40-сонли мактабда «Амир Темур — буюк Соҳибқирон» деб номланган тадбир ўтказилди

9 апрель санаси нафақат Ўзбекистон, балки бутун жаҳон тамаддуни тарихида алоҳида ўрин тутган, марказлашган давлат асосчиси, илм-фан ва маданият ҳомийси, буюк саркарда ва давлат арбоби Амир Темур таваллуд топган сана сифатида кенг нишонланади. Соҳибқирон бобомизнинг бой мероси, у яратган адолатли бошқарув тамойиллари ва бунёдкорлик ишлари асрлар оша бизга маънавий куч ва қудрат бағишлаб келмоқда. Сна муносабати билан юртимизнинг барча гўшаларида бўлгани каби, Амударё туманида ҳам маънавий-маърифий тадбирлар ташкил этилди.

Туман маданият бўлими билан ҳамкорликда 40-сонли мактабда ташкил этилган «Амир Темур — буюк Соҳибқирон» деб номланган байрам тадбири нафақат тарихий санани ёд этиш, балки ёш авлод қалбида миллий ўзликни англаш ва аждодлар меросига бўлган чексиз ҳурматни шакллантириш йўлидаги навбатдаги муҳим қадам бўлди.

Тадбирнинг очилиш маросимида сўзга чиққан Амударё тумани маданият ва маърифат маркази раҳбари Ислом Маткаримов йиғилганларни байрам билан муборакбод этар экан, Амир Темур шахсиятининг жаҳон тарихидаги ўрни ва аҳамиятига алоҳида тўхталиб ўтди. Таъкидланганидек, Соҳибқироннинг «Куч — адолатдадир» деган олий тамойили бугунги кунда ҳам давлатчилик ва жамият тараққиётининг пойдевори бўлиб хизмат қилмоқда.

Мазкур маънавий-маърифий кечанинг асосий мақсади — ўқувчи-ёшларга миллий қадриятларимизни сингдириш, уларда буюк аждодларимизга нисбатан фахрланиш туйғусини уйғотиш ҳамда ватанпарварлик руҳини кучайтиришдан иборатдир. Зеро, тарихини билган, ўз ўтмишидан сабоқ олган миллатнинггина келажаги порлоқ бўлади.

Тадбир давомида ижро этилган куй-қўшиқлар, саҳна кўринишлари ва Соҳибқирон ҳаётига оид маълумотлар ёшларнинг тарихий билимларини бойитишга хизмат қилди. Даврага йиғилган ёшларнинг кўзидаги шижоат ва интилишни кўриб, уларнинг қалбида тарихий ўзликни англаш ва Ватанга муҳаббат туйғулари нақадар юксак эканлигига амин бўлиш мумкин. Айнан мана шундай тадбирлар орқали ёш авлод вакиллари ўзларининг Темур авлодлари эканини, зиммаларида эса аждодлар муносиб вориси бўлишдек улкан масъулият борлигини чуқурроқ ҳис этадилар.

Байрам дастури давомида Амир Темурнинг ҳарбий маҳорати билан бир қаторда, унинг маънавият ва маданият ривожига қўшган ҳиссаси, буюк салтанат барпо этишдаги фидокорлиги ҳам кенг ёритилди. Туман маданият бўлими ижодкорлари томонидан тайёрланган бадиий чиқишлар кечага алоҳида файз киритди. Тадбирнинг ҳар бир дақиқаси иштирокчилар хотирасида ўчмас из қолдириб, уларни юрт истиқболи йўлида фидокорона меҳнат қилишга, илм-фан чўққиларини забт этишга ундади.

Амударё туманида ўтказилган ушбу тантанали тадбир Амир Темур шахсининг миллат руҳиятидаги ўрни нақадар юксаклигини яна бир бор исботлади. Биз бугун эркин ва обод ватанда яшар эканмиз, бу заминнинг ҳар бир қаричида аждодларимизнинг нафаси ва бунёдкорлик руҳи борлигини унутмаслигимиз лозим. Соҳибқирон таваллуди муносабати билан ташкил этилган мазкур кеча ёшлар қалбида ватанпарварлик ва тарихий хотира туйғуларини янада юксалтиришга хизмат қилгани билан аҳамиятли бўлди. Зеро, ўз тарихини эъзозлаган ва ундан куч олган халқ ҳеч қачон кам бўлмайди ва албатта кўзлаган улуғ мақсадларига етади. Соҳибқирон Амир Темурнинг маънавий мероси эса биз учун ҳамиша йўлчи юлдуз бўлиб қолаверади.