PREZIDENTLIKKA NOMZOD ShAVKAT MIRZIYoYeVNING IShONChLI VAKILI ABATBAY DANIYaROV IShTIROKIDA TARGʻIBOT TADBIRI BOʻLIB OʻTDI

Ayni kunlarda butun mamlakatimiz boʻylab, yaqinlashib qolgan Oʻzbekiston Respublikasi Prezidenti sayloviga tayyorgarlik ishlari qizgʻin tusga kirdi. Joylarda Oʻzbekiston Respublikasi Prezidentligiga nomzodlar hamda ularning ishonchli vakillarining saylovchilar bilan uchrashuvlari oʻtkazilib, nomzodlarning saylovoldi dasturlari yuzasidan targʻibot-tashviqot tadbirlari yanada jonlantirilmoqda.
29-sentyabr kuni Oʻzbekiston Respublikasi Prezidentligiga Tadbirkorlar va ishbilarmonlar harakati – Oʻzbekiston liberal demokratik partiyasidan nomzod Shavkat Mirziyoyevning Qoraqalpogʻiston Respublikasidagi ishonchli vakili, Oliy Majlis Senati aʼzosi, Oʻzbekiston Respublikasi Yoshlar ishlari agentligi Qoraqalpogʻiston Respublikasi boshqarmasi boshligʻi Abatbay Daniyarov Amudaryo tumanidagi saylovchilar bilan uchrashdi.
Tuman hokimligining majlislar zalida oʻtkazilgan mazkur uchrashuvda deputatlar, partiyaning Qoraqalpogʻiston Respublikasi va tuman Kengashi masʼullari, boshlangʻich partiya tashkiloti aʼzolari, koʻpchilik qismi ayollar va yoshlardan iborat boʻlgan saylovchilar, ovul va mahalla fuqarolar yigʻinlari masʼullari hamda ommaviy axborot vositalari vakillari ishtirok etdilar.

Oʻzbekiston Respublikasi Prezidentligiga nomzod Shavkat Mirziyoyevning Qoraqalpogʻistondagi ishonchli vakili Abatbay Daniyorov saylovchilarga nomzodning tarjimai holi hamda saylovoldi dasturini oʻqib eshittirdi.
Qayd etilishicha, nomzodning “Yangi Oʻzbekiston – inson qadri ustuvor boʻlgan xalqparvar davlatdir” shiori ostida ilgari surilayotgan saylovoldi dasturida oʻnta yoʻnalishda tub islohotlar amalga oshirilishi koʻzda tutilgan Yangi Oʻzbekiston strategiyasi ishlab chiqilgan hamda unda yangi taraqqiyot davrida amalga oshirilishi koʻzlanayotgan ustuvor vazifalar koʻrsatilgan.

Xususan, saylovoldi dasturining ilm va innovatsiyalarga asoslangan yangi iqtisodiyotni barpo etish yoʻnalishida kelgusi 5-yilda aholi jon boshiga yalpi ichki mahsulotni 1,6 barobar oshirish, 2030-yilga qadar Oʻzbekistonni “daromadi oʻrtachadan yuqori boʻlgan davlatlar” qatoriga kiritishga puxta zamin yaratish borasida qator vazifalar belgilangan.
Shuningdek, dasturning “Faol tadbirkorlik va manzilli moliyaviy koʻmak – kambagʻallikni qisqartirishning muhim omili” deya nomlangan yoʻnalishida mamlakatimizda 2026-yil yakuniga qadar kambagʻallikni kamida 2 barobar qisqartirish eng muhim vazifalar ekanligi hamda bu borada amalga oshirilishi koʻzda tutilgan chora-tadbirlar koʻrsatilgan.

Shu bilan birga saylovoldi dasturida qishloq xoʻjaligida samaradorlikni oshirish borasida tub islohotlar belgilangan boʻlib, qishloq xoʻjaligini intensiv rivojlantirish orqali dehqon va fermerlar daromadlarini kamida ikki barobar oshirishga, qishloq xoʻjaligining yillik oʻsish surʼatlarini kamida 5 foizga yetkazishga alohida eʼtibor qaratilishi koʻzlangan.
Oʻzbekiston Respublikasi Prezidentligiga nomzod Shavkat Mirziyoyevning Qoraqalpogʻistondagi ishonchli vakili Abatbay Daniyorov shu kabi turli sohalarda amalga oshirilishi koʻzlangan ustuvor vazifalar belgilangan saylovoldi dasturini oʻqib eshittirganidan soʻng, saylovchilar tomonidan turli yoʻnalishlarda berilgan savollarga javoblar qaytardi.

Madamin Kazakov, O'zLiDeP tuman Kengashi raisi.