“KEKSALAR HAFTALIGI”DA NURONIYLARGA EHTIROM KOʻRSATILMOQDA

Joriy yilning 4-10-oktyabr kunlari “Keksalarni eʼzozlash, ularga hurmat-ehtirom koʻrsatish – xalqimizga xos ezgu fazilat” gʻoyasi ostida mamlakatimizning barcha hududlarida “Keksalar haftaligi” oʻtkazilmoqda. Navbatdagi lavhamiz haftalik doirasida oʻtkazilgan tadbirlardan biri xususida.

6-oktyabr kuni “Keksalar haftaligi” doirasida Toʻlqin ovul fuqarolar yigʻini binosining ochilish marosimi boʻlib oʻtdi. Tadbirga hududdagi aholi, yoshlar, jamoatchilik vakillari, nuroniylar va mehnat faxriylari ishtirok etdilar.

Tadbirni Amudaryo tumani hokimi oʻrinbosari, Mahalla va oilani qoʻllab-quvvatlash boʻlimi boshligʻi Alisher Yuldashev ochdi va ovul ahlini haftalik munosabati bilan muborakbod etdi. Amudaryo tuman “Nuroniylar” jamoatchilik Kengashi raisi oʻrinbosari Bekman Allaberganov, tuman Mahalla va oilani qoʻllab-quvvatlash boʻlimi boshligʻi oʻrinbosari Baxodir Boltaboyev, Xalq deputatlari tuman Kengashi deputati Shuxrat Matkarimovlar soʻzga chiqishib, tadbir qatnashchilarini Toʻlqin ovul fuqarolar yigʻini binosining taʼmirlanib, foydalanishga topshirilishi va bayram munosabati bilan tabrikladilar.

Tadbir davomida hududda yashovchi keksa avlod vakillarining davlat va jamiyat hayotidagi ijtimoiy faolligini oshirish, mahallalarda tinchlik va osoyishtalikni taʼminlash, oilalarda maʼnaviy muhitni sogʻlomlashtirish, oʻsib kelayotgan yosh avlodni tarbiyalash yoʻlidagi faol ishtiroki uchun Yerimbat Jumaniyozov, Nishonboy Abdullayev, Baxtiyor Jumabekovlarga tashakkurnomalar berildi.

Shundan soʻng ovul imomlari Nishonboy Abdullayev, Gulmirza Qodirov hamda mahalla faoli Toʻliboy Yoʻldoshevlar tumanimizda amalga oshirilayotgan islohotlar, mahalla hududida olib borilayotgan samarali ishlar toʻgʻrisida gapirib, Toʻlqin ovul fuqarolar yigʻini binosining taʼmirlangani va foydalanishga topshirilgani bilan barchani muborakbod etdilar.

Tadbirda 31-sonli maktabgacha taʼlim muassasasi tarbiyalanuvchilari ma Choykoʻl madaniyat uyi xodimlari tomonidan kuy-qoʻshiqlar, raqslar va ijro etilib, tadbirga bayramona ruh bagʻishladi.

Shuningdek, “Gulmon uychi bobo” restoranida mehmonlarga bayram dasturxoni yozilib, bir piyola choy ustida shirin suhbatlar davom etdi.

Tadbir soʻnggida Baxodir Boltaboyev, Bekman Allaberganov, Shuhrat Matkarimov hamda Toʻlqin ovul fuqarolar yigʻini raisi Rashid Abdigaliyevlar hududda yashovchi nuroniylar, xususan,  front orti faxriysi Abduraim ota Abduraxmonov, Jabborbergan ota Ibragimov, Bekbergan ota Eshmurodov, Jangil ona Eshchanova, Bibihojar ona Xoʻjametova, Xolboy ota Xudoyberganovlar xonadonida mehmon boʻlib, “Keksalar haftaligi” munosabati bilan ularning holidan xabar olishdi va  shirin suhbatlaridan bahramand boʻldilar.

Shu kuni Qilichboy ovul fuqarolar yigʻini hududidagi “Suroj” toʻyxonasida  ham “Keksalar haftaligi” doirasida “Bir piyola choy ustida shirin suhbatlar”, “Diydor shirin” mavzularida hududdagi otaxonlar va onaxonlar bilan davra suhbatlari tashkil etilib, ularning jamiyat, oilalar va mahallalarda tinchlik va osoyishtalikni taʼminlash, shuningdek yosh avlodni xalqimizning koʻp asrlik anʼanalariga hurmat ruhida tarbiyalash ishidagi rolini oshirishga qaratilgan “Ehtirom, eʼzoz, eʼtibor” deb nomlangan bayramona musiqiy kecha oʻtkazildi.

Unda nuroniylar bir piyola choy ustida suhbat qurib, tadbir davomida yangragan kuy-qoʻshiqlardan bahramand boʻldilar.

Tadbirni Amudaryo tuman “Nuroniylar” jamoatchilik Kengashi raisi oʻrinbosari Bekman Allaberganov ochdi va hudud ahlini haftalik munosabati bilan muborakbod etdi.

Shundan soʻng Qilichboy ovuli hududida yashovchi Madrim ota Xolimbetov va Yoʻldosh ota Jumamuratovlar nuroniylarga koʻrsatilayotgan hurmat-ehtirom va eʼtibor uchun minnatdorchilik bildirdilar va ovuldoshlarini bayram munosabati bilan tabrikladilar. Tadbir davomida nuroniylarga maroqli kontsert dasturi taqdim etildi. Qilichboy madaniyat uyi xodimlari tomonidan kuy-qoʻshiqlar, raqslar ijro etildi.

Tadbir yakunida Mahalla va oilani qoʻllab-quvvatlash boʻlimi boshligʻining oʻrinbosari Baxodir Boltaboyev, Bekman Allaberganov hamda Qilichboy ovul fuqarolar yigʻini raisi Baxrom Kodirov, “Kelajak liderlari” klubi aʼzosi Nodira Yoʻldoshevalar hududda yashovchi 85 yoshni qarshilagan Enajon momo Yuldasheva va Xizr eli mahallasi hududida yashovchi 106 yoshni qarshilagan Parda momo Bekniyazovalar xonadonida mehmon boʻlishib, “Keksalar haftaligi” bilan onaxonlarni qutladilar.

Muyassar XALILLAYeVA.