Ҳарбийлар ва ёшлар иштирокида «Юрт қайғусида 365 кун» китоби тақдимоти ўтказилди

Мамлакатимизда ёш авлоднинг маънавий етуклиги, уларнинг қалбида Ватанга муҳаббат ва садоқат туйғуларини юксалтириш давлат сиёсатининг устувор йўналишларидан бири саналади. Хусусан, бу борадаги эзгу ташаббуслар нафақат таълим муассасаларида, балки ҳарбий қисмлар ва ҳуқуқ-тартибот идоралари тизимида ҳам кенг қулоч ёймоқда. Давлат хавфсизлик хизмати Чегара қўшинларига қарашли Амударё туманида жойлашган ҳарбий қисм ҳарбий хизматчилари ҳамда ёшлар иштирокида туман ахборот-кутубхона марказида ўтказилган маънавий-маърифий тадбир ҳам шулар жумласидандир. Ушбу китобхонлик соати оддийгина учрашув эмас, балки ҳарбий хизматчилар ва ўсиб келаётган ёш авлод ўртасидаги ўзига хос маънавий кўприк вазифасини ўтади. Тадбирнинг асосий мақсади ёш аскарларнинг дунёқарашини кенгайтириш, уларнинг интеллектуал салоҳиятини ошириш ва мутолаа маданиятини янада юксалтиришдан иборат бўлди.

Бу галги маърифат соати Президентимизнинг ўтган йил давомидаги фаолиятига оид "Юрт қайғусида 365 кун" номли асарининг кенг жамоатчиликка, хусусан, ҳарбийларга тақдимотига бағишланди. Мазкур китобнинг мазмун-моҳияти, унда илгари сурилган теран фикрлар ва ҳаётий хулосалар иштирокчилар томонидан катта қизиқиш билан кутиб олинди.

Тадбир давомида йиғилганларга мутахассислар томонидан асардаги бунёдкорлик ғоялари, тараққиётнинг машаққатли, аммо шарафли йўллари ҳақида атрофлича маълумотлар берилди. Ушбу ғоялар Ватан сарҳадларини қўриқлаётган, халқ осойишталигини таъминлашни ўз ҳаётининг бош мақсади деб билган ҳарбий хизматчиларимиз чинакам маънавий ва руҳи озуқа бўлди, десак муболаға бўлмайди. Айниқса, муддатли ҳарбий хизматни ўтаётган ёш йигитлар асарда ёритилган эзгу мақсадларни, юрт қайғуси ва қувончини ўзида мужассам этган саҳифалар баёнини катта эътибор ва ҳаяжон билан тингладилар.

Очиқ ва самимий руҳда ўтган мулоқот жараёнида аскарлар ўзларини қизиқтирган барча саволларга соҳа мутахассислари ва зиёлилардан аниқ ҳамда асосли жавоблар олдилар.

Учрашувнинг расмий қисмидан сўнг, тадбир чинакам мутолаа байрамига уланиб кетди. Ҳарбий хизматчилар ва ёшлар туман ахборот-кутубхона марказининг бой фонди, бу масканда сақланаётган турли йўналишлардаги, жумладан, тарихий, илмий-оммабоп ва бадиий адабиётлар билан яқиндан танишдилар. Ҳар бир аскар ўзининг шахсий қизиқишлари ва дунёқарашидан келиб чиққан ҳолда сара асарларни танлаб, мутолаа қилиш имкониятига эга бўлди.

Кутубхонанинг шинам ўқув залларида китоб мутолаа қилаётган ҳарбий либосдаги йигитларнинг кўриниши ҳар қандай кишида ҳавас уйғотади. Чунки жисмонан бақувват, жанговар шайлиги юқори бўлган аскарнинг маънан ҳам етук бўлиши унинг енгилмаслигидан далолат беради. Бундан ташқари, ахборот-кутубхона маркази томонидан яратилган замонавий шарт-шароитлар ёшларга ўз устида ишлаш ва билимларини мустаҳкамлаш учун кенг майдон яратиб берди.

Хулоса ўрнида шуни таъкидлаш жоизки, мазкур маърифий тадбир нафақат китобхонлик маданиятини юксалтиришга, балки ёшларнинг интеллектуал салоҳиятини беқиёс даражада бойитишга хизмат қилади. Энг муҳими, бу каби учрашувлар ўсиб келаётган авлодни Ватанга чексиз садоқат, фидойилик ва юксак маънавият руҳида камолга етказишда муҳим аҳамият касб этади. Зеро, айнан шундай эзгу ва давомли ташаббуслар эртамиз эгалари бўлган мард ўғлонларнинг юрт равнақи, унинг тинчлиги ва келажаги йўлидаги масъулиятини янада ошириши шубҳасиздир.