“КИМ ВАТАНГА СОДИҚ БЎЛСА, МЕНДИРМАН ЎША!” ШИОРИ ОСТИДА ЁШЛАР БИЛАН ҲАРБИЙЛАРНИНГ УЧРАШУВЛАРИ БЎЛИБ ЎТМОҚДА

Ўсиб келаётган ёш авлодни ҳарбий ватанпарварлик руҳида тарбиялаш, улар онгига ўзаро меҳр-оқибат, миллатлараро тотувлик, тинчликни қадрлаш туйғуларини сингдириш, мамлакатимиз Мудофаа тизимида амалга оширилаётган ислоҳотлар мазмун-моҳияти ҳақида кенг тушунчалар бериш мақсадида мамлакатимизда 2020 йилнинг 15 декабрь санасидан 2021 йилнинг 15 январь санасига қадар “Ватанпарварлик ойлиги” ўтказилмоқда.

“Ким Ватанга содиқ бўлса, мендирман ўша!” шиори остида “Ватанпарварлик ойлиги” доирасида амалга оширилаётган адабий-мусиқий, маънавий-маърифий ҳамда жанговар спорт ўйинлари, ҳарбий техникалар кўргазмаси намойиши, ошкора, самимий мулоқот тарзидаги тадбирларда туманимизнинг юзлаб ёшлари катта қизиқиш билан иштирок этишмоқда.

Ана шундай тадбирлардан бири Қиличбой овулида ҳам ўтказилди. Ватанпарварлик ойлиги доирасида бўлиб ўтган “Очиқ эшиклар куни” тадбирида 9202 “К” ҳарбий қисм зобит ва аскарлари, Қиличбой овули ёшлари иштирок этишди.

Туман ҳокимининг ёшлар масалалари бўйича ўринбосари Маҳмуд Шерметов, 9202 “К” ҳарбий қисм зобити, подполковник С.Тошматов ва 2-даражали сержант О.Маҳмудовлар иштирокида ўтказилган  “Очиқ эшиклар куни”да замонавий ҳарбий қурол-аслаҳалар, ҳарбий техникалар кўргазмаси ташкил этилиб, ҳарбийлар томонидан қўл жанги бўйича чиқишлар намойиш этилди.

Шунингдек, тадбирда ҳарбий хизмат отлари, хизмат итларининг давлат чегарасини қўриқлашдаги иштироки амалий машқлар орқали кўрсатиб берилди.

Тадбирда иштирок этган 250 нафардан зиёд ёшлар ҳарбийлар томонидан намойиш этилган жанговар машқлар, айниқса, қўл жанги, хизмат отлари ва хизмат итлари иштирокидаги чиқишларни катта қизиқиш билан кузатиб, ўзларини қизиқтирган саволлар билан мурожаат қилдилар. Айниқса, ҳарбийлар томонидан ёшларнинг саволларига берилган жавоблар катта қизиқиш уйғотди. Ўз навбатида кўплаб ёшлар она Ватан ҳимоячиси бўлишдек орзу-интилишлари хусусида тўлқинланиб сўзладилар.

Ойлик доирасидаги “Ким Ватанга содиқ бўлса, мендирман ўша!” шиори остида Манғит шаҳридаги 31-сонли мактабда ҳам маънавий-маърифий тадбир ўтказилди. 9202 “К” ҳарбий қисм ходимлари, подполковник С.Тошматов, 2-даражали сержант О.Маҳмудовлар иштирокида ўтказилган давра суҳбати шаклидаги маънавий-маърифий тадбирда ёшлар масалалари бўйича туман ҳокимининг ўринбосари М.Шерметов сўзга чиқиб, барчани янги 2021 йил ҳамда 14 январь – Ватан ҳимоячилари куни билан табриклади. Шунингдек, тадбирда ўқувчи-ёшлар билан 9202 “К” ҳарбий қисм зобитлари дилдан суҳбатлашдилар. Подполковник С.Тошматов ҳамда 2-даражали сержант О.Маҳмудовлар ўқувчи-ёшларга Ўзбекистон Қуролли Кучларининг қудрати ва салоҳияти, ёшларнинг она Ватан олдидаги йигитлик бурчи, Ватанга содиқлик туйғуси ҳақида батафсил гапириб беришди. Шу билан бирга она Ватан ҳимоячиси бўлишга бел боғлаган, ҳарбий соҳани танлаган ёшларнинг билим олишлари, ҳарбий техникалар сир-асрорларини пухта эгаллашлари учун мамлакатимизда яратилган шарт-шароитлар, “Темурбеклар мактаби”, Олий ҳарбий академиялар хусусида ёшларни қизиқтирган саволларга жавоб бердилар.

Айни кунларда “Ватанпарварлик ойлиги” доирасидаги “Ким Ватанга содиқ бўлса, мендирман ўша!” шиори остида маънавий-маърифий тадбирлар, давра суҳбатлари, ҳарбий зобитлар ва аскарлар билан ёшларнинг  учрашувлари давом этмоқда.

Отабек МАҲМУДОВ, 9202 “К” “Аёқчи” ҳарбий қисм ходими, 2-даражали сержант.