Зулфия Исроилова таваллудининг 111 йиллигига бағишланган шеърият кечаси ўтказилди

Ўзбекистонга ҳар йил баҳор нафақат табиат уйғониши, балки қалблар уйғониши билан кириб келади. Бу фаслнинг илк нафаси шеърият ва нафосат тимсоли — Зулфияхоним номи билан кўнгилларга сингади. Унинг қаламига мансуб сатрлардаги латофат, она Ватанга муҳаббат ва аёл қалбининг нозик туйғулари бугун ҳам юракларда жаранглаб турибди. Шоира шеърлари ва уларга басталанган қўшиқлар баҳорнинг майин шамоли каби эл орасида кенг тарқалиб, авлодлар қалбини эзгуликка чорлаб келмоқда.

Зулфияхоним таваллуди муносабати билан ўтказилаётган маънавий-маърифий тадбирлар шуни кўрсатадики, шеърият — миллат қалбининг таржимонидир. Баҳор эса ана шу қалбни уйғотувчи фасл сифатида шоира ижоди билан уйғунлашади. Унинг номи билан таъсис этилган давлат мукофоти юртимиз қизларини билим ва ижод сари илҳомлантириб, уларни юксак мақсадлар томон етаклаб келмоқда.

2 март куни Амударё тумани Мактабгача ва мактаб таълими бўлимига қарашли 3-сонли умумий ўрта таълим мактаби ўқувчилари туман Ахборот-кутубхона маркази билан ҳамкорликда ўзбек халқининг севимли шоираси, таниқли жамоат арбоби Зулфия Исроилова таваллудининг 111 йиллигига бағишлаб “Зулфияхоним издошлари” мавзусида “Баҳор келди сени сўроқлаб” номли шеърият кечасини ташкил этдилар.

Мазкур тадбирда мактабнинг 6-синф ўқувчилари фаол иштирок этиб, шоира ижодидан намуналарни ифодали тарзда ўқиб бердилар. Ўқувчилар томонидан тайёрланган саҳнавий чиқишлар, шеърий композициялар ва адабий лавҳалар кечага алоҳида кўтаринки руҳ бағишлади.

Зулфияхоним шеърларидаги Ватанга муҳаббат, инсонпарварлик, садоқат ва меҳр-оқибат ғоялари ёш ижрочилар талқинида янада таъсирчан янгради. Айниқса, она образи, аёл қалбининг орзулари ва умидлари ҳақидаги сатрлар тингловчилар қалбида чуқур таассурот қолдирди.

Ахборот-кутубхона маркази мутахассислари томонидан шоиранинг ҳаёти ва ижодий фаолияти ҳақида атрофлича маълумотлар берилди. Унинг ўзбек адабиётида тутган ўрни, жамоатчилик ишларидаги фаол иштироки, аёллар маънавиятини юксалтириш йўлидаги хизматлари ҳақида алоҳида тўхталиб ўтилди. Таъкидланганидек, Зулфияхоним нафақат истеъдодли шоир, балки жамиятда аёл нуфузини ошириш, маърифатни тарғиб қилиш йўлида фаол курашган фидойи инсон сифатида ҳам тарихда қолган.

Тадбир давомида ўқувчилар томонидан шоира ижодига бағишланган викториналар, савол-жавоблар ҳам ўтказилди. Бу жараён ёшларнинг адабиётга бўлган қизиқишини янада ошириб, уларнинг билимларини мустаҳкамлашга хизмат қилди. Китоб кўргазмалари ташкил этилиб, шоира асарлари намойиш этилди. Кеча иштирокчилари нафақат шеър тингладилар, балки адабиёт орқали маънавий озуқа ҳам олдилар.

Тадбир сўнгида фаол иштирок этган ўқувчилар туман Ахборот-кутубхона маркази томонидан эсдалик совғалари ва фахрий ёрлиқлар билан тақдирландилар. Бу каби эътирофлар ёшларнинг ижодий изланишларига рағбат бағишлаб, уларни адабиёт ва санъатга янада яқинлаштиради. Энг муҳими, бундай тадбирлар орқали ёшлар қалбида миллий ғурур, маънавий поклик ва гўзалликка интилиш туйғулари мустаҳкамланади.

Шеърият кечаси кўтаринки руҳда ўтди. У нафақат адабий тадбир, балки ёшлар учун маънавий байрамга айланди. Зеро, Зулфияхоним ижоди — бу эзгулик, вафо, муҳаббат ва инсонийлик мактабидир. Унинг сатрлари ёш авлодни комиллик сари чорлайди, қалбларни нурга тўлдиради.

Дарҳақиқат, Ўзбекистонга баҳор Зулфияхонимнинг номи, сатрлари ва эзгу руҳияти билан кириб келади. Унинг ижоди қалбларда абадий яшайди ва келгуси авлодларни ҳам эзгулик, нафосат ва юксак маънавият сари чорлайверади.

Р.Раманова, туман Ахборот-кутубхона марказининг ахборот-библиография хизмат раҳбари