Paxta yigʻim-terimi: masʼuliyatli davr oldidan texnikalar shayligi koʻzdan kechirildi

Paxtakorlar uchun “gʻalvir suvdan koʻtariladigan”, yil boʻyi qilingan fidoyi mehnatlariga haqqoniy baho beriladigan dolzarb palla boshlandi. Ayni kunlarda mamlakatimizning barcha hududlaridagi paxtachilik korxonalari, fermer xoʻjaliklari dalalarida pishib-yetilgan paxta hosilini nest-nobud qilmay yigʻib-terib olish, “oq oltin”imizni xaridorlariga oʻz vaqtida toza va sifatli yetkazib berishga qaratilgan chora-tadbirlar amalga oshirilmoqda.

Amudaryo tumanida ham kuzgi mavsumning eng dolzarb va masʼuliyatli davri — paxta yigʻim-terimini muvaffaqiyatli oʻtkazishga puxta hozirlik koʻrildi. Xususan, tumandagi 352 ta fermer xoʻjaliklari va qishloq xoʻjaligi korxonalari ixtiyoridagi transport traktorlari tirkamalarining yigʻim-terim mavsumiga tayyorgarlik holati yuzasidan qatʼiy nazorat tadbirlari olib borilib, mavjud kamchiliklarni bartaraf etish choralari koʻrildi. Unga koʻra, terilgan paxta xom ashyosini paxtani qabul qilish maskanlariga betalofat yetkazish, traktor tirkamalarining ustiga yopiladigan brezentlarning sifati, shuningdek, yongʻinga qarshi uskunalar bilan jihozlanganlik darajasi boʻyicha oʻrganishlar olib borildi.

Oʻzbekiston Respublikasi Vazirlar Mahkamasi huzuridagi Agrosanoat majmui ustidan nazorat qilish Inspektsiyasining Amudaryo tuman boʻlimi tomonidan 352 ta fermer xoʻjaliklari va paxtachilik korxonalari ixtiyoridagi barcha traktor tirkamalari tumandagi 5 ta paxtani qabul qilish maskanlariga yigʻilib, Agroinspektsiyaning tuman boʻlimi boshligʻi Sarvar Matyakubov va tuman Yoʻl harakati xavfsizligi xizmati boshligʻi, safdor Begzod Qozoqov ishtirokida yana bir bor nazoratdan oʻtkazildi.

Nazorat tadbirlari jarayonida koʻpchilik traktor tirkamalarining davlat raqami belgisi va guvohnomalari yoʻqligi aniqlandi. Aniqlangan barcha kamchiliklar joyida bartaraf etilib, 5 ta paxtani qabul qilish maskanlariga yigʻilgan jami 748 ta traktor tirkamalariga vaqtinchalik davlat raqamlari va guvohnomalar rasmiylashtirib berildi.

Tadbir jarayonida Amudaryo tumani Yoʻl harakati xavfsizligi boʻlimi boshligʻi Begzod Qozoqov fermer xoʻjaliklari rahbarlari va transport traktorlarini boshqaruvchi mexanizatorlarga paxta yigʻim-terimi mavsumi davomida texnika xavfsizligi hamda yoʻl harakati qoidalariga qatʼiy amal qilishning ahamiyati, shuningdek, paxta isrofgarchiligining oldini olishda eʼtibor qaratish lozim boʻlgan jihatlar haqida tushunchalar berdi.

Taʼkidlanganidek, paxta yigʻim-terimi mavsumi davomida texnika xavfsizligi va yoʻl harakati qoidalariga qatʼiy amal qilish hayotiy muhim ahamiyatga ega. Yoʻllarda harakatlanishda tezlikni cheklash, belgilarga amal qilish, boshqa transport vositalari bilan ehtiyotkorlik bilan muomala qilish kerak. Xavfsizlik qoidalarini buzish jiddiy baxtsizliklarga, jaroxatlarga va hatto oʻlimga olib kelishi mumkin. Shuning uchun har bir ishchi va haydovchi oʻz javobgarligini anglab, qoidalarga qatʼiy amal qilishi lozim.

Koʻrilayotgan bu kabi amaliy chora-tadbirlar paxtakorlarimizning fidoyi mehnatlari va peshona teri evaziga yetishtirilgan hosilni oʻz vaqtida, nest-nobud qilmay yigʻishtirib olish, pirovardida nafaqat dehqonlar, balki xalqimizning moddiy manfaatdorligini, oilalar farovonligini oshirishda muhim ahamiyat kasb etishi shubhasiz.

Robiya YOʻLDOShEVA.