ҲАЙДОВЧИЛИК КУРСИДА ЎҚИЁТГАН 50 НАФАР ЁШГА ТЎЛОВ МАБЛАҒИНИНГ 75 ФОИЗИ ҚОПЛАБ БЕРИЛДИ

Юртимизда ёшларни қўллаб-қувватлаш, уларнинг ҳаётдан ўз ўринларини топишларига яқиндан кўмак бериш мақсадида турли чора-тадбирлар амалга оширилмоқда. Бу борадаги самарадорликни ошириш мақсадида Президент Фармонлари, ҳукумат қарорлари қабул қилиниб, ижроси таъминланишига алоҳида эътибор қаратилмоқда.

Ўзбекистон Республикаси Вазирлар Маҳкамасининг 2021 йил 28 апрель кунги қарори ҳам шулар жумласидандир. Мазкур қарор билан “Ёшлар дафтари”га киритилган ёшларни тадбиркорлик, касб-ҳунар, ҳайдовчилик ва қайта тайёрлов курсларида ўқитиш харажатларининг 75 фоизигача қисми “Ёшлар дафтари” жамғармаси маблағлари ҳисобидан қоплаб берилиши белгилаб қўйилган. Шунга кўра рўйхатдаги ёшларнинг тадбиркорликка ўқитиш харажатлари базавий ҳисоблаш миқдорининг 4 бараваридан ортиқ бўлмаган қисми, касб-ҳунарга ва ҳайдовчилик курсларида ўқитиш учун сарфланган харажатларнинг бир ойдан икки ойгача, икки ойдан ортиқ муддатли ўқув курслари учун тегишли миқдори қоплаб берилади.

Амударё туманида ҳам мазкур қарор ижросини таъминлаш мақсадида “Ёшлар дафтари”га киритилган ёшлар ўқув курсларига жалб этилиб, турли касб-ҳунарга ўқитилмоқда. Ўқув курсларини муваффақиятли тугатган ва сертификат олган ёшларга базавий ҳисоблаш миқдорининг 25 бараваридан кўп бўлмаган миқдорда истеъмол кредитлари ажратилишига кўмаклашилмоқда. Уюшмаган ёшларнинг маънавий дунёқарашини шакллантириш, шу жумладан уларни хорижий тиллар, компьютер саводхонлиги, спорт, маданият ва китобхонлик тўгаракларига жалб қилиш чоралари кўрилмоқда.

Ҳозирги кунда тумандаги Мудофаага кўмаклашувчи “Ватанпарвар” ташкилоти томонидан ташкил этилган ўқув курсларида ҳайдовчилик гувоҳномасини олишга ўқиётган 50 нафар ёшлар учун тўлов маблағининг 75 фоизи, яъни 78 млн. 750 минг сўм маблағ Ҳукуматнинг 2021 йил 11 мартдаги “Ёшларни ижтимоий қўллаб-қувватлаш бўйича қўшимча чора-тадбирлар тўғрсида”ги қарори асосида “Ёшлар жамғармаси” ҳисобидан қоплаб берилмоқда. 

Ўқув-спорт техника клубида “В” ва “ВС” тоифали ҳайдовчилар тайёрлаш, 30 соатлик қайта тайёрлаш бўйича фаолият ташкил этилган. Клуб ўқув хоналари замонавий ўқитиш воситалари, компьютерлар, интерактив доскалар билан жиҳозланган. Машғулотлар 4 нафар олий маълумотли мутахассис ўқитувчилар томонидан олиб борилади.

Амалий бошқаришни ўргатиш учун ташкилотда 3 та нексия, кобальт, 4 та спарк, 3 та матиз, 2 та дамас, 4 та ГАЗ 52, 1 та ГАЗ 53 ва “Исузу” русумли автомобиллар мавжуд. Ушбу техникалар ёрдамида амалий машғулотлар ўтказилади. Ўқув-спорт техника клубида меҳнат бозорида талаб катта бўлаётган автоэлектрик, газ ва электр пайвандчиси, аккумуляторчи, двигателларни таъмирловчи уста ва тракторчи йўналишлари бўйича курслар ташкил этиш мақсадида хоналар зарур воситалар билан жиҳозланди.

Ҳайдовчилик гувоҳномасини олишга ўқиётган ёшлар ўзларининг касб эгаллашларига кўмаклашган, тўлов маблағининг 75 фоизини “Ёшлар жамғармаси” ҳисобидан қоплаб берган давлатимизга, масъулларга катта миннатдорчилик билдиришди.

О. Худойберганова.