УЧРАШУВЛАРДА ЁШЛАРНИНГ МУАММОЛАРИ ЎРГАНИЛМОҚДА

Ўзбекистон Республикаси Президенти Шавкат Мирзиёев томонидан 2019 йил 27 декабрь куни Муҳаммад Ал-Хоразмий номидаги ихтисослаштирилган мактабда ўтказилган учрашувда берилган топшириқлар ижросини таъминлаш мақсадида туман ҳудудидаги овул ва маҳаллаларда ёшлар билан учрашувлар ўтказилмоқда.

Қипчоқ шаҳарча фуқаролар йиғинидаги 11-сонли мактаб биноси мажлислар залида ёшлар бандлигини таъминлаш, муаммоларини ўрганиш, фикр ва таклифларини тинглаш, уларни қўллаб-қувватлаш ҳамда муносиб шароит яратишга бағишланган навбатдаги учрашув бўлиб ўтди. Ҳудуд ёшлари ва мутасадди ташкилотлар раҳбарлари иштирокида ўтган мазкур учрашувда жами 53 нафар фаол ёшлар қатнашдилар.

Йиғилишни туман ҳокими ўринбосари Маҳмуд Шерметов очди ҳамда учрашув қатнашчиларини кун тартибидаги масала билан таништирди. Шунингдек, Маҳмуд Шерметов мамлакатимизда ёшларнинг юксак марраларни эгаллашлари учун яратилаётган шарт-шароитлар, чексиз имкониятлар ҳақида тўхталиб, ёшларни ўқиб, билим олишга, шижоат билан олға интилишга ҳамда Ватан хизматига ярайдиган муносиб фарзанд бўлишга давъат қилди. У ўз сўзида эришган ютуқларимиз ўзимизники, биз хато ва камчиликларни ўрганиб, уларни бартараф қилишга ҳаракат қилмоғимиз керак, деган фикрни барчамиз ҳаётий шоир қилиб олишимиз зарур, дея таъкидлади ҳамда билимга чанқоқ, изланувчан туманимиз ёшлари ҳақида ўзининг самимий фикр-мулоҳазаларини билдирди.

Шундан сўнг, Ўзбекистон Республикаси Президентининг Амударё туманимиздаги Халқ қабулхонаси мудири Эркин Ражабов ҳозирги кунда ёшларнинг, хусусан, мактаб, коллеж ва олий таълим муассасалари битирувчиларининг бандлигини таъминлаш мақсадида амалга оширилаётган ишлар, туманимизда фаолият юритаётган ёш тадбиркорлар, улар томонидан хизмат кўрсатиш соҳасида яратилаётган янги иш ўринлари ҳақида маълумотлар бериб, ҳудуд ёшларини тадбиркорликка давъат этди.

Шу билан бирга, туманимизда юқори марраларни эгаллаб, ўз қобилиятларини намоён этаётган ёшлар сафи ўсиб бораётгани ҳақида тўхталиб, илм-маърифатнинг инсон ҳаётидаги аҳамияти исбот талаб қилмайдиган ҳақиқат эканлигини эътироф этди.

Ёшлар билан учрашув йиғилишида иштирок этган 53 нафар ёшлар ҳаётига доир муаммоли масалаларни ҳал этиш мақсадида рўйхат шакллантирилиб, ҳар бир мурожаат ва ёшлар томонидан билдирилган таклифлар бўйича зарур чора-тадбирлар ишлаб чиқилиб, уларни тизимли равишда ҳал этиш, тегишли корхона ва ташкилотларнинг масъул ходимлари томонидан амалий ишлар олиб бориш юзасидан қарорлар қабул қилинди.

17 декабрь куни Юқори қишлоқ маҳалла фуқаролар йиғинида ҳам ҳудудда истиқомат қилувчи ёшларнинг муаммоларини ўрганишга бағишланган учрашув ўтказилди.

Ёшлар бандлигини таъминлаш, муаммо ва таклифларини ўрганиш, уларни ҳар томонлама қўллаб-қувватлаш ҳамда муносиб шарт-шароитлар яратиб беришга бағишланган учрашув йиғилишида Юқори қишлоқ маҳалласи ҳудудида яшовчи 70 нафарга яқин ёшлар иштирок этишди.

Ошкора мулоқот ва самимийлик руҳида ўтган учрашувда ҳудуд ёшларидан 15 нафари 18 та масала бўйича мурожаат қилдилар. Хусусан, Мавлуда Ражабова, Динора Бекберганова, Наргиза Собирова, Ферузбек Ўрозбоевлар ўз хусусий тадбиркорлик фаолиятларини йўлга қўйиш, шунингдек, ишга жойлашиш, банк кредитлари олиш бўйича мурожаат қилдилар. Шу куннинг ўзида ёшлар томонидан тушган мурожаатларнинг 2 таси жойида ижобий ҳал этилди. Бошқа мурожаатлар мутасадди ташкилотларнинг масъул ходимлари томонидан зарур чоралар кўриш мақсадида тизимга олинди.

 Ёшлар билан ўтказилаётган учрашувлар нафақат уларнинг ҳаётидаги муаммоли  масалаларни жойига чиқиб ўрганиш ва бу борада уларга кўмаклашиш, балки туманимиз ёшлари томонидан амалга оширилаётган истиқболли лойиҳалар, илм-фан, маънавий-маърифий соҳаларда эришаётган ютуқларнинг мазмун-моҳиятини ҳам ёшлар онгига янада чуқурроқ сингдиришга қаратилгани билан муҳим аҳамиятга эга бўлмоқда.

Робия ЙЎЛДОШЕВА.