УМУМХАЛҚ ХАЙРИЯ ҲАШАРИ ТУМАНИМИЗДА УЮШҚОҚЛИК БИЛАН АМАЛГА ОШИРИЛДИ

Саранжом-саришталик, ободлик ва тозалик юртга ўзгача файз, тароват бахш этади. Бунда халқимизнинг йиллар давомида шаклланган эзгу қадрияти – ҳашар муҳим ўрин тутади. Шу боис умумхалқ байрамлари арафасида бутун эл иштирокида умумхалқ ҳашарлари ташкил этилади.
Жорий йилнинг 21 август санаси мамлакатимизда умумхалқ хайрия ҳашари дея эълон қилиниб, юртимиз бўйлаб барча ҳудудларда ободонлаштириш ва тозалик ишлари амалга оширилди. “Янги Ўзбекистонда эркин ва фаровон яшайлик” шиори остида ўтказилган хайрия ҳашарида аҳолининг барча қатламлари иштирок этиб, юртимиз ободлиги ва фаровонлигига ўз ҳиссаларини қўшдилар.
Мамлакатимизда аҳоли ўртасида соғлом турмуш тарзини тарғиб қилиш, юртимиз бўйлаб, коронавирус пандемияси тарқалишининг олдини олиш ҳамда аҳолининг ижтимоий ҳимояга муҳтож қатламларини қўллаб-қувватлаш мақсадида жорий йилнинг август ойи “Маҳаллаларни  ободонлаштириш” ойлиги этиб белгиланиб, бу борада тизимли ишлар қилинмоқда. Шу асосда юртимиздаги барча маҳаллаларда хонадонларни, кўчаларни, йўл бўйларини ободонлаштириш, тозалаш каби ҳашар ишлари ташкил этилмоқда.
Амударё туманида ҳам “Маҳаллаларни ободонлаштириш” ойлигида самарали ишлар ташкил қилиниб, ободонлаштириш хайрия ҳашари уюшқоқлик билан амалга оширилди. Туманимизда ташкил этилган хайрия ҳашари доирасида маҳаллалар, аҳоли яшаш хонадонлари, кўп қаватли уйлар атрофлари, гузар ва хиёбонлар, зиёратгоҳ ва қабристонлар, кўча ва болалар майдончаларида кенг ободонлаштириш ва кўкаламзорлаштириш ишлари олиб борилди.
Шунингдек, ободонлаштириш хайрия ҳашари доирасида туманимиздаги ёрдамга муҳтож, боқувчисини йўқотган оилалар, ёлғиз яшовчи ҳамда ногиронлиги мавжуд фуқаролар, кексалар ҳолидан хабар олиниб, уларнинг яшаш шароитлари яхшиланиб, уй-жойларини таъмирлашга кўмаклашилди. Маҳалла фаоллари бошчилигида эҳтиёжманд кишиларнинг таъмирталаб ҳолга келиб қолган уй-жойларини таъмирлаш ишлари олиб борилди, уйлари оҳаклаб берилди.
Улуғ айём кунлари арафасида амалга оширилган бу каби хайрли ишлар халқимизнинг энг эзгу анъаналаридан бирига айланган. Кўнгли ўксик ҳамюртларимиз бу каби савоб амалларидан ғоят хурсанд бўлдилар ҳамда масъулларга миннатдорчилик билдирдилар.
Юртимиз бўйлаб тобора яқинлашаётган энг улуғ ва энг азиз байрам –мустақиллигимизнинг 30 йиллиги айёмини муносиб нишонлашга тайёргарлик кўриш мақсадида амалга оширилган ободонлаштириш хайрия ҳашарида туманимиздаги муассаса, корхона-ташкилотлар ходимлари ҳам фаол иштирок этдилар. Ўзлари фаолият юритаётган ташкилот биноси атрофларини тозалаб, сувлар сепдилар. Бинолар ҳовлисида экилган дарахтларни оқлаб, қуриган шохларини кесдилар.
Айтиш керакки, халқимизнинг азалий қадриятларидан бирига айланган ҳашар тадбири барчани бирдамликка, аҳилликка ва меҳр-оқибатга ундайди. Мазкур тадбирда ёш-у қари бир ёқадан бош чиқариб, бир-бирларига беғараз ёрдам кўрсатиб, ўз уйи, маҳалласи, иш жойини тоза, озода сақлашга ва обод бўлишига ҳисса қўшадилар. Айниқса, улуғ айём кунларида, байрамлар арафасида бу анъананинг давом этиши, одамлардаги байрамона кайфият ва кўтаринкиликни янада кучайтиради.
Мустақиллигимизнинг 30 йиллигини муносиб нишонлашга тайёргарлик кўрилаётган айни пайтда юртдошларимиз мазкур ободонлаштириш хайрия ҳашарида катта завқ ва иштиёқ, ўзгача ғайрат билан иштирок этдилар.

 Туман ҳокимлигининг Ахробот хизмати.