O‘zLiDeP tadbirkor ayollar va yoshlarni qoʻllab-quvvatlamoqda

Bugungi kunda Oʻzbekistonning agrar salohiyatini yuksaltirish va qishloq xoʻjaligida innovatsion yondashuvlarni joriy etish davlat siyosatining eng muhim strategik yoʻnalishlaridan biriga aylandi. Ayniqsa, chekka hududlarda istiqomat qilayotgan yoshlarni zamonaviy dehqonchilik madaniyatiga oʻrgatish, ularda tadbirkorlik koʻnikmalarini shakllantirish va xotin-qizlarning iqtisodiy faolligini oshirish masalasi diqqat markazida turibdi. Bu jarayonda Tadbirkorlar va ishbilarmonlar harakati — Oʻzbekiston Liberal-demokratik partiyasi tomonidan ilgari surilayotgan xayrli tashabbuslar islohotlarning hayotiy ifodasi sifatida namoyon boʻlmoqda. Xususan, «Xalq bilan birga» umummilliy dasturi doirasidagi loyihalar joylarda yangi imkoniyatlar eshigini ochmoqda, odamlarning ertangi kunga boʻlgan ishonchini mustahkamlamoqda.

Amudaryo tumanining Tosh yop ovuli bugun ana shunday ijobiy oʻzgarishlar markaziga aylandi. Bu yerda «MANG‘IT INVEST PLYUS» masʼuliyati cheklangan jamiyati bazasida tashkil etilgan «Yosh fermerlar maktabi» loyihasi yuzlab yigit-qizlar uchun haqiqiy tajriba maydoniga aylandi. Yaqinda partiyaning hududiy va tuman Kengashlari masʼullari, deputatlar, tajribali fermerlar hamda tashabbuskor yoshlar mazkur tadbirkorlik obʼektiga tashrif buyurishdi.

Loyihaning bosh maqsadi — yosh avlodni faqat nazariy bilimlar bilan chegaralanib qolmasdan, balki qishloq xoʻjaligining ilgʻor, ilm-fanga asoslangan usullariga oʻrgatish va ularning amaliy koʻnikmalarini boyitishdan iboratdir. «Yosh fermerlar maktabi» tinglovchilari uchun oʻquv poligoni vazifasini oʻtayotgan mazkur «MANG‘IT INVEST PLYUS» korxonasining tarixi va faoliyati har qanday yosh tadbirkor uchun katta maktab boʻla oladi. Korxonaning muvaffaqiyat yoʻli 2017-yilda «Asaka Bank» tomonidan ajratilgan 477 ming AQSh dollari miqdoridagi kredit mablagʻlaridan boshlangan edi. Bu sarmoya evaziga bir gektar maydonda eng zamonaviy issiqxona majmuasi barpo etildi. Bugungi kunga kelib, ushbu issiqxona tumanning eksport salohiyatini oshirishga salmoqli hissa qoʻshib kelmoqda. Raqamlarga eʼtibor qaratadigan boʻlsak, korxona tomonidan shu kungacha qiymati 2 million AQSh dollaridan ortiq boʻlgan sarxil meva-sabzavot mahsulotlari qoʻshni Qozogʻiston va boshqa davlatlarga eksport qilindi. Bu nafaqat valyuta tushumi, balki mahalliy mahsulotning xalqaro bozordagi nufuzi demakdir.

Ayni paytda bu yerda 25 nafar mahalla aholisi doimiy ish oʻrniga ega boʻlib, ularning aksariyatini xotin-qizlar tashkil etadi. Mavsumiy ishlar paytida esa ishchilar soni bir necha barobarga ortadi. «Yosh fermerlar maktabi» ishtirokchilari issiqxonada qoʻllanilayotgan Xitoy texnologiyalari, sugʻorish va oziqlantirishning avtomatlashtirilgan tizimlari bilan tanishar ekan, yuqori hosildorlikka erishishning sirlarini bevosita amaliyotchi mutaxassislardan oʻrganmoqdalar. Bunday zamonaviy agrotexnologiyalarning afzalliklarini oʻz koʻzi bilan koʻrgan yoshlarda yerga boʻlgan munosabat tubdan oʻzgarmoqda.

Amudaryo tumanidagi islohotlar faqat yoshlar bandligi bilan cheklanib qolmay, ayollar tadbirkorligini qoʻllab-quvvatlash borasida ham yangi bosqichga koʻtarilmoqda. O‘zLiDeP tashabbusi bilan hayotga tatbiq etilayotgan «Mahallaning ishbilarmon ayoli» loyihasi xotin-qizlarning jamiyatdagi oʻrnini mustahkamlashda muhim poydevor boʻlib xizmat qilmoqda. Loyihaning bosh gʻoyasi ayollarni kichik biznes va xususiy tadbirkorlikka keng jalb etish, ularni kasb-hunarga oʻqitishdan iborat. Bu borada Toshyop ovulida istiqomat qiluvchi tikuvchi Shahodat Yusupovaning faoliyati ham tahsinga loyiq. U «ustoz-shogird» anʼanasi asosida har yili 50 nafardan ortiq mahalladosh ayollarni tikuvchilik sirlariga oʻrgatib, ularning daromad manbaiga ega boʻlishiga koʻmaklashib kelmoqda.

Bu kabi tashabbuslar zamirida bir buyuk maqsad mujassam: u ham boʻlsa, qishloq xoʻjaligida va tadbirkorlik sohasida raqobatbardosh, bilimli va zamon bilan hamnafas qadam tashlaydigan yangi avlod kadrlarini tarbiyalash. Amudaryo tumanida amalga oshirilayotgan «Yosh fermerlar maktabi» va «Mahallaning ishbilarmon ayoli» kabi loyihalar nafaqat iqtisodiy koʻrsatkichlarni yaxshilashga, balki odamlarning ijtimoiy turmush darajasini yuksaltirishga xizmat qiladi. Oʻz imkoniyatlariga ishongan yoshlar va iqtisodiy jihatdan mustaqil ayollar qatlami shakllanayotgani esa mamlakatimiz taraqqiyotining mustahkam kafolatidir. Bunday ezgu ishlarning izchil davom ettirilishi kelgusida yurtimiz dalalarida ilm-fan yutuqlarining yanada keng quloch yoyishiga va har bir xonadonda farovonlik qaror topishiga zamin yaratadi.