Пахта йиғим-терими: масъулиятли давр олдидан техникалар шайлиги кўздан кечирилди

Пахтакорлар учун “ғалвир сувдан кўтариладиган”, йил бўйи қилинган фидойи меҳнатларига ҳаққоний баҳо бериладиган долзарб палла бошланди. Айни кунларда мамлакатимизнинг барча ҳудудларидаги пахтачилик корхоналари, фермер хўжаликлари далаларида пишиб-етилган пахта ҳосилини нест-нобуд қилмай йиғиб-териб олиш, “оқ олтин”имизни харидорларига ўз вақтида тоза ва сифатли етказиб беришга қаратилган чора-тадбирлар амалга оширилмоқда.

Амударё туманида ҳам кузги мавсумнинг энг долзарб ва масъулиятли даври — пахта йиғим-теримини муваффақиятли ўтказишга пухта ҳозирлик кўрилди. Хусусан, тумандаги 352 та фермер хўжаликлари ва қишлоқ хўжалиги корхоналари ихтиёридаги транспорт тракторлари тиркамаларининг йиғим-терим мавсумига тайёргарлик ҳолати юзасидан қатъий назорат тадбирлари олиб борилиб, мавжуд камчиликларни бартараф этиш чоралари кўрилди. Унга кўра, терилган пахта хом ашёсини пахтани қабул қилиш масканларига беталофат етказиш, трактор тиркамаларининг устига ёпиладиган брезентларнинг сифати, шунингдек, ёнғинга қарши ускуналар билан жиҳозланганлик даражаси бўйича ўрганишлар олиб борилди.

Ўзбекистон Республикаси Вазирлар Маҳкамаси ҳузуридаги Агросаноат мажмуи устидан назорат қилиш Инспекциясининг Амударё туман бўлими томонидан 352 та фермер хўжаликлари ва пахтачилик корхоналари ихтиёридаги барча трактор тиркамалари тумандаги 5 та пахтани қабул қилиш масканларига йиғилиб, Агроинспекциянинг туман бўлими бошлиғи Сарвар Матякубов ва туман Йўл ҳаракати хавфсизлиги хизмати бошлиғи, сафдор Бегзод Қозоқов иштирокида яна бир бор назоратдан ўтказилди.

Назорат тадбирлари жараёнида кўпчилик трактор тиркамаларининг давлат рақами белгиси ва гувоҳномалари йўқлиги аниқланди. Аниқланган барча камчиликлар жойида бартараф этилиб, 5 та пахтани қабул қилиш масканларига йиғилган жами 748 та трактор тиркамаларига вақтинчалик давлат рақамлари ва гувоҳномалар расмийлаштириб берилди.

Тадбир жараёнида Амударё тумани Йўл ҳаракати хавфсизлиги бўлими бошлиғи Бегзод Қозоқов фермер хўжаликлари раҳбарлари ва транспорт тракторларини бошқарувчи механизаторларга пахта йиғим-терими мавсуми давомида техника хавфсизлиги ҳамда йўл ҳаракати қоидаларига қатъий амал қилишнинг аҳамияти, шунингдек, пахта исрофгарчилигининг олдини олишда эътибор қаратиш лозим бўлган жиҳатлар ҳақида тушунчалар берди.

Таъкидланганидек, пахта йиғим-терими мавсуми давомида техника хавфсизлиги ва йўл ҳаракати қоидаларига қатъий амал қилиш ҳаётий муҳим аҳамиятга эга. Йўлларда ҳаракатланишда тезликни чеклаш, белгиларга амал қилиш, бошқа транспорт воситалари билан эҳтиёткорлик билан муомала қилиш керак. Хавфсизлик қоидаларини бузиш жиддий бахтсизликларга, жарохатларга ва ҳатто ўлимга олиб келиши мумкин. Шунинг учун ҳар бир ишчи ва ҳайдовчи ўз жавобгарлигини англаб, қоидаларга қатъий амал қилиши лозим.

Кўрилаётган бу каби амалий чора-тадбирлар пахтакорларимизнинг фидойи меҳнатлари ва пешона тери эвазига етиштирилган ҳосилни ўз вақтида, нест-нобуд қилмай йиғиштириб олиш, пировардида нафақат деҳқонлар, балки халқимизнинг моддий манфаатдорлигини, оилалар фаровонлигини оширишда муҳим аҳамият касб этиши шубҳасиз.

Робия ЙЎЛДОШЕВА.