Harbiylar va yoshlar ishtirokida «Yurt qaygʻusida 365 kun» kitobi taqdimoti oʻtkazildi

Mamlakatimizda yosh avlodning maʼnaviy yetukligi, ularning qalbida Vatanga muhabbat va sadoqat tuygʻularini yuksaltirish davlat siyosatining ustuvor yoʻnalishlaridan biri sanaladi. Xususan, bu boradagi ezgu tashabbuslar nafaqat taʼlim muassasalarida, balki harbiy qismlar va huquq-tartibot idoralari tizimida ham keng quloch yoymoqda. Davlat xavfsizlik xizmati Chegara qoʻshinlariga qarashli Amudaryo tumanida joylashgan harbiy qism harbiy xizmatchilari hamda yoshlar ishtirokida tuman axborot-kutubxona markazida oʻtkazilgan maʼnaviy-maʼrifiy tadbir ham shular jumlasidandir. Ushbu kitobxonlik soati oddiygina uchrashuv emas, balki harbiy xizmatchilar va oʻsib kelayotgan yosh avlod oʻrtasidagi oʻziga xos maʼnaviy koʻprik vazifasini oʻtadi. Tadbirning asosiy maqsadi yosh askarlarning dunyoqarashini kengaytirish, ularning intellektual salohiyatini oshirish va mutolaa madaniyatini yanada yuksaltirishdan iborat boʻldi.

Bu galgi maʼrifat soati Prezidentimizning oʻtgan yil davomidagi faoliyatiga oid "Yurt qaygʻusida 365 kun" nomli asarining keng jamoatchilikka, xususan, harbiylarga taqdimotiga bagʻishlandi. Mazkur kitobning mazmun-mohiyati, unda ilgari surilgan teran fikrlar va hayotiy xulosalar ishtirokchilar tomonidan katta qiziqish bilan kutib olindi.

Tadbir davomida yigʻilganlarga mutaxassislar tomonidan asardagi bunyodkorlik gʻoyalari, taraqqiyotning mashaqqatli, ammo sharafli yoʻllari haqida atroflicha maʼlumotlar berildi. Ushbu gʻoyalar Vatan sarhadlarini qoʻriqlayotgan, xalq osoyishtaligini taʼminlashni oʻz hayotining bosh maqsadi deb bilgan harbiy xizmatchilarimiz chinakam maʼnaviy va ruhi ozuqa boʻldi, desak mubolagʻa boʻlmaydi. Ayniqsa, muddatli harbiy xizmatni oʻtayotgan yosh yigitlar asarda yoritilgan ezgu maqsadlarni, yurt qaygʻusi va quvonchini oʻzida mujassam etgan sahifalar bayonini katta eʼtibor va hayajon bilan tingladilar.

Ochiq va samimiy ruhda oʻtgan muloqot jarayonida askarlar oʻzlarini qiziqtirgan barcha savollarga soha mutaxassislari va ziyolilardan aniq hamda asosli javoblar oldilar.

Uchrashuvning rasmiy qismidan soʻng, tadbir chinakam mutolaa bayramiga ulanib ketdi. Harbiy xizmatchilar va yoshlar tuman axborot-kutubxona markazining boy fondi, bu maskanda saqlanayotgan turli yoʻnalishlardagi, jumladan, tarixiy, ilmiy-ommabop va badiiy adabiyotlar bilan yaqindan tanishdilar. Har bir askar oʻzining shaxsiy qiziqishlari va dunyoqarashidan kelib chiqqan holda sara asarlarni tanlab, mutolaa qilish imkoniyatiga ega boʻldi.

Kutubxonaning shinam oʻquv zallarida kitob mutolaa qilayotgan harbiy libosdagi yigitlarning koʻrinishi har qanday kishida havas uygʻotadi. Chunki jismonan baquvvat, jangovar shayligi yuqori boʻlgan askarning maʼnan ham yetuk boʻlishi uning yengilmasligidan dalolat beradi. Bundan tashqari, axborot-kutubxona markazi tomonidan yaratilgan zamonaviy shart-sharoitlar yoshlarga oʻz ustida ishlash va bilimlarini mustahkamlash uchun keng maydon yaratib berdi.

Xulosa oʻrnida shuni taʼkidlash joizki, mazkur maʼrifiy tadbir nafaqat kitobxonlik madaniyatini yuksaltirishga, balki yoshlarning intellektual salohiyatini beqiyos darajada boyitishga xizmat qiladi. Eng muhimi, bu kabi uchrashuvlar oʻsib kelayotgan avlodni Vatanga cheksiz sadoqat, fidoyilik va yuksak maʼnaviyat ruhida kamolga yetkazishda muhim ahamiyat kasb etadi. Zero, aynan shunday ezgu va davomli tashabbuslar ertamiz egalari boʻlgan mard oʻgʻlonlarning yurt ravnaqi, uning tinchligi va kelajagi yoʻlidagi masʼuliyatini yanada oshirishi shubhasizdir.