ВАТАНПАРВАР ЁШЛАРНИ КАМОЛГА ЕТКАЗАЁТГАН УСТОЗ

Ёш авлод қалбида Ватанга чексиз меҳру-муҳаббат, садоқат туйғуларини мустаҳкамлаш ҳозирги кундаги асосий вазифалардан бири саналади.

Ёшлар онгига ушбу туйғуларни сингдириш, уларни ҳарбий-ватанпарварлик, Ватанга садоқат руҳида тарбиялашда умумтаълим мактабларида ўтилаётган Чақирувга қадар бошланғич тайёргарлик фани муҳим ўрин тутади. Шунингдек, чақирувга қадар бошланғич таълим – ёшларнинг сиёсий, маънавий дунёқарашини ўстириш, халқимизнинг бой тарихи, шонли жанговар анъана ва қадриятларига садоқат руҳида тарбиялаш, спортнинг ҳарбий ва амалий турларини ривожлантиришга қаратилгани билан аҳамиятлидир.

Туманимиздаги 46-сонли мактабда ҳам ушбу фандан дарс машғулотлари самарали ташкил этилиб, ўқувчи-ёшлар ватанпарварлик руҳида тарбияланмоқда. Фан бўйича ўқув машғулотларини мактабнинг чақирувга қадар бошланғич тайёргарлик  бўйича раҳбари, тажрибали ўқитувчи Амин Йўлдошев назарий ва амалий тарзда ташкил этиб, ўқувчиларга Ватан мудофааси тўғрисида тушунча, чуқур билим бериб бормоқда. Ўқувчилар дарсларда Қуролли Кучларимиз қўшинларининг турлари ва тузилиши, ҳарбий низомлар ҳақида батафсил маълумотларга эга бўлишмоқда. Шу қаторда улар сафланиш, ўқотар қуроллар, ҳарбий техника турлари, улардан фойдаланиш қоидаларини ўрганиб, чидамлилик, кучлилик, тезлик, чаққонлик бўйича жисмоний машқларни бажариш кўникмаларини ҳам ўзлаштиришмоқда.

Ўқувчиларга дарс машғулотлари доимий равишда махсус жиҳозланган синфхонада ўтказилади. Ҳозирда мактабдаги ушбу  синфхона замонавий ўқув қуроллари, ҳарбий аслаҳалар кўринишидаги кўргазмали жиҳозлар, турли макетлар, ҳарбий либослар ва бошқа буюмлар билан тўлиқ таъминланган. Улар ёрдамида ўқувчиларга фанни ўқитиш жараёни янада осон бўлмоқда. Чунки, қурол ёки ҳарбий аслаҳани кўрган ўқувчининг назарий дарсларда олган билимлари янада мустаҳкамланиб, амалий кўникмалари ошиб боради.

Дастлабки ҳарбий билим ва кўникмаларни бериш, армияга ёшларни тайёрлаш – чақирувга қадар бошланғич тайёргарлик фани ўқитувчиларидан чуқур билим ва бой ҳаётий тажрибани, миллий армиямизда олиб борилаётган ислоҳотлар ва янгиликлардан бохабар бўлишни, дастлабки ҳарбий кўникмаларга эга бўлишни талаб этади. Шу боис фан ўқитувчиси А.Йўлдошев мунтазам равишда ўз устида ишлаб, тинимсиз равишда изланади.

Айни пайтда ўз дарсларини самарали ташкил этиб, ўқувчи-ёшларга Миллий армиямиз давлат мустақиллиги, ҳудудий яхлитлиги ва тинч-осойишта ҳаётининг кафолати эканлигини тушунтириб келаётган тажрибали устоз ҳарбий унвонга эга, заҳирадаги катта лейтенант. Олий ўқув юртини бошланғич ҳарбий тайёргарлик ва жисмоний тарбия йўналиши бўйича тугаллаган А.Йўлдошев ўзи таҳсил олган 46-сонли мактабда бошланғич ҳарбий тайёргарлик фани ўқитувчиси бўлиб иш бошлаган эди. Соҳа бўйича чуқур билимга эга бўлган мутахассис 1996-2001 йилларда туман Мудофаа ишлари бўлимида  Бошланғич ҳарбий тайёргарлик бўлинмаси бошлиғи лавозимида ишлади.

Мактабларда Чақирувга қадар бошланғич тайёргарлик фанини ўқитишда мутахассис кадрларга бўлган эҳтиёж туфайли у 2001 йилда яна 46-сонли мактабга қайтиб, ўқитувчилик фаолиятини давом эттирди. Ўтган йиллар давомида ишга бўлган талабчанлиги, масъулиятлилиги, фидойилиги сабабли жисмоний тарбия ўқитувчиси, мактаб директори каби вазифаларда ҳам меҳнат қилди.

Юртимиз тинчлиги ва осойишталигини ишончли ҳимоя қилишга қодир, тезкор, жанговар қобилияти юксак кадрлар тайёрлаш давр талабидир.  Ёш авлодни ана шу талабга кўра ватанпарвар, юртга муносиб фарзандлар қилиб камолга етказаётган устоз А.Йўлдошев буни ўзининг Ватан олдидаги бурчи деб билади.

О. Худойберганова.