ЮРТ КEЛАЖАГИНИНГ ИШОНЧЛИ ПОСБОНЛАРИ

Амударё туманида ёш авлод қалбида ватанпарварлик туйғуларини мустаҳкамлаш, уларни она Ватанга садоқат ва юксак масъулият руҳида тарбиялашга қаратилган муҳим тадбир бўлиб ўтди. Туман Хотира майдонида “Ватан таянчи” отрядлари аъзоларининг тантанали ваъда бериш маросими ташкил этилди.

Тадбир давомида “Ватан таянчи” ҳаракати сафига қўшилган ёшларга махсус кўкрак нишонлари ва гувоҳномалар топширилди. Бу рамзий эътироф ўқувчи-ёшларнинг Ватан равнақи йўлида муносиб ҳисса қўшишга бўлган интилиши, ўз олдига юксак мақсадлар қўйиши ҳамда эл-юрт манфаатларига садоқат билан хизмат қилишга тайёрлигининг рамзий ифодаси бўлди.

Тантанали маросимда туман Мудофаа бўлими бошлиғи Шуҳрат Маматов ҳамда туман Мактабгача ва мактаб таълими бўлими бошлиғи Ялғаш Шомуратов сўзга чиқиб, “Ватан таянчи” ҳаракатининг ёшлар тарбиясидаги ўрни ва аҳамияти ҳақида фикр билдирдилар. Улар Ватанга хизмат қилиш энг улуғ шарафлардан бири эканини таъкидлаб, ёшларни миллий қадриятларга ҳурмат, мустаҳкам ирода, юксак маънавият ва фидойилик руҳида камол топтириш муҳимлигини қайд этдилар.

Шунингдек, отряд аъзоларига ўқишда, жамоат ишларида ва кундалик ҳаётда тенгдошларига намуна бўлиш, билим олишга интилиш ҳамда она юрт тақдирига дахлдорлик ҳисси билан яшаш борасида тилаклар билдирилди.

Тадбирнинг бадиий ва амалий қисми ҳам мазмунли ўтди. Унда намойиш этилган турли ҳарбий чиқишлар ёшларда катта таассурот уйғотиб, ҳарбий хизматга бўлган қизиқишларини янада оширди.

Ўзбекистон Республикаси Президентининг 2022 йил 2 мартдаги 150-сонли қарори асосида ташкил этилган “Ватан таянчи” ҳаракатининг асосий вазифаларидан бири ўқувчи-ёшларни Ватан тақдирига дахлдорлик, маънавий-ахлоқий фазилатлар, миллий қадриятларга эҳтиром ва қонунларга ҳурмат руҳида тарбиялашдан иборат.

Амударё туманида ҳам мазкур йўналишда тизимли ишлар олиб борилмоқда. Бугунги кунда тумандаги умумтаълим мактаблари, ихтисослаштирилган мактаб ва техникумларда жами 86 та “Ватан таянчи” ҳаракати отряди фаолияти йўлга қўйилган. Ҳар бир отряд 20 нафардан намунали хулқи, яхши ўзлаштириши ва жамоат ишларидаги фаоллиги билан ажралиб турадиган ўқувчи-ёшларни бирлаштиради. Айни пайтда жами 1 667 нафар ўқувчи-ёш ушбу ҳаракат сафига ихтиёрий равишда аъзо бўлган.

Хотира майдонида ўтказилган тантанали ваъда бериш маросими ёшларнинг қалбида Ватанга муҳаббат, аждодлар меросига ҳурмат ва юрт келажагига дахлдорлик туйғуларини мустаҳкамлашга хизмат қилди.

“Ватан таянчи” ҳаракати аъзолари учун яратилаётган имкониятлар ҳам ёшларни янада юқори марралар сари руҳлантиради. Амалдаги тартибга мувофиқ, ҳар бир отряддан энг илғор ва аълочи бир нафар аъзога олий ҳарбий ва ҳарбийлаштирилган таълим муассасаларига ўқишга киришда тўплаган балларининг 5 фоизи миқдорида қўшимча балл берилади. Бу эса ўз устида мунтазам ишлайдиган, билим ва интизомни ҳаётий мезон деб биладиган ёшлар учун муҳим рағбатдир.

Амударё туманида ҳам ушбу имкониятдан фойдаланган битирувчилар бор. Жумладан, “Ватан таянчи” ҳаракати отрядлари аъзолари бўлган икки нафар битирувчидан бири Фавқулодда вазиятлар вазирлиги академиясида, яна бири Жамоат хавфсизлиги университетида таҳсил олмоқда. Уларнинг ютуғи бошқа ёшлар учун ҳам ибрат ва рағбат манбаи бўлиб хизмат қилади.

“Ватанга садоқат билан, юксак мақсадларга!” шиори остида бирлашган Амударё тумани ёшлари — юртимизнинг тинчлиги, тараққиёти ва фаровон келажагига муносиб ҳисса қўшишга интилаётган авлоддир. Улар қалбидаги Ватан муҳаббати, кўзлаган эзгу мақсадлари ва қатъий иродаси билан келажагимизнинг ишончли таянчи бўлиб камол топмоқда.

Чарос Арслонова, туман ҳокимлигининг Ахборот хизмати раҳбари.