Ёшларнинг ҳуқуқий саводхонлигини юксалтириш ва касбга йўналтириш борасида амалий мулоқотлар ташкил этилди
Мамлакатимизда ҳуқуқий демократик давлат ва кучли фуқаролик жамияти барпо этиш йўлида амалга оширилаётган ислоҳотларнинг муваффақияти, ҳеч шубҳасиз, ёшларнинг ҳуқуқий онги ва маданияти қай даражада ривожланганлигига бевосита боғлиқ. Сўнгги йилларда Ўзбекистонда ўсиб келаётган ёш авлодни қонунга итоаткорлик руҳида тарбиялаш ҳамда уларнинг келажакда муносиб ва жамият учун фойдали касб эгалари бўлиб етишишларини таъминлаш давлат сиёсатининг энг устувор йўналишларидан бирига айланган. Ушбу эзгу мақсадларни ҳаётга татбиқ этиш, ўқувчи-ёшлар ўртасида турли ҳуқуқбузарликларнинг олдини олиш ҳамда уларнинг ҳуқуқни муҳофаза қилувчи органлар фаолиятига бўлган қизиқишини янада рағбатлантириш мақсадида жойларда турли маърифий тадбирлар, семинарлар ва очиқ мулоқотлар мунтазам равишда ўтказиб келинмоқда.
Амударё туманидаги 1-сонли политехникум ҳамда 40- ва 1-сонли умумтаълим мактаблари биноларида айнан юқоридаги мақсадларга хизмат қилувчи, ёшларнинг ҳуқуқий онги ва билимларини мустаҳкамлашга қаратилган кенг қамровли учрашувлар бўлиб ўтди.
Учрашувларда соҳанинг етук ва тажрибали мутахассислари, маҳаллий давлат ҳокимияти вакиллари ва ҳуқуқ-тартибот идораларининг раҳбар ходимлари бевосита иштирок этиб, ёшлар билан юзма-юз, самимий мулоқот қилдилар. Тадбирларда Ўзбекистон Республикаси Бош прокуратураси ҳузуридаги Ҳуқуқни муҳофаза қилиш академиясининг масъул ходими Алишер Есемуратов, Қорақалпоғистон Республикаси прокуратурасининг катта прокурори Расул Жалғасбаев, шунингдек, Амударё тумани ҳокимининг ўринбосари Нодирбек Камолов ҳамда туман прокурорининг ёрдамчиси Санжар Абдуллаевларнинг иштирок этди.
Сўзга чиққан соҳа мутахассислари томонидан Ўзбекистон Республикаси Бош прокуратураси ҳузуридаги Ҳуқуқни муҳофаза қилиш академиясининг бугунги кундаги фаолияти, ушбу нуфузли олий таълим муассасасига ўқишга қабул қилишнинг замонавий ва шаффоф тартиб-қоидалари тўғрисида йиғилганларга атрофлича ва қизиқарли маълумотлар тақдим этилди. Тадбир иштирокчиларига академиядаги мавжуд таълим йўналишлари, ўқитишнинг ўзига хос инновацион хусусиятлари батафсил тушунтирилди.
Учрашувлар эркин очиқ мулоқот ва савол-жавоблар форматида ўтди. Бу эса ёшларга ўзларини қизиқтирган, ечимини кутаётган барча масалалар юзасидан бевосита мутахассислардан жавоб олиш имконини яратди. Ўқувчи-ёшлар томонидан ҳуқуқни муҳофаза қилиш органларига ишга кириш жараёнлари, талаб этиладиган касбий ва шахсий фазилатлар, прокуратура тизимидаги масъулиятли хизмат фаолияти юзасидан кўплаб саволлар берилди. Малакали мутахассислар ва раҳбар ходимлар ҳар бир саволга ҳаётий мисоллар ва амалдаги қонунчилик ҳужжатларига таянган ҳолда, ёшлар аудиторияси учун тушунарли, содда ва атрофлича жавоблар қайтардилар. Бундай самимий мулоқот ўқувчилардаги мавжуд тушунмовчилик ёки иккиланишларни бартараф этиб, уларнинг келажакдаги мақсадларини янада ойдинлаштириб олишга катта ёрдам берди.
Амударё туманидаги таълим муассасаларида ташкил этилган ушбу мазмунли ва фойдали учрашувлар ёшларнинг ҳуқуқий билимларини ошириб, уларнинг жамиятдаги ижтимоий-сиёсий жараёнларга бўлган фаол позициясини шакллантириш, юрт келажагига дахлдорлик ҳиссини кучайтиришга хизмат қилди.
Бу каби учрашувлар ўсиб келаётган ёш авлодни қонун-қоидаларга ҳурмат, юксак ватанпарварлик ва адолатпарварлик руҳида тарбиялашда мустаҳкам маънавий пойдевор вазифасини ўтайди. Қолаверса, эртанги кунимиз эгалари бўлган ёшларни ҳуқуқни муҳофаза қилиш органларида ҳалол ва фидокорона хизмат қилишга рағбатлантириб, мамлакатимизда қонун устуворлигини таъминлашга муносиб ҳисса қўшадиган етук кадрлар заҳирасини шакллантиришда ҳам бу каби тадбирларнинг аҳамиятм беқиёсдир.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
