ЗУЛФИЯХОНИМ ТАВАЛЛУДИГА БАҒИШЛАБ АДАБИЙ КЕЧА ВА ОЧИҚ ДАРС ЎТКАЗИЛДИ

Фасллар келинчаги бўлган кўклам ўлкамизга ҳар галги ташрифида улкан қувонч олиб келади. Шу кундан баҳор байрамлари бошланади. Айниқса, ўзбек шеърияти маликаси – Зулфияхоним таваллуд топган кун юртимизда том маънода, адабиётимиз, шеъриятимиз айёмига айланиб кетади.

Амударё туманидаги 65-сонли умумий ўрта таълим мактабида ҳам ўзбек шоираси Зулфия Исроилова таваллудининг 106 йиллигига бағишланган тадбирлар ўтказилди.  Мактабнинг она тили ва адабиёт фани ўқитувчиси Анора Қозоқова томонидан 6-синфларда очиқ дарс ҳамда “Баҳор келди сени сўроқлаб” номли бадиий кеча ташкил этилди. Тадбирда туман Халқ таълими бўлими услубчиси Ўткир Матмуродов, мактаб ўқитувчи ва ўқувчилари, ёш ижодкорлар қатнашдилар.

Мактабнинг 6-синфида ўтказилган очиқ дарс давомида ўқувчиларда шоира Зулфия Исроилованинг ҳаёти ва ижоди ҳақида тўлиқ маълумот бериш мақсадида кўргазмали қуроллар, плакатлар, шоира китобларидан фойдаланилди. Фан ўқитувчиси янги педагогик технологиялар асосида мавзуни ўқувчиларга батафсил тушунтиришга ҳаракат қилди. Дарс давомида ўқувчилар севимли шоиранинг умр йўли, гўзал шеърияти билан танишдилар. 

Ўзбек халқининг севимли шоираси, таниқли жамоат арбоби Зулфия Исроилова 1915 йил 1 март куни Тошкентда ҳунарманд оиласида туғилган. Зулфия шеърияти табиатга ҳамда унинг ажралмас қисми ва юқори чўққиси бўлмиш одамзотга нисбатан ҳаяжонли севги билан бурканган. Унинг шеърларида табиат оч рангларда, ёрқин бўёқ ва тимсолларда гавдаланади.

Ўқитувчи дарс давомида Зулфиянинг ижодий камолотида ўзбек ва рус мумтоз адабиёти, халқ оғзаки ижодиёти ва жаҳон адабиёти анъаналарининг роли бениҳоя бўлганини алоҳида таъкидлади. Шоира “Шеърлар” ва “Қизлар қўшиғи” каби поэтик асарларини она-Ватан ва унинг дала, чўлларида меҳнат қилаётган пахтакорлар, механик, тракторчи қизларнинг қайноқ ҳаётларига бағишлагани тўғрисида гапириб, ўқувчиларнинг қизиқишларини янада оширди. Шунингдек, уруш даврида шоиранинг “Уни Фарҳод дер эдилар”, “Ҳижрон кунларида” каби тўпламлари, тўпламдаги шеърлар ватанга муҳаббат, душманга нафрат ва ғалабага ишонч руҳида яратилганлиги билан характерли эканлиги хусусида тўлқинланиб сўзлади.

Зулфиянинг “Менинг Ватаним”, “Бизни кут” каби умидбахш шеърлари уруш даври ўзбек шеъриятининг жанговар руҳини ифодаловчи асарлари қаторидан ўрин олиб, ҳалига қадар ўз аҳамиятини йўқотмаганлигини айтиб ўтди. Очиқ дарс ниҳоятда қизиқарли ва мазмунли тарзда ўтди.

Шундан сўнг, мактабнинг 7-синф ўқувчилари иштирокида Зулфияхоним таваллуди муносабати билан бадиий кеча ўтказилди. Кеча давомида ўқувчилар фаол иштирок қилишиб, севимли шоиранинг бой ижод намуналарини, гўзал шеърий сатрларини ифодали ўқиб бердилар. Тадбирда баҳор тароватини, байрам шукуҳини бағишловчи куй ва қўшиқлар ҳам ижро этилиб, барчага хуш кайфият улашилди.

Зулфиянинг олижаноблик, жасорат, ҳаққоний халқ ғурури, табиат ва инсонга нисбатан самимий туйғулар ва ҳурмат, бой ранглар ва кутилмаган янги тимсоллар билан бажарилган лирикаси, китобхон қалбини ларзага келтиради, инсониятнинг келажакка бўлган ишончини мустаҳкамлайди. Шу билан бирга ўқувчилар қалбида ҳам ватанга бўлган меҳр-муҳаббатни янада орттиради.

Дарҳақиқат, Зулфияхоним етук шоира, садоқат ва вафо тимсоли сифатида бутун ўзбек аёллари учун намуна бўла олади. У нафақат адабиётимиз ва шеъриятимизда, балки халқимизнинг хотирасида абадий яшамоқда.

А.Қозоқова, 65-сонли мактаб ўқитувчиси.