“КЕКСАЛАР ҲАФТАЛИГИ”ДА НУРОНИЙЛАРГА ЭҲТИРОМ КЎРСАТИЛМОҚДА

Жорий йилнинг 4-10 октябрь кунлари “Кексаларни эъзозлаш, уларга ҳурмат-эҳтиром кўрсатиш – халқимизга хос эзгу фазилат” ғояси остида мамлакатимизнинг барча ҳудудларида “Кексалар ҳафталиги” ўтказилмоқда. Навбатдаги лавҳамиз ҳафталик доирасида ўтказилган тадбирлардан бири хусусида.

6 октябрь куни “Кексалар ҳафталиги” доирасида Тўлқин овул фуқаролар йиғини биносининг очилиш маросими бўлиб ўтди. Тадбирга ҳудуддаги аҳоли, ёшлар, жамоатчилик вакиллари, нуронийлар ва меҳнат фахрийлари иштирок этдилар.

Тадбирни Амударё тумани ҳокими ўринбосари, Маҳалла ва оилани қўллаб-қувватлаш бўлими бошлиғи Алишер Юлдашев очди ва овул аҳлини ҳафталик муносабати билан муборакбод этди. Амударё туман “Нуронийлар” жамоатчилик Кенгаши раиси ўринбосари Бекман Аллаберганов, туман Маҳалла ва оилани қўллаб-қувватлаш бўлими бошлиғи ўринбосари Баходир Болтабоев, Халқ депутатлари туман Кенгаши депутати Шухрат Маткаримовлар сўзга чиқишиб, тадбир қатнашчиларини Тўлқин овул фуқаролар йиғини биносининг таъмирланиб, фойдаланишга топширилиши ва байрам муносабати билан табрикладилар.

Тадбир давомида ҳудудда яшовчи кекса авлод вакилларининг давлат ва жамият ҳаётидаги ижтимоий фаоллигини ошириш, маҳаллаларда тинчлик ва осойишталикни таъминлаш, оилаларда маънавий муҳитни соғломлаштириш, ўсиб келаётган ёш авлодни тарбиялаш йўлидаги фаол иштироки учун Еримбат Жуманиёзов, Нишонбой Абдуллаев, Бахтиёр Жумабековларга ташаккурномалар берилди.

Шундан сўнг овул имомлари Нишонбой Абдуллаев, Гулмирза Қодиров ҳамда маҳалла фаоли Тўлибой Йўлдошевлар туманимизда амалга оширилаётган ислоҳотлар, маҳалла ҳудудида олиб борилаётган самарали ишлар тўғрисида гапириб, Тўлқин овул фуқаролар йиғини биносининг таъмирлангани ва фойдаланишга топширилгани билан барчани муборакбод этдилар.

Тадбирда 31-сонли мактабгача таълим муассасаси тарбияланувчилари ма Чойкўл маданият уйи ходимлари томонидан куй-қўшиқлар, рақслар ва ижро этилиб, тадбирга байрамона руҳ бағишлади.

Шунингдек, “Гулмон уйчи бобо” ресторанида меҳмонларга байрам дастурхони ёзилиб, бир пиёла чой устида ширин суҳбатлар давом этди.

Тадбир сўнггида Баходир Болтабоев, Бекман Аллаберганов, Шуҳрат Маткаримов ҳамда Тўлқин овул фуқаролар йиғини раиси Рашид Абдигалиевлар ҳудудда яшовчи нуронийлар, хусусан,  фронт орти фахрийси Абдураим ота Абдурахмонов, Жабборберган ота Ибрагимов, Бекберган ота Эшмуродов, Жангил она Эшчанова, Бибиҳожар она Хўжаметова, Холбой ота Худойбергановлар хонадонида меҳмон бўлиб, “Кексалар ҳафталиги” муносабати билан уларнинг ҳолидан хабар олишди ва  ширин суҳбатларидан баҳраманд бўлдилар.

Шу куни Қиличбой овул фуқаролар йиғини ҳудудидаги “Сурож” тўйхонасида  ҳам “Кексалар ҳафталиги” доирасида “Бир пиёла чой устида ширин суҳбатлар”, “Дийдор ширин” мавзуларида ҳудуддаги отахонлар ва онахонлар билан давра суҳбатлари ташкил этилиб, уларнинг жамият, оилалар ва маҳаллаларда тинчлик ва осойишталикни таъминлаш, шунингдек ёш авлодни халқимизнинг кўп асрлик анъаналарига ҳурмат руҳида тарбиялаш ишидаги ролини оширишга қаратилган “Эҳтиром, эъзоз, эътибор” деб номланган байрамона мусиқий кеча ўтказилди.

Унда нуронийлар бир пиёла чой устида суҳбат қуриб, тадбир давомида янграган куй-қўшиқлардан баҳраманд бўлдилар.

Тадбирни Амударё туман “Нуронийлар” жамоатчилик Кенгаши раиси ўринбосари Бекман Аллаберганов очди ва ҳудуд аҳлини ҳафталик муносабати билан муборакбод этди.

Шундан сўнг Қиличбой овули ҳудудида яшовчи Мадрим ота Холимбетов ва Йўлдош ота Жумамуратовлар нуронийларга кўрсатилаётган ҳурмат-эҳтиром ва эътибор учун миннатдорчилик билдирдилар ва овулдошларини байрам муносабати билан табрикладилар. Тадбир давомида нуронийларга мароқли концерт дастури тақдим этилди. Қиличбой маданият уйи ходимлари томонидан куй-қўшиқлар, рақслар ижро этилди.

Тадбир якунида Маҳалла ва оилани қўллаб-қувватлаш бўлими бошлиғининг ўринбосари Баходир Болтабоев, Бекман Аллаберганов ҳамда Қиличбой овул фуқаролар йиғини раиси Бахром Кодиров, “Келажак лидерлари” клуби аъзоси Нодира Йўлдошевалар ҳудудда яшовчи 85 ёшни қаршилаган Энажон момо Юлдашева ва Хизр эли маҳалласи ҳудудида яшовчи 106 ёшни қаршилаган Парда момо Бекниязовалар хонадонида меҳмон бўлишиб, “Кексалар ҳафталиги” билан онахонларни қутладилар.

Муяссар ХАЛИЛЛАЕВА.