ИККИ БУЮК ШОИРГА ЭҲТИРОМ КЎРСАТИЛДИ

Ҳар йили юртимизда февраль ойи маънавий-маърифий тадбирларга бой бўлади. Шу ойда ўзбек тилининг  асосчиси,  классик адабиётимизнинг мумтоз вакили Алишер Навоий ва буюк саркарда, шоҳ ва шоир Заҳириддин Муҳаммад Бобур таваллуд топган. Саналар муносабати билан Навоийхонлик, Бобурхонлик кечалари, уларнинг ҳаёти ва ижоди билан ёшларни янада яқинроқ таништириш мақсадида адабий кечалар ўтказилиши анъанага айланиб қолган.
Шу йилнинг 9 февралида Манғит шаҳридаги 9-сонли Болалар мусиқа ва санъат мактабида ҳам Алишер Навоий таваллуд топган кунга бағишланиб, “Буюк даҳо” номли адабий-бадиий кеча бўлиб ўтди.
Туман Маданият бўлими маданият маркази ва 9-сонли Болалар мусиқа ва санъат мактаби ҳамкорлигида ташкиллаштирилган ушбу  тадбир туман Маданият бўлими ходими Насиба Эшчонова сценарийси асосида тайёрланди ва бўлим ходими Ойбек Бегимов  олиб борди.
Алишер Навоий ҳаёти ва фаолияти, яратган бебаҳо асарлари, уларда илгари сурилган ғояларнинг аҳамияти ҳақида маъруза тинглангач, ўқувчилар ижросида аллома бобомизнинг ғазаллари, рубоийларидан парчалар ўқилди. Шунингдек, туманимиз санъаткорлари томонидан Алишер Навоий ғазалларига куй басталанган қўшиқлар ижро этилди.
Алишер Навоий фақат шоиргина эмас, давлат арбоби, оддий меҳнаткаш халқ ғамхўри сифатидаги фаолияти ҳам таҳсинга сазовордир.
У Ҳусайн Бойқаро ҳукмронлик қилган даврда саройда амалдор сифатида илм  аҳлларига раҳнамолик қилиш билан бирга маданий тараққиётига ҳам улкан ҳисса қўшади, ўз ҳисобидан кўплаб масжид, мадрасалар, ҳаммом, кўприклар, йўловчилар учун бекатлар бунёд этади, эл маъмурлиги учун курашади. Қисқа қилиб айтганда, Алишер Навоийнинг ижоди ҳам, ҳаёти ҳам ибратдир.
Иштирокчилар бу борада тадбирдан улкан таассуротлар олдилар, аллома бобомиз ижоди билан янада яқинроқ танишдилар.
Ана шундай тадбирларнинг бири 14 февраль куни классик адабиётимизнинг яна бир йирик вакили, шоҳ ва шоир, давлат арбоби, буюк саркарда Заҳриддин Муҳаммад Бобур таваллуд куни муносабати билан ўтказилди.
“Шоҳ ва шоир” деб номланган ушбу маънавий-маърифий тадбир ўтказиладиган 9-сонли Болалар мусиқа ва санъат мактаби томошалар зали тадбир мавзусига хос безатилганлигининг ўзиёқ киши эътиборини тортади. Саҳна тўридан Бобурнинг улкан портрети жой олган, саҳна деворларида рубоийлари, ғазаллари ёзилган плакатлар осилган.
Тадбир икки нафар бошловчиларнинг Бобур ҳаёти, ижодига доир маълумотлар билан таништиришидан бошланди, дилларни эритувчи мусиқа садолари остида Бобур ҳаётига  доир саҳна кўриниши намойиш этилди.
Шунингдек, шоир ижодидан ифодали ўқилган ғазаллар, рубоийлар ҳам барчага ўчмас таассуротлар бахш этди.
Ўзбек классик адабиётимизнинг икки буюк намояндаси Алишер Навоий ва Заҳириддин Муҳаммад Бобур ижодлари мисли илм-маърифат чашмасидир. Бу чашмадан баҳраманд бўлган киши шуури тобора ойдинлашиб бораверади.
Шу боис ҳам орадан беш асрдан зиёд вақт ўтса-да, ҳаммамиз Навоийни, Бобурни ўқийверамиз.

Ойгул РАЖАБОВА.