UMUMXALQ XAYRIYa HAShARI TUMANIMIZDA UYuShQOQLIK BILAN AMALGA OShIRILDI

Saranjom-sarishtalik, obodlik va tozalik yurtga oʻzgacha fayz, tarovat baxsh etadi. Bunda xalqimizning yillar davomida shakllangan ezgu qadriyati – hashar muhim oʻrin tutadi. Shu bois umumxalq bayramlari arafasida butun el ishtirokida umumxalq hasharlari tashkil etiladi.
Joriy yilning 21-avgust sanasi mamlakatimizda umumxalq xayriya hashari deya eʼlon qilinib, yurtimiz boʻylab barcha hududlarda obodonlashtirish va tozalik ishlari amalga oshirildi. “Yangi Oʻzbekistonda erkin va farovon yashaylik” shiori ostida oʻtkazilgan xayriya hasharida aholining barcha qatlamlari ishtirok etib, yurtimiz obodligi va farovonligiga oʻz hissalarini qoʻshdilar.
Mamlakatimizda aholi oʻrtasida sogʻlom turmush tarzini targʻib qilish, yurtimiz boʻylab, koronavirus pandemiyasi tarqalishining oldini olish hamda aholining ijtimoiy himoyaga muhtoj qatlamlarini qoʻllab-quvvatlash maqsadida joriy yilning avgust oyi “Mahallalarni  obodonlashtirish” oyligi etib belgilanib, bu borada tizimli ishlar qilinmoqda. Shu asosda yurtimizdagi barcha mahallalarda xonadonlarni, koʻchalarni, yoʻl boʻylarini obodonlashtirish, tozalash kabi hashar ishlari tashkil etilmoqda.
Amudaryo tumanida ham “Mahallalarni obodonlashtirish” oyligida samarali ishlar tashkil qilinib, obodonlashtirish xayriya hashari uyushqoqlik bilan amalga oshirildi. Tumanimizda tashkil etilgan xayriya hashari doirasida mahallalar, aholi yashash xonadonlari, koʻp qavatli uylar atroflari, guzar va xiyobonlar, ziyoratgoh va qabristonlar, koʻcha va bolalar maydonchalarida keng obodonlashtirish va koʻkalamzorlashtirish ishlari olib borildi.
Shuningdek, obodonlashtirish xayriya hashari doirasida tumanimizdagi yordamga muhtoj, boquvchisini yoʻqotgan oilalar, yolgʻiz yashovchi hamda nogironligi mavjud fuqarolar, keksalar holidan xabar olinib, ularning yashash sharoitlari yaxshilanib, uy-joylarini taʼmirlashga koʻmaklashildi. Mahalla faollari boshchiligida ehtiyojmand kishilarning taʼmirtalab holga kelib qolgan uy-joylarini taʼmirlash ishlari olib borildi, uylari ohaklab berildi.
Ulugʻ ayyom kunlari arafasida amalga oshirilgan bu kabi xayrli ishlar xalqimizning eng ezgu anʼanalaridan biriga aylangan. Koʻngli oʻksik hamyurtlarimiz bu kabi savob amallaridan gʻoyat xursand boʻldilar hamda masʼullarga minnatdorchilik bildirdilar.
Yurtimiz boʻylab tobora yaqinlashayotgan eng ulugʻ va eng aziz bayram –mustaqilligimizning 30 yilligi ayyomini munosib nishonlashga tayyorgarlik koʻrish maqsadida amalga oshirilgan obodonlashtirish xayriya hasharida tumanimizdagi muassasa, korxona-tashkilotlar xodimlari ham faol ishtirok etdilar. Oʻzlari faoliyat yuritayotgan tashkilot binosi atroflarini tozalab, suvlar sepdilar. Binolar hovlisida ekilgan daraxtlarni oqlab, qurigan shoxlarini kesdilar.
Aytish kerakki, xalqimizning azaliy qadriyatlaridan biriga aylangan hashar tadbiri barchani birdamlikka, ahillikka va mehr-oqibatga undaydi. Mazkur tadbirda yosh-u qari bir yoqadan bosh chiqarib, bir-birlariga begʻaraz yordam koʻrsatib, oʻz uyi, mahallasi, ish joyini toza, ozoda saqlashga va obod boʻlishiga hissa qoʻshadilar. Ayniqsa, ulugʻ ayyom kunlarida, bayramlar arafasida bu anʼananing davom etishi, odamlardagi bayramona kayfiyat va koʻtarinkilikni yanada kuchaytiradi.
Mustaqilligimizning 30 yilligini munosib nishonlashga tayyorgarlik koʻrilayotgan ayni paytda yurtdoshlarimiz mazkur obodonlashtirish xayriya hasharida katta zavq va ishtiyoq, oʻzgacha gʻayrat bilan ishtirok etdilar.

 Tuman hokimligining Axrobot xizmati.