ЎҚУВЧИ-ЁШЛАРНИ КАСБ-ҲУНАРГА ЙЎНАЛТИРИШ – ДАВР ТАЛАБИ
Касб - инсон зийнати. Бу зийнатни шакллантиришда ҳар бир шахснинг индивидуал қобилиятини, хусусиятларини, мойилликларини, қизиқишларини инобатга олиб, келажакда етук инсон бўлиб етишишига кўмаклашиш, психологик маслаҳатлар бериш бугунги куннинг энг долзарб масалаларидан биридир. Бу борада мактаб психологлари ўқувчиларга яқиндан ёрдам бериб, уларга тўғри йўл кўрсатувчи, келажакда ўз касбининг моҳир устаси бўлишида замин яратувчи муҳим воситачидир. Касб инсон зийнати бўлибгина қолмасдан, камолотга элтувчи, ёшларнинг келажагини ёритиб берувчи ёрқин йўлдир. Касблар дунёсига назар солар экансиз, ҳар бир касбнинг ўзига яраша меҳнати, машаққати борлигининг гувоҳи бўласиз.
Ўсмирлик ёши ўзликни англаш ва ўз дунёқарашини шакллантириш даври. Шу даврда ўсмирни “Мен кимман? Қандай одамман? Нимага интилаяпман?” деган саволлар қизиқтира бошлайди. Ўзликни англаш – бу ички дунёсини кашф қилиш, бу ҳақда яхлит бир тасавурга эга бўлиш, ўз-ўзига ҳиссий муносабатда бўлиш, ақлий, ахлоқий ва идоравий сифатларни баҳолаш (ўз-ўзини баҳолаш)дир.
Касб танлашда иккиланаётган ўқувчилар билан ҳам маслаҳатлар олиб бориш керак бўлади. Уларга тавсия беришда қобилиятларини, қизиқишларини, соглигини инобатга олиш зарур. Аҳоли бандлигига кўмаклашиш маркази томонидан ташкил этиладиган бўш иш ўринлари ярмаркаси хабарларини газеталар орқали таҳлил қилиш жуда фойдали.
Мактабни тугатаётганда касб танлашингиз сизнинг тақдирингизни ҳал қилиб қўймайди. Навбатдаги танловингиздаги ўзгаришлар сизни фанлар аро фаолият бўйича қимматли мутахассис қилиб тайёрлайди. Биринчи касбингиз, гарчи кейинроқ ундан воз кечсангиз ҳам, ундан қизиқроқ касбни топсангиз ҳам, ҳаётнинг кутилмаган ҳолатларида сизга асқотиши мумкин. Аёллар учун тикувчи, ошпаз, қандолатчи, эркаклар учун чилангар, электр пайвандловчи, ҳайдовчи ва бошқа турдаги касблар оилада ва ҳаётда асқотиши мумкин. Шунинг учун бундай касбларни эгаллаш фойдадан ҳоли эмас.
Ҳар бир муваффақиятнинг замирида қийинчиликлар ётади ва бу қийинчиликларни албатта енгиш керак. Бунинг учун ўзингизда хоҳиш, интилиш бўлиши талаб қилинади.
Азиз ўқувчи, фақат олга юр! Тўхтаб қолма, ўзингни-ўзинг рағбатлантириб бор! Ҳар бир ютуғингдан фахрлан! Камчиликларингни тузатишга ҳаракат қил. Ўзингга ҳар доим» мени ҳеч ким мақсадим йўлида тўхтатиб қололмайди, мен албатта ғалаба қозонаман!» деб такрорлашдан чарчама!
Унутмаки, ўтмишда ёки ҳозирда ким бўлганинг муҳим эмас, келажакда ким бўлишинг муҳимдир! Келажагинг - ўз қўлингда!
Муҳайё ЎРИНБОЕВА,
70-сонли мактаб психологи.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
