«ВАҚФ» ФОНДИ ТОМОНИДАН ЭҲТИЁЖМАНД ОИЛАЛАРГА СОВҒАЛАР ТОПШИРИЛДИ

Халқимиз азал-азалдан турли саналар муносабати билан эҳтиёжманд, кўнгли ярим инсонларни йўқлаш, айниқса, ҳайит ва байрамларда уларнинг хонадонларига кириб бориб, ҳол-аҳвол сўраш, кайфиятларини кўтариш, камларини  тўлдиришдек хайрли ишларга ҳисса қўшиб келишга одатланган. “Бир мискин кўнгилни шод этиш – Каъбатуллоҳни обод этиш билан баробар”, деган ҳикмат ҳам, шак-шубҳасиз, саховатпеша халқимиз закоси туфайли яратилган.

Туманимизда ҳам турли байрам саналари муносабати билан эҳтиёжманд, боқувчисини йўқотган, кам таъминланган оилалар ҳолидан хабар олиш меҳр-саховат ёрдамларини кўрсатиш, ҳайит ва барйамларни шод-хуррам  ўтказишлари учун уларни моддий ва маънавий  қўллаб-қувватлашга алоҳида эътибор қаратилади.

Элимизда янги йил шукуҳи кезаётган айни кунларда ҳам “Вақф” фонди томонидан туманимизнинг  турли ҳудудларида истиқомат қилувчи ижтимоий ҳимояга муҳтож, боқувчисини йўқотган, ногиронлиги бўлган ва кам таъминланган 490 та оиланинг ҳар бирига 500 минг сўмлик, яъни 11 турдаги озиқ-овқат маҳсулотлари тарқатиб берилди.

Янги йил байрами арафасида “Вақф” фонди ҳамда туманимиздаги барча овул ва маҳалла фуқаролар йиғини масъуллари саъй-ҳаракатлари билан ташкил этилган эҳсон тадбирларидан аҳоли мамнун бўлмоқда. Чунки ҳар бир хонадонга беминнат, меҳр ва саховат эҳсонлари билан кириб борган саховатпеша инсонлар байрам совғаси сифатида кундалик озиқ-овқат маҳсулотларини тарқатиш билан бирга, халқимизнинг эҳтиёжманд қатлами вакилларига ўзларининг самимий дил сўзларини ҳам изҳор этишиб, уларга байрамона кайфият улашмоқдалар.

Бундан ташқари, “Вақф” фонди томонидан яна бир хайр-эҳсон тадбири ҳам амалга оширилди. Юсуф Эшон бобо ва Шайх Жалил бобо зиёратгоҳларида 2 та жонлиқ қурбонлик қилиниб, 50 та кам таъминланган, ижтимоий ҳимояга муҳтож, боқувчисини йўқотган ва ногиронлиги бўлган  оилаларга эҳсон сифатида тарқатилди.

Мамлакатимизда, шу жумладан, туманимизда ҳам, халқимизнинг қувончли кунларида оилаларида камчилик бўлмаслиги, барча бирдам ва аҳилликда байрамларни шодиёналик, катта хурсандчилик билан ўтказишлари учун уларга ҳам алоҳида ғамхўрлик кўрсатилмоқда. Бунда нафақат “Вақф” фонди,  балки минг-минглаб саховатпеша инсонлар томонидан ҳам ана шундай эҳсон тадбирлари ташкил этилиши ҳар бир юртдошимиз қалбида бир-бировга меҳр-мурувват туйғуларини уйғотаётгани билан эътиборга молик.

Янги йил байрами арафасида “Вақф” фонди ҳамда овул ва маҳаллалардаги саховатпеша инсонлар томонидан амалга оширилаётган бу каби тадбирлар халқимизга олам-олам завқ, хуш кайфият улашмоқда. Кўрсатилаётган бундай эътибор ва рағбат кўнгилларини тоғдек юксалтириб, кўтаринки кайфият бахш этмоқда.

Робия ЙЎЛДОШЕВА.