UChRAShUVLARDA YoShLARNING MUAMMOLARI OʻRGANILMOQDA

Oʻzbekiston Respublikasi Prezidenti Shavkat Mirziyoyev tomonidan 2019-yil 27-dekabr kuni Muhammad Al-Xorazmiy nomidagi ixtisoslashtirilgan maktabda oʻtkazilgan uchrashuvda berilgan topshiriqlar ijrosini taʼminlash maqsadida tuman hududidagi ovul va mahallalarda yoshlar bilan uchrashuvlar oʻtkazilmoqda.

Qipchoq shaharcha fuqarolar yigʻinidagi 11-sonli maktab binosi majlislar zalida yoshlar bandligini taʼminlash, muammolarini oʻrganish, fikr va takliflarini tinglash, ularni qoʻllab-quvvatlash hamda munosib sharoit yaratishga bagʻishlangan navbatdagi uchrashuv boʻlib oʻtdi. Hudud yoshlari va mutasaddi tashkilotlar rahbarlari ishtirokida oʻtgan mazkur uchrashuvda jami 53 nafar faol yoshlar qatnashdilar.

Yigʻilishni tuman hokimi oʻrinbosari Mahmud Shermetov ochdi hamda uchrashuv qatnashchilarini kun tartibidagi masala bilan tanishtirdi. Shuningdek, Mahmud Shermetov mamlakatimizda yoshlarning yuksak marralarni egallashlari uchun yaratilayotgan shart-sharoitlar, cheksiz imkoniyatlar haqida toʻxtalib, yoshlarni oʻqib, bilim olishga, shijoat bilan olgʻa intilishga hamda Vatan xizmatiga yaraydigan munosib farzand boʻlishga davʼat qildi. U oʻz soʻzida erishgan yutuqlarimiz oʻzimizniki, biz xato va kamchiliklarni oʻrganib, ularni bartaraf qilishga harakat qilmogʻimiz kerak, degan fikrni barchamiz hayotiy shoir qilib olishimiz zarur, deya taʼkidladi hamda bilimga chanqoq, izlanuvchan tumanimiz yoshlari haqida oʻzining samimiy fikr-mulohazalarini bildirdi.

Shundan soʻng, Oʻzbekiston Respublikasi Prezidentining Amudaryo tumanimizdagi Xalq qabulxonasi mudiri Erkin Rajabov hozirgi kunda yoshlarning, xususan, maktab, kollej va oliy taʼlim muassasalari bitiruvchilarining bandligini taʼminlash maqsadida amalga oshirilayotgan ishlar, tumanimizda faoliyat yuritayotgan yosh tadbirkorlar, ular tomonidan xizmat koʻrsatish sohasida yaratilayotgan yangi ish oʻrinlari haqida maʼlumotlar berib, hudud yoshlarini tadbirkorlikka davʼat etdi.

Shu bilan birga, tumanimizda yuqori marralarni egallab, oʻz qobiliyatlarini namoyon etayotgan yoshlar safi oʻsib borayotgani haqida toʻxtalib, ilm-maʼrifatning inson hayotidagi ahamiyati isbot talab qilmaydigan haqiqat ekanligini eʼtirof etdi.

Yoshlar bilan uchrashuv yigʻilishida ishtirok etgan 53 nafar yoshlar hayotiga doir muammoli masalalarni hal etish maqsadida roʻyxat shakllantirilib, har bir murojaat va yoshlar tomonidan bildirilgan takliflar boʻyicha zarur chora-tadbirlar ishlab chiqilib, ularni tizimli ravishda hal etish, tegishli korxona va tashkilotlarning masʼul xodimlari tomonidan amaliy ishlar olib borish yuzasidan qarorlar qabul qilindi.

17-dekabr kuni Yuqori qishloq mahalla fuqarolar yigʻinida ham hududda istiqomat qiluvchi yoshlarning muammolarini oʻrganishga bagʻishlangan uchrashuv oʻtkazildi.

Yoshlar bandligini taʼminlash, muammo va takliflarini oʻrganish, ularni har tomonlama qoʻllab-quvvatlash hamda munosib shart-sharoitlar yaratib berishga bagʻishlangan uchrashuv yigʻilishida Yuqori qishloq mahallasi hududida yashovchi 70 nafarga yaqin yoshlar ishtirok etishdi.

Oshkora muloqot va samimiylik ruhida oʻtgan uchrashuvda hudud yoshlaridan 15 nafari 18 ta masala boʻyicha murojaat qildilar. Xususan, Mavluda Rajabova, Dinora Bekberganova, Nargiza Sobirova, Feruzbek Oʻrozboyevlar oʻz xususiy tadbirkorlik faoliyatlarini yoʻlga qoʻyish, shuningdek, ishga joylashish, bank kreditlari olish boʻyicha murojaat qildilar. Shu kunning oʻzida yoshlar tomonidan tushgan murojaatlarning 2 tasi joyida ijobiy hal etildi. Boshqa murojaatlar mutasaddi tashkilotlarning masʼul xodimlari tomonidan zarur choralar koʻrish maqsadida tizimga olindi.

 Yoshlar bilan oʻtkazilayotgan uchrashuvlar nafaqat ularning hayotidagi muammoli  masalalarni joyiga chiqib oʻrganish va bu borada ularga koʻmaklashish, balki tumanimiz yoshlari tomonidan amalga oshirilayotgan istiqbolli loyihalar, ilm-fan, maʼnaviy-maʼrifiy sohalarda erishayotgan yutuqlarning mazmun-mohiyatini ham yoshlar ongiga yanada chuqurroq singdirishga qaratilgani bilan muhim ahamiyatga ega boʻlmoqda.

Robiya YOʻLDOShEVA.