ПРЕЗИДЕНТЛИККА НОМЗОД ШАВКАТ МИРЗИЁЕВНИНГ ИШОНЧЛИ ВАКИЛИ АБАТБАЙ ДАНИЯРОВ ИШТИРОКИДА ТАРҒИБОТ ТАДБИРИ БЎЛИБ ЎТДИ

Айни кунларда бутун мамлакатимиз бўйлаб, яқинлашиб қолган Ўзбекистон Республикаси Президенти сайловига тайёргарлик ишлари қизғин тусга кирди. Жойларда Ўзбекистон Республикаси Президентлигига номзодлар ҳамда уларнинг ишончли вакилларининг сайловчилар билан учрашувлари ўтказилиб, номзодларнинг сайловолди дастурлари юзасидан тарғибот-ташвиқот тадбирлари янада жонлантирилмоқда.
29 сентябрь куни Ўзбекистон Республикаси Президентлигига Тадбиркорлар ва ишбилармонлар ҳаракати – Ўзбекистон либерал демократик партиясидан номзод Шавкат Мирзиёевнинг Қорақалпоғистон Республикасидаги ишончли вакили, Олий Мажлис Сенати аъзоси, Ўзбекистон Республикаси Ёшлар ишлари агентлиги Қорақалпоғистон Республикаси бошқармаси бошлиғи Абатбай Данияров Амударё туманидаги сайловчилар билан учрашди.
Туман ҳокимлигининг мажлислар залида ўтказилган мазкур учрашувда депутатлар, партиянинг Қорақалпоғистон Республикаси ва туман Кенгаши масъуллари, бошланғич партия ташкилоти аъзолари, кўпчилик қисми аёллар ва ёшлардан иборат бўлган сайловчилар, овул ва маҳалла фуқаролар йиғинлари масъуллари ҳамда оммавий ахборот воситалари вакиллари иштирок этдилар.

Ўзбекистон Республикаси Президентлигига номзод Шавкат Мирзиёевнинг Қорақалпоғистондаги ишончли вакили Абатбай Даниёров сайловчиларга номзоднинг таржимаи ҳоли ҳамда сайловолди дастурини ўқиб эшиттирди.
Қайд этилишича, номзоднинг “Янги Ўзбекистон – инсон қадри устувор бўлган халқпарвар давлатдир” шиори остида илгари сурилаётган сайловолди дастурида ўнта йўналишда туб ислоҳотлар амалга оширилиши кўзда тутилган Янги Ўзбекистон стратегияси ишлаб чиқилган ҳамда унда янги тараққиёт даврида амалга оширилиши кўзланаётган устувор вазифалар кўрсатилган.

Хусусан, сайловолди дастурининг илм ва инновацияларга асосланган янги иқтисодиётни барпо этиш йўналишида келгуси 5 йилда аҳоли жон бошига ялпи ички маҳсулотни 1,6 баробар ошириш, 2030 йилга қадар Ўзбекистонни “даромади ўртачадан юқори бўлган давлатлар” қаторига киритишга пухта замин яратиш борасида қатор вазифалар белгиланган.
Шунингдек, дастурнинг “Фаол тадбиркорлик ва манзилли молиявий кўмак – камбағалликни қисқартиришнинг муҳим омили” дея номланган йўналишида мамлакатимизда 2026 йил якунига қадар камбағалликни камида 2 баробар қисқартириш энг муҳим вазифалар эканлиги ҳамда бу борада амалга оширилиши кўзда тутилган чора-тадбирлар кўрсатилган.

Шу билан бирга сайловолди дастурида қишлоқ хўжалигида самарадорликни ошириш борасида туб ислоҳотлар белгиланган бўлиб, қишлоқ хўжалигини интенсив ривожлантириш орқали деҳқон ва фермерлар даромадларини камида икки баробар оширишга, қишлоқ хўжалигининг йиллик ўсиш суръатларини камида 5 фоизга етказишга алоҳида эътибор қаратилиши кўзланган.
Ўзбекистон Республикаси Президентлигига номзод Шавкат Мирзиёевнинг Қорақалпоғистондаги ишончли вакили Абатбай Даниёров шу каби турли соҳаларда амалга оширилиши кўзланган устувор вазифалар белгиланган сайловолди дастурини ўқиб эшиттирганидан сўнг, сайловчилар томонидан турли йўналишларда берилган саволларга жавоблар қайтарди.

Мадамин Казаков, O'zLiDeP туман Кенгаши раиси.