

Taʼkidlash kerakki, tumanimizda har tomonlama qoʻllab-quvvatlanayotganliklari sababli hayotda va jamiyatda oʻz oʻrnini topayotgan xotin-qizlarimiz soni ortib bormoqda. Ular bilan suhbatlashar ekanmiz, oʻz soʻzlarida oʻz hayotidan va davlatdan rozi ekanliklarini bildirishib, mamlakatimizda inson manfaatlari yoʻlidagi islohotlar bardavom boʻlishini tiladilar.

Tuman hokimligining Axborot xizmati.