ҲАРБИЙЛАР ВА ЧЕГАРАОЛДИ ҲУДУДИ АҲОЛИСИ УЧУН КОНЦЕРТ ДАСТУРИ НАМОЙИШ ЭТИЛДИ
Ўзбекистон Республикасининг Давлат чегараси тўғрисидаги қонуни Давлат чегарасини белгилаш, ўзгартириш, ҳимоя қилиш ва қўриқлаш соҳасидаги муносабатларни тартибга солади. Ушбу Қонунга амал қилинишини мунтазам назорат қилиш, дахлсизлигини сақлашда Чегара қўшинларининг хизматлари беқиёсдир.
Туманимизда фаолият юритаётган 3-Чегарани қўриқлаш взводи ҳарбий хизматчилари, муддатли ҳарбий хизмат бурчини ўтаётган аскарларга ҳам шундай таъриф бериш мумкин.
Шуниси эътиборлики, взвод ҳарбий хизматчилари, аскарларнинг ўз бурчларини садоқат билан адо этишлари учун барча шароитлар яратилган. Хизматчилар хизмат уйлари билан таъминланган, оилалари билан тинч-хотиржам яшашмоқда. Шунингдек, Президентимизнинг 2018 йил 4 августдаги “Ўзбекистон Республикаси Қуролли Кучлари ҳарбий хизматчиларининг маънавий-маърифий савиясини ошириш тизимини тубдан такомиллаштириш тўғрисида”ги Қарори асосида ҳарбий хизматчилар ва уларнинг оилалари учун маънавиятни юксалтириш, миллий қадрият ва анъаналарни чуқур ўрганиш, Ватанга муҳаббатни оширишни тарғиб қилувчи тадбирлар ўтказилиб борилмоқда.
Яқинда ушбу взвод ҳарбий хизматчилари ва уларнинг оила аъзолари, муддатли ҳарбий хизмат бурчини ўтаётган аскарлар, чегараолди ҳудудида истиқомат қилувчи аҳолининг маданий дам олишига шароит яратиш мақсадида 9-сонли Болалар мусиқа ва санъат мактабида концерт ташкил этилди. Концертда Давлат хавфсизлик хизматига қарашли Чегара қўшинлари “Сарҳад” ашула ва рақс ансамбли иштирокчилари ўзларининг озод ва обод Ватан, унинг ҳимояси ҳар бир ҳарбий чегарачи учун муқаддас бурч эканлигини, она Ватанимизнинг ҳар бир қарич ерини кўз қорачиғидай асраш лозимлигини тараннум этувчи куй-қўшиқларни юксак маҳорат билан тақдим этдилар. Ҳар бир ижро томошабинлар томонидан олқишланди.
Аслида мукаммал яратилган ва маромига етказиб ижро этилган ҳар бир куй-қўшиқ дилларга ором, маънавий озуқа беради. Лекин ватанпарварлик руҳидаги куй-қўшиқлар юракларга киндик қонимиз томган шу азиз тупроққа меҳримизни, муҳаббатимизни оширгани, уни асраш лозимлигини сингдиргани билан жуда аҳамиятлидир. “Сарҳад” ансамбли концерт дастури томошабинларда улкан таассуротлар қолдирди, кунни-кун, тунни-тун демай чегараларимизни собит туриб ҳимоя қилаётган, тинч-осойишта ҳаёт кечиришимизни таъминлаётган чегарачи ҳарбийларга ҳурмат-эҳтиром ҳиссини юксалтирди.
Фазлиддин МАҲАМАДИЕВ, 3-Чегарани қўриқлаш взоди хизматчиси.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
