КАСБ-ҲУНАР МАКТАБИ ЁШЛАРНИНГ ҲАЁТДА ЎЗ ЎРНИНИ ТОПИШИГА ХИЗМАТ ҚИЛМОҚДА

Мамлакатимиз жами аҳолисининг 60 фоизга яқинини ёшлар ташкил этади. Уларнинг  салмоқли қисмини мустақил ҳаёт остонасига етган, келажаги учун бирор касб–ҳунарни эгаллашни ният қилган ва орзу истаклари йўлида муҳим қадам ташлайдиган ёшдаги юртдошларимиздир. Амударё туманининг ана шундай ёшлари учун 2-сонли касб-ҳунар мактабининг очилиши жуда қўл келди. Касб-ҳунар мактаби Халқаро таснифлагичнинг учинчи даражасига мос келувчи таълим дастурлари асосида 9-синф битирувчиларини ижтимоий қўллаб-қувватлашга қаратилган бошланғич таълим босқичида кадрлар тайёрлайдиган таълим муассасаси сифатида янгидан ташкил қилинган бўлиб, умумтаълим муассасаларининг 9-синфларининг битирувчилари ҳисобидан шакллантирилган гуруҳларда 2 йиллик умумтаълим ва мутахассислик фанларининг интеграциялашган дастурлари асосида кундузги таълим шаклида фаолият юритади.

Ушбу касб-ҳунар мактабида айни кунда 183 нафар ўқувчиларга 6 нафар ишлаб чиқариш таълими усталари ва 33 нафар тажрибали педагоглар умумий таълим асосларини ва касб-ҳунарни пухта ўргатишга ҳаракат қилмоқдалар.Муассасада ўқувчиларни 5 та йўналиш – автомобилларни таъмирлаш чилангари, тикувчилик, пайвандловчи, сув ва газ истеъмол назорати  оператори, ошпаз-қандолатчи  касбларига ўқитиш йўлга қўйилган ва бошланғич касб маҳоратини, кўникмасини эгаллашлари учун  олган билимлари амалий машғулотлар билан мустаҳкамлаб борилади.

Муассасада ўқувчиларнинг ўзлари танлаган ихтисосликни пухта эгаллашлари учун барча шароитлар яратилган. Улар дарсдан ва амалий машғулотлардан бўш вақтларида  967та бадий, 197та  сиёсий, 5836та махсус адабиётлар, 21 минг 723  та дарсликлар,  жами 28 минг 723 та китоблар фондига эга ахборот кутубхона марказида ўз билимларини ошириш учун ўқиб-ўрганадилар. 12 та компьютер жамланмасига эга, интернет тармоқларига уланган электрон кутубхона ҳам мавжуд. Ўқувчилар бу ерда 672 та бадий  китобларни, электрон дарсликларни ўқиб, ўзларига керакли билимларни олишлари мумкин. Ўқувчиларнинг яратилган имкониятлардан қандай фойдаланаётганликларини назорат қилиш мақсадида гуруҳлар раҳбарлари улар билан тез-тез замонавий ахборот-коммуникация технологияларини қўллай олиши даражасини текшириб, бадиий китоблардан олган таассуротлари хусусида суҳбатлар ўтказиб турадилар. Булардан ташқари одоб-ахлоқ, кийиниш маданияти, жамоат жойларида ўзини тутиш, дўстлик мавзуларида ҳам очиқ мулоқотлар ташкил этиб туришга эътибор берилмоқда.

Замонавий ахборот-коммуникацион технологияларни пухта эгаллаш – давр талаби. Шундан келиб чиқиб, ўқувчилар саводхонлигини ошириш мақсадида мактабда 16 та компьютер жамланмаси мавжуд компьютер синф хонаси ташкил этилган ва доимо ўқувчилар билан гавжум бўлади.

Мактабда кимё, физика, биология фанлари лаборатория хоналари жиҳозланиб, амалий дарс машғулотлари ўтилмоқда.

Ўқувчиларнинг бўш вақтларини мазмунли ташкил қилиш мақсадида касб-ҳунар мактабида фан ва спорт тўгараклари фаолияти йўлга қўйилган.

Умумтаълим фанларидан рус тили, ёш филолог, тарихшунос, математика, физика тўгараклари, касбга ўргатиш бўйича тикувчилик, пайвандловчи, ёш мухандис, ёш техник, автомобиль таъмирловчи, моҳир ошпаз тўгаракларида машғулотлар мунтазам олиб борилмоқда.

Шунингдек, касб-ҳунар мактабида ёшлар маънавиятини юксалтириш бўйича Юртбошимиз белгилаб берган 5 та муҳим ташаббус ижросини таъминлаш мақсадида тасвирий санъат, ёшларни чақириққа тайёрлаш, шашка, шахмат, волейбол, стол тенниси, футбол, китобхонлик тарғиботи, ораста қизлар тўгараклари ташкил қилинган бўлиб, уларга жами ўқувчиларнинг 80 фоизи қамраб олинган.

Касб-ҳунар мактабида ўқувчиларнинг олган билимларини амалиёт билан мустаҳкамлаш учун ўқув устахоналари замонавий жиҳозлар билан таъминланганлиги муҳим аҳамият касб этмоқда. Автомобилларни таъмирлаш чилангари касби бўйича “Нексия” русумли автомобиль макети, “Матиз” русумли автомашина двигатели ҳамда автомобиль диагностика жиҳозлари мавжуд. Тикувчилик касби бўйича устахона эса маҳаллий бюджет ҳисобидан 33 та замонавий тикув машиналари билан таъминланган бўлиб, ўқувчиларнинг амалиёт ўташларига хизмат қилади.

Пайвандловчи касбини эгаллашга қарор қилган ўқувчилар электр ҳамда газ воситасида пайвандлаш жиҳозлари билан яқиндан танишиб, уларнинг ишлатиш бўйича илк кўникмаларга эга бўлмоқдалар. Сув, газ истеъмоли назоратчи-оператори касби бўйича таълим олаётган ўқувчилар эса Германиядан 130 минг евро миқоридаги маблағ эвазига келтирилган жиҳозлар ёрдамида ўқув-амалиёт машғулотини ўтайдилар. Шунингдек, маҳаллий бюджет маблағи ҳисобидан келтирилган нон маҳсулотлари, қандолат маҳсулотлари ишлаб чиқаришга мўлжалланган печлар ёрдамида ошпаз, қандолатчи касбларига ўқиётган ўқувчилар ҳам тегишли мутахассисликлар бўйича ҳунарларни пухта эгаллашга интилмоқдалар.

Шуниси эътиборлики ўқувчиларнинг амалиёт машқлари давомида тайёрлаган уй-рўзғор буюмларини, ҳар хил русумдаги темир эшик ва дераза ромларини, ҳунармандчилик маҳсулотларини, шунингдек, пиширган нон ва нон маҳсулотларини туманимиз бозорларида сотиш ҳам йўлга қўйилган. Бунинг натижасида ўқувчиларда ўз меҳнати орқали пул топиш, ҳаётини фаровон қилишга интилиш кўникмалари шакллантирилади. Айниқса, ошпаз-қандолатчи, тикувчилик йўналишларида таълим олаётган ўқувчилари ўз меҳнатлари маҳсулининг харидоргир бўлаётганидан жуда хурсанд. Бу билан улар ўзлари танлаган касб-ҳунар маҳоратини эгаллабгина қолмай ота-онасига, оиласига моддий кўмакчи ҳам бўлишаяпти.

Мамлакатимизда ёш-авлод камолоти йўлида давлатимизнинг ғамхўрлиги натижаси сифатида ташкил этилган касб-ҳунар мактаблари қатори ташкил этилган туманимиздаги 2-сонли касб-ҳунар мактаби келгусида уларнинг касб-корли бўлиб, эл-юртимизга ҳалол хизмат қилишига замин яратади.

Ўзбекистон Республикаси Вазир Маҳкамасининг тегишли Қарорига мувофиқ 2021-2022 ўқув йилидан бошлаб касб-ҳунар мактаблари ўқувчилари базавий ҳисоблаш миқдорининг 1 баравари миқдорида стипендия ҳамда 3 маҳал иссиқ овқат билан таъминланиши назарда тутилган. Келажакда бу ғамхўрликлар туманимиздаги 2-сонли касб-ҳунар мактабида ҳам  ўзининг ижобий натижаларини кўрсатади. Кўплаб ёшларнинг ҳаётда ўз ўринларини топшига хизмат қилади.

Ойгул РАЖАБОВА.