ТАЪЛИМГА ЭЪТИБОР – КЕЛАЖАККА ЭЪТИБОР

Президентимиз томонидан таълим соҳасига берилаётган юксак эътибор, давлатимиз томонидан ўқитувчиларга, устоз деган шарафли касб эгаларига бўлган ҳурмат-эҳтиромнинг  янада кучайтирилиши бизни жуда ҳам руҳлантириб юборди. Шу ўринда айтиш жоизки, таълимда бўлаётган янгиланишлар ўз навбатида биз – таълим соҳаси ходимларига катта бир масъулият юкламоқда.

Президентимизнинг Мурожаатномасида айтиб ўтилганидек, бу йил олий таълимга қабул параметрлари 2016 йилга нисбатан 2,5 баробарга ўсиши ва  олий таълим билан қамраб олиш даражаси 9 фоиздан 25 фоизга етказилиши – келажагимиз эгалари бўлган ёшларимизга бўлган катта имкониятлар бўлди десак муболаға бўлмайди. Эҳтиёжманд оилаларнинг мингга яқин қизлари илк бор олий ўқув юртларига алоҳида давлат грантлари асосида қабул қилиниши эса, Олий таълим олиш имкони бўлмаган, иқтисодий жиҳатдан қийналаётган ёшларни давлатимиз томонидан қўллаб қувватланишининг натижасидир.

Президентимиз олға сурган, таълим сифатини чекка қишлоқларда ҳам  пойтахтдагидек юқори даражага етказиш ғояси, олис ҳудудларга бориб фаолият кўрсатиш истагида бўлган ўқитувчиларнинг қўллаб-қувватланиши, таълим соҳаси ходимларига берилаётган юксак ишончнинг натижасидир. Бу ишонч ва яратилаётган имкониятлар ҳамда қўллаб қувватлашлар – биз ўқитувчиларга  ўз касбимизга бўлган масъулиятимизни янада чуқур ҳис қилишни талаб этади.

Энди биз оддий ўқув дастурлари ва  методик қўлланмалар билан эмас, балки халқаро мезонларга мослаштирилган ўқув дастурлари ва методик қўлланмалар орқали таълим беришга ўтмоқдамиз. Келгуси ўқув йилидан бошланғич синфларда давлат таълим стандартлари ўрнига хорижий тажриба асосида, болаларга ортиқча юклама бермайдиган “Миллий ўқув дастури” нинг жорий қилиниши, биз ўйлаймизки, мактаб таълими ва тарбиясини олган ёшларнинг келажакда ривожланган давлатлар ёшлари билан рақобатлашишдан тап тортмайдиган келажак эгаларининг янада кўпайишига замин яратади.

Ялғашбой Шомуродов, 26-сонли мактаб директори, Ўзбекистон халқ таълими аълочиси.